6. परमात्मा ने इसहाका खातर इन्तजाम किता

जेबे अब्राहम बुडा हुइगा था तेबे तेसरा पुत इसहाक, बी जवान हुइगा था। इजिखातर अब्राहमा ने आपणा एक सेवादार तेस देशा बिचे पेज्या जेती तेसरे रिश्तेदार रओ थे, ताकि से अब्राहमा रे पुत इसहाका खातर एक करवाली लयाई सको।

एक लम्बी यात्रा ते बाद, अब्राहमा रा सेवादार तेस देशा बिचे पौंच्या, जेती अब्राहमा रे रिश्तेदार रओ थे। परमात्मा ने से सेवादार रिबका साथे मिलवाया। रिबका अब्राहमा रे पाई री पोती थी।

रिबका आपणे परिवारा खे छाडिके, अब्राह्मा रे सेवादारा साथे इसहाका रे करे जाणे खातर मानिगी। जियांई रिबका पौंची, इसहाका ने तेसा साथे ब्या करिला।

एक लम्बे समय बाद, अब्राहमा री मौत हुइगी। तेबे परमात्मा ने अब्राहमा रे पुत इसहाका खे आशीष दिती, क्योंकि परमात्मा ने अब्राहमा साथे वाचा बानी थी। तेस वाचा बिचे परमात्मा ने एक वादा किता था कि अब्राहमा रे अनगिणत वंशज हुणे। पर रिबका रे कोई औलाद पैदा नी हुई।

इसहाका ने रिबका खातर प्रार्थना किती, ओर परमात्मा ने तेसरी प्रार्थना सुणी ओर तेसरी करवाली खे तेसी समय जुड़वां पुता री आशीष दिती। जेस समय स्यो बच्चे रिबका रे पेटा बिचे थे स्यो तेसारे पेटा बिचेई आपी-पिछिए लड़ने लगे, इजिखातर रिबका ने परमात्मा ते पुछया कि ये क्या हुणे लगिरा।

परमात्मा ने रिबका खे बोल्या, “तैं दो पुता खे जन्म देणा। ओर तिनारे वंशज दो अलग-अलग बरादरिया बणनिया। स्यो एक दूजे साथे लड़ने। पर बड़े पुता ते पैदा हुणे वाली बरादरी खे छोटे पुता ते आउणे वाली बरादरी रा आदेश मानणा पड़ना।”

जेबे रिबका रे पुता रा जन्म हुआ, तो बड़ा पुत लाल ओर काम्बला री तरह रोमदार पैदा हुआ, तिनाने तेसरा नाओं एसाव राख्या। ओर छोटा पुत बड़े पुता री आड्डी पकड़े हुए पैदा हुआ, ओर तिनाने तेसरा नाओं याकूब राख्या।