9. परमात्मा ने मूसा बुलाया

यूसुफा रे मरने ते बाद तेसरे सब रिश्तेदार मिस्र देशा बिचेई रौणे लगे। स्यो ओर तिनारे वंशज कई साल तक मिस्र देशा बिचेई रए, ओर तिनारे बहुत सारे बाल-बच्चे पैदा हुए। तिनाखे इस्राएली बोल्या गया।

कई सौ साल बाद, इस्राएली लोका री आबादी बहुत जादा बढ़िगी थी। मिस्री लोक एबे यूसुफा खे, ओर जो कुछ तिने तिनारी मदद करने खातर किता था तिजिखे पुलिगे थे। स्यो इस्राएली लोका ते डरिगे क्योंकि इस्राएली लोका री आबादी मिस्री लोका ते जादा थी। इजिखातर तेस समय मिस्र देशा पादें शासन करने वाले फिरौन राजे ने इस्राएली लोक मिस्री लोका रे गुलाम बणाइते।

मिस्री लोका ने इस्राएली लोक बहुत सारे मकान ओर नगर बणाणे खातर मजबूर किते। तेस मुश्किल कामा ने इस्राएली लोका रा जीवन बहुत दुखदायी बणाइता, पर परमात्मा ने तिनाखे आशीष दिती ओर तिनारे ओर बी जादा बच्चे पैदा हुए।

फिरौना ने देख्या कि इस्राएली लोका रे बहुत सारे बच्चे पैदा हुणे लगिरे, इजिखातर फिरौना ने आपणे लोकाखे आदेश दिता कि इस्राएली लोका रे छोटे-छोटे सब पुता खे नील नदी बिचे सेटिके खत्म करदो।

एक इस्राएली ज्वाणसा ने एक पुता खे जन्म दिता। तेसाने ओर तेसारे करवाले ने जितना हुई सक्या से बच्चा छुपाइके राख्या।

जेबे स्यो तेस बच्चे खे ओर जादा नी छुपाई सके, तो तिनाने से बच्चा मरने ते बचाणे खातर एक टोकरी बिचे राखिके से टोकरी नील नदी रे कनारे पादें सरकंडया रे बिचे राखिती। तेस बच्चे री बड़ी बैण दूर खड़ी हुइके देखणे लगिरी थी कि तेस साथे क्या हुणा।

तेबे फिरौना री बेटी नहाणे खातर तेस नदिया बिचे आई, तेती तेसाने सरकंडया रे बिचे एक टोकरी देखी। तेसाने आपणिया सेवादारनिया तेस टोकरी लयाओणे खातर पेजिया, तेसाने तेस टोकरी बिचे एक बच्चा देख्या, तेस बच्चे पादें दया करिके तेसाने से आपणा बच्चा बणाइला। तेसाने तेस बच्चे खे दूध पिलाणे खातर एक इस्राएली ज्वाणस राखिली, ये जाणे बिना कि से तेस बच्चे री सगी आम्मा ए। जेबे से बच्चा बड़ा हुआ तो तेस इजराएली ज्वाणसा ने सोच्या कि बच्चे खे एबे माया रे दूधा री जरूरत निए, तेबे तेसाने से बच्चा फिरौना री बेटी खे वापस देइता, ओर तेसाने तेसरा नाओं मूसा राख्या।

एक दिन, जेबे मूसा जवान हुआ, तेबे तिने देख्या कि मिस्री आदमी इस्राएली आदमी खे मारने लगिरा। तो मूसा ने आपणे इस्राएली साथी खे बचाणे री कोशिश किती।

तेबे मूसा ने सोच्या कि माखे कोई नी देखोए ओर तिने से मिस्री आदमी खत्म करता ओर तेसरा शरीर दफणाइता। पर मूसा तेस मिस्री आदमी खे मारदे हुए किने देखिला था।

जेबे फिरौना खे पता लगया कि मूसा ने क्या किता। तेबे तिने मूसा खे खत्म करने री कोशिश किती, पर मूसा मिस्र देशा ते बणा री तरफ नठिगा। जेती फिरौना रे सैनिक तेसके टोली नी सके।

मूसा मिस्र देशा ते दूर मिघान देशा बिचे रौणे लगया। तिने तेती एक लड़की साथे बया करिला ओर दो बच्चे पैदा किते, ओर से तेती एक चरवाहा बणिगा।

मूसा तेती रइके आपणे सौरे रिया पेडा चारया करो था। एक दिन मूसा ने एक जलदी हुई झाड़ी देखी जो बिना स्वाह हुए जलने लगिरी थी। मूसा तिजी देखणे खातर तेस झाड़िया रे नजदीक गया। जेबे मूसा तेस झाड़िया रे नजदीक आया तो परमात्मा ने तेस साथे गल्ल किती। परमात्मा ने तेसके बोल्या, “ए मूसा, आपणे जूते खोली दे। क्योंकि तूं एक पवित्र जैगा बिचे खड़िरा।”

परमात्मा ने मूसा खे बोल्या, “मैं आपणे लोका रा दुख देखी राख्या जो मिस्र देशा बिचे ए। इजिखातर मैं तूं फिरौना गे पेजणा ताकि तूं मेरे इस्राएली लोकाखे मिस्री लोका री गुलामी ते छुड़ाइके लयाओ। मैं तिनाखे कनान देश देणा, से देश जो मैं अब्राहम, इसहाक, ओर याकूबा खे देणे रा वादा किता था।”

मूसा ने परमात्मा ते पुछया, “जेबे तिना लोका ने मादें पूछणा कि तूं किने पेजी राख्या तो मैं तिनाखे क्या बोलणा?” परमात्मा ने मूसा खे बोल्या, “तैं तिनाखे इयां बोलणा कि हाउं जो हाए से हाए, तैं तिनाखे बोलणा कि जिने हाउं पेजी राख्या से तुसारे बजुर्ग अब्राहम, इसहाक ओर याकूबा रा परमात्मा यहोवा ए। ओर हमेशा तक तेसरा येई नाओं रौणा।”

मूसा फिरौना गे जाणे ते डरो था क्योंकि से रुकी-रुकिके बोलो था, इजिखातर परमात्मा ने मूसा रा पाई, हारून, तेसरी मदद करने खातर पेज्या।