8. परमात्मा ने यूसुफ ओर तेसरा परिवार बचाया

याकूबा खे कनान देशा बिचे रौंदे हुए बहुत साल बीती चुके थे। जेबे से बुडा हुइगा, तो तिने आपणा प्यारा पुत यूसुफ तेसरे पाइया रा हाल-चाल पता करने खातर पेज्या। तेसरे पाई जानवरा री रखवाली करने लगिरे थे।

यूसुफा रे पाई तेसते नफरत करो थे क्योंकि तिनारा पापा यूसुफा साथे जादा प्यार करो था ओर इजिखातर बी कि यूसुफा ने सुपना देख्या था कि मैं आपणे पाइया पादें राज करना। जेबे यूसुफ आपणे पाइया गे आया तो तेसरे पाइया ने से पकड़िके बानिता ओर सेवादारा रा व्यापार करने वाले लोकाखे बेचिता।

जेबे यूसुफा रे पाई करे वापस आए तो तिनाने यूसुफा रे टाले फाड़िके बाकरिया रे खुना साथे रंगिते। फेर तिनाने से टाले आपणे पापे खे दखाए ताकि से इयां सोचो कि यूसुफ केस जंगली जानवरा ने मारता। एस कारण याकूब बहुत उदास हुइगा।

सेवादारा रा व्यापार करने वाले लोक यूसुफा खे मिस्र देशा बिचे लइगे। मिस्र देश नील नदी रे कनारे पादें बसयादा एक बड़ा ओर शक्तिशाली देश था। तिना सेवादारा रा व्यापार करने वाले लोका ने यूसुफ एक धनी सरकारी अधिकारी खे बेचिता। यूसुफा ने आपणे मालका री अच्छी तरह ते सेवा किती, ओर परमात्मा ने यूसुफा खे आशीष दिती।

तेथे बाद एड़ा हुआ कि तेसरे मालका री करवाली ने यूसुफा साथे नाजायज रिश्ता बणाणे कोशिश किती, पर तिने एस तरीके ते परमात्मा रे खिलाफ पाप करने ते इन्कार करता। से गुस्सा हुइगी ओर तेसाने यूसुफा पादें चूठा दोष लगाइता, इजिखातर से जेला बिचे बंद कर दिता गया। यूसुफ जेला बिचे बी, परमात्मा रे प्रति सच्चा ओर ईमानदार रया, ओर परमात्मा ने तेसके आशीष दिती।

दो साल बाद, निर्दोष हुणे रे बावजूद यूसुफ एबु बी जेला बिचे था। एक राती, मिस्र देशा रे फिरौन राजा ने दो सुपने देखे जिनाने से बहुत जादा परेशान करता। तेसरा कोई बी सलाहकार तेसके तिना सुपने रा मतलब नी बताई सक्या।

परमात्मा ने यूसुफा खे सुपने रा मतलब बताणे री समझ दिती दी थी, इजिखातर फिरौना ने यूसुफ जेला बिचे ते आपिगे बुलाया। यूसुफा ने फिरौन राजे खे तिना सुपने रा मतलब बताया ओर बोल्या, “परमात्मा ने पूरे मिस्र देशा बिचे सात साल अच्छी फसल देणी, पर तेथे बाद सात साल तक आकाल पड़ना।”

फिरौन यूसुफा ते इतना जादा खुश हुआ कि तिने से पूरे मिस्र देशा रा दूजा सबिते शक्तिशाली प्रधानमंत्री चुणया।

यूसुफा ने अच्छी फसल वाले सात साला बिचे लोकाखे बहुत सारा अनाज कट्ठा करने खातर बोल्या। जेबे सात साला रा आकाल पड़या तेबे यूसुफा ने लोकाखे से अनाज बेच्या ताकि तिनाखे खाणे खातर पूरा अनाज मिली सको।

से खतरनाक आकाल सिर्फ मिस्र देशा बिचेई नी, बल्कि कनान देशा बिचे बी पड़या था जेती याकूब ओर तेसरा परिवार रओ था।

इजिखातर याकूबा ने आपणे बड़े पुत अनाज खरीदणे खातर मिस्र देशा बिचे पेजे। जेबे स्यो अनाज खरीदणे खातर यूसुफा रे सामणे आए तो तिना पाइया ने यूसुफ नई पैछाणया। पर यूसुफा ने स्यो पैछाणिले।

यूसुफा ने पैले आपणे पाइया री परख करिली कि स्यो बदले या नई ओर तेथे बाद तिनाखे बोल्या, “हाउं तुसारा पाई यूसुफ ए! डरो मत। जेबे तुसे हाउं मिस्र देशा रे व्यापारिया खे बेच्या था। तो तेस समय तुसे मेरा बुरा करने री ठाणी राखी थी, पर परमात्मा ने से बुराई अच्छे खातर उपयोग किती! आई जाओ ओर मिस्र देशा बिचे रओ ताकि हाउं तुसा खातर ओर तुसारे परिवारा खातर खाणे रा इन्तजाम करी सकूं।”

जेबे यूसुफा रे पाई करे वापस आए ओर जेबे तिनाने आपणे पापा याकूबा खे बताया कि यूसुफ एबु बी जिउंदा ए तो से बहुत जादा खुश हुआ।

हालाँकि याक़ूब एक बुडा आदमी था तेबे बी से आपणे पूरे परिवारा साथे मिस्र देशा खे चलिगा, ओर स्यो तेती बसिगे। याकूबा ने मरने ते पैले, आपणे हर पुता खे आर्शिवाद दिता।

वाचा रा वादा जो परमात्मा ने अब्राहमा साथे किता था से इसहाका पादें, ओर तेथे बाद याकूबा पादें, ओर तेथे बाद तेसरे बारा पुता पादें ओर तिनारे परिवारा पादें आइगा था। तिना बारा पुता रे वंशज इस्राएल देशा रे बारा गोत्र बणिगे।