7. परमात्मा ने याकूबा खे आशीष दिती

जेबे स्यो पुत बड़े हुए तो छोटे पुत याकूबा खे करे रौणा अच्छा लगया, पर बड़े पुत एसावा खे जानवरा रा शिकार करना अच्छा लगया। रिबका याकूबा साथे प्यार राखो थी ओर इसहाक एसावा साथे प्यार राखो था।

एक दिन जेबे एसाव शिकार करिके वापस आया तो तेसके बहुत पुख लगी। एसावा ने आपणे छोटे पाई याकूबा खे बोल्या, “जो खाणा तैं पकाई राख्या तिजी बिचे ते थोड़ा जा खाणा माखे बी दे।” याकूबा ने जवाब दिता, “पैले मेरे साथे ये वादा कर कि पैला पुत हुणे रे नाते जो हर एक चीज ताखे मिलणी चइयो, से सब कुछ तैं माखे देणा।” तेबे एसावा ने सब कुछ याकूबा खे देणे रा वादा किता। तेथे बाद, याकूबा ने तेसके खाणा दिता।

इसहाक एसावा खे आशीष देणा चाओ था। पर एथे पैले कि से एड़ा करदा, रिबका ओर तेसारे पुत याकूबा ने इसहाका साथे तोखा किता, ओर याकूबा ने एसाव हुणे रा दखावा किता। क्योंकि इसहाक बहुत बुडा हुइगा था ओर एबे तेसके कुछ बी नी दिखो था। इजिखातर याकूब ने एसावा रे टाले पैनिले ओर आपणे गला ते ओर आथा ते बाकरिया री खाल लपेटी ली।

याकूब इसहाका गे आया ओर बोल्या, “हाउं तेरा बड़ा पुत एसाव ए। हाउं इजिखातर आइरा ताकि तूं माखे आशीष देयो।” जेबे इसहाका ने तेस पादें बाकरिया रे बाल मैहसूस किते ओर तेसरे टाले सूँगे, तो तिने समझया कि ये एसाव ए ओर तेसके आशीष दिती।

एसाव याकूबा साथे नफरत करने लगया क्योंकि तिने एसावा ते बड़ा पुत हुणे रा अधिकार छिनिला था ओर तिने पापे ते तेसरी आशीष बी लेइली थी। तेथे बाद एसावा ने योजना बणाई कि जेबे आसारा पापा मरी जाणा तो मैं याकूब खत्म करी देणा।

पर रिबका ने एसावा री ये योजना सुणिली। इजिखातर तेसाने ओर इसहाका ने याकूब आपणे दूर रिश्तेदारा गे रौणे खातर पेजिता।

याकूब कई साल तक रिबका रे रिश्तेदारा साथे रया। तेस समय बिचे तिने ब्या किता ओर तेसरे बारा पुत ओर एक बेटी पैदा हुई। परमात्मा ने याकूब बहुत जादा अमीर बणाइता था।

बी साल तक कनान देशा बिचे आपणे करा ते दूर रौणे ते बाद, याकूब आपणे परिवारा खे, आपणे सेवादारा खे, ओर आपणे सारे जानवरा खे लेइके वापस आपणे करा खे आया।

याकूब बहुत जादा डरो था क्योंकि तिने सोच्या कि एसाव माखे एबु बी मारना चाओ हुणा। इजिखातर तिने पैले आपणे जानवर ओर कुछ सेवादार एसावा गे पेजे। जो सेवादार तिना जानवरा खे लेइके गए थे तिनाने एसावा खे बोल्या, “जो तेरा सेवादार याकूब ए, तिने ये सारे जानवर तेरे खातर पेजी राखे। से बस एती पौंचणेई वाला ए।”

पर एसाव एबे याकूबा खे मारना नी चाओ था। मारने रे बजाए, से तेसके दोबारा देखिके बहुत खुश था। तेथे बाद दोनो पाई कनान देशा बिचे खुशी-खुशी रए। फेर तिनारा पापा इसहाक बी मरिगा ओर तिना दोनो पाइया ने से मिलिके दफणाया। वाचा रा वादा जो परमात्मा ने अब्राहमा साथे किता था से एबे इसहाका ते याकूबा पादें आइगा था।