5. वादे रा पुत

अब्राम ओर सारै रे कनान देशा बिचे पौंचणे ते दस साल बाद, बी एबु तक तिनारे कोई औलाद नी थी। इजिखातर अब्रामा री करवाली सारै ने तेसके बोल्या, “देख परमात्मा ने माखे एबु तक कोई औलाद नी देई राखी। ओर एबे तो हाउं बच्चा पैदा करने खातर बहुत बुडी हुइगिदी, सुण तूं मेरी सेवादारनी हाजिरा रे जरिए मेरे खातर एक औलाद पैदा कर।’’

फेर अब्रामा ने हाजिरा रे जरिए आपणी करवाली सारै खातर पुत पैदा किता, ओर अब्रामा ने तेसरा नाओं इश्माएल राख्या। पर सारै हाजिरा ते जलन करने लगी। जेबे इश्माएल 13 साला रा था, तो परमात्मा ने फेर अब्रामा साथे गल्ल किती।

परमात्मा ने बोल्या, “हाउं सर्व-शक्तिमान परमात्मा ए। हाउं तेरे साथे एक वाचा बानूंए।” तेबे अब्रामा ने जमीना पादें चुकिके आपणे घुटणे टेके। परमात्मा ने अब्रामा खे ये बी बोल्या, “तूं बहुत सारी बरादरिया रा पिता हुणा। हाउं ताखे ओर तेरे वंशजा खे तिनारी आपणी जमीन बणाणे खातर कनान देश देउंगा ओर हाउं हमेशा खातर तिनारा परमात्मा रौणा। तैं आपणे परिवारा बिचे हर मर्दा रा खतना करना।

“तेरी करवाली सारै ने एक पुता खे जन्म देणा, से पुत वादे रा पुत हुणा। तैं तेसरा नाओं इसहाक राखणा। मै तेस साथे आपणी वाचा बणाएदे राखणी ओर से एक बहुत बड़ी बरादरी बणी जाणा। हाउं इश्माएला खे बी एक बड़ी बरादरी बणाउंगा, पर मेरी वाचा इसहाका साथे रौणी।’’ तेबे परमात्मा ने अब्रामा रा नाओं बदलिके अब्राहम करता, जिजिरा मतलब ए “बहुता रा पिता”। परमात्मा ने सारै रा बी नाओं बदलिके सारा करता, जिजिरा मतलब ए “बहुता री आम्मा’’।

तेस दिना अब्राहमा ने आपणे परिवारा बिचे सब मर्दा रा खतना किता। लगभग एक साल बाद, जेबे अब्राहमा री उम्र 100 साल थी ओर सारा री 90 साल थी, तेबे सारा ने अब्राहमा रे पुता खे जन्म दिता। ओर जियां परमात्मा ने तिनाखे बोल्या था तिनाने तियांई तेसरा नाओं इसहाक राख्या।

जेबे इसहाक जवान हुआ तो परमात्मा ने अब्राहमा रा परोसा परखणे खातर तेसरी परीक्षा किती, परमात्मा ने बोल्या, “मेरे खातर आपणे एकलौते पुता री बली चढ़ाइदे।” अब्राहमा ने फेर परमात्मा रा आदेश मान्या, ओर आपणे पुता री बली चढ़ाणे खातर तैयार हुइगा।

जेबे अब्राहम ओर इसहाक बली चढ़ाणे वाली जैगा री तरफ जाणे लगिरे थे तो इसहाका ने अब्राहमा ते पुछया, “पापा, आसागे लकड़िया तो हाए, पर बली चढ़ाणे खातर मेमना केइए?” अब्राहमा ने जवाब दिता, “मेरे पुत, बली चढ़ाणे खातर मेमने रा इन्तजाम परमात्मा ने आपी करना।”

जेबे स्यो बली चढ़ाणे वाली जैगा बिचे पौंचिगे, तो अब्राहमा ने इसहाक बानिके वेदी पादें लेटाइता। अब्राहम आपणे पुता खे मारनेई वाला था इतने बिचे परमात्मा ने बोल्या, “रुकी जा! आपणे पुता खे नुकसाण नी पौंचाया! एबे माखे पता लगिगा कि तूं मेरा डर मानोआ क्योंकि तूं मेरे खातर आपणे एकलौते पुता री बी बली चढ़ाणे खातर तैयार हुइगा।”

अब्राहमा ने सामणे एक मेमना देख्या, जो झाड़िया बिचे फसिरा था। इसहाका री बली रे बदले मेमने रा इन्तजाम परमात्मा ने पैलेई था कितादा। ओर अब्राहमा ने खुशी-खुशी मेमने री बली चढ़ाई।

तेबे परमात्मा ने अब्राहमा खे बोल्या, “तूं मेरे खातर आपणा सब कुछ देणे खातर तैयार था, बल्कि तूं मेरे खातर आपणे एकलौते पुता री बली चढ़ाणे खातर बी तैयार हुइगा था, इजिखातर हाउं ताखे आशीष देणे रा वादा करूंए। तेरे वंशज आसमाणा रे तारेया ते बी जादा हुणे। क्योंकि तैं मेरा आदेश मान्या इजिखातर मै तेरे परिवारा रे जरिए संसारा री सब बरादरिया खे आशीष देणी।