4. अब्रामा साथे परमात्मा री वाचा

बाढ़ा ते कई साल बाद, संसारा बिचे बहुत सारे लोक रया करो थे, स्यो एबु बी परमात्मा रे खिलाफ ओर एक-दूजे रे खिलाफ पाप करो थे। ओर स्यो सब एकी भाषा बोल्या करो थे, इजिखातर स्यो एक साथ कट्ठे हुए ओर एक नगर बणाणे लगे। ओर जेड़ा परमात्मा ने तिनाखे आदेश दिता था, तिजिरे अनुसार स्यो पूरे संसारा बिचे नी फैले।

स्यो बहुत घमंडी थे, तिनाखे केड़ा जीवन जीणा चइयो एस बारे चे स्यो परमात्मा रे आदेशा रा पालन नी करना चाओ थे। बल्कि तिनाने एक एड़ी मीनार बणाणी शुरू करती जो स्वर्गा तक पौंची सको। परमात्मा ने देख्या कि अगर ये कट्ठे मिलिके बुरे काम करदे रए तो ये ओर बी बहुत सारे पाप वाले काम करने लगी जाणे।

इजिखातर परमात्मा ने तिनारी भाषा कई अलग-अलग भाषा बिचे बदलती ओर स्यो लोक सारे संसारा बिचे फैलाइते। जो नगर बणाणा तिनाने शुरू किता था तिजिखे बाबेल बोल्या गया, बाबेल मतलब “गड़बड़ी’’।

बहुत साल बाद, परमात्मा ने अब्राम नावां रे एक आदमी साथे गल्ल किती। परमात्मा ने तेसके बोल्या, “आपणा देश ओर आपणा परिवार छाडिके तेस देशा खे चली जा जो हाउं ताखे दखाउंगा। हाउं ताखे आशीष देउंगा ओर हाउं तादें एक बड़ी बरादरी बणाउंगा। हाउं तेरा नाओं ऊचा करुंगा। जिने ताखे आशीष देणी हाउं बी तेसके आशीष देउंगा, जिने ताखे श्राप देणा हाउं बी तेसके श्राप देउंगा। तेरे जरिए संसारा री सब बरादरिया खे आशीष मिलणी।”

अब्रामा ने परमात्मा रा आदेश मान्या। से आपणी जायदात, आपणे सेवादार ओर आपणी करवाली सारै खे साथे लेइके कनान देशा खे चलिगा जो परमात्मा ने तेसके दखाया था।

जेबे अब्राम कनान देशा बिचे पौंच्या तो परमात्मा ने तेसके बोल्या, “अब्राम आपणे चारो तरफ देख। ये सारा देश मै ताखे देणा ओर तेरे वंशजा ने हमेशा खातर इजी पादें अधिकार राखणा।’’ तेबे अब्राम तेस देशा बिचे बसिगा।

मलिकिसिदक नावां रा एक आदमी था जो परमात्मा रा सबी ते बड़ा पुरोहित था। एक दिन जेबे अब्राम युद्ध करिके आउणे लगिरा था तो मलिकिसिदक ओर अब्राम मिले। मलिकिसिदका ने अब्रामा खे आशीष दिती ओर बोल्या, “सबी ते बड़ा परमात्मा जो स्वर्ग ओर तरती रा मालक ए से ताखे आशीष देयो।” फेर अब्रामा ने युद्धा बिचे जीतिदी सब चीजा रा दसवां हिस्सा मलिकिसिदका खे दिता।

कई साल बितिगे, पर एबु तक बी अब्राम ओर सारै रे कोई पुत नी हुआ। परमात्मा ने अब्रामा साथे गल्ल किती ओर फेर वादा किता। तिने ये वादा किता कि तेरा एक पुत पैदा हुणा, ओर तेसरे वंशज आसमाणा रे इना तारेया जितने हुणे। अब्रामा ने परमात्मा रे वादे पादें परोसा किता। ओर परमात्मा ने घोषणा किती कि अब्राम एक तर्मी आदमी ए।

तेबे परमात्मा ने अब्रामा साथे एक वाचा बानी। वाचा दो लोका बिचे एक-दूजे खातर काम करने रा एक समझौता होआ। परमात्मा ने ये वादा अब्रामा साथे तेबे किता था जेबे अब्राम सौणे लगिरा था, पर से तेबे बी परमात्मा री गल्ल सुणी सको था। परमात्मा ने ये वादा किता कि, “तेरी करवाली सारै ते तेरे खातर एक पुत पैदा हुणा। हाउं तेरे वंशजा खे ये कनान देश देउंगा।” पर एबु बी अब्रामा रे कोई पुत नी था।