10. परमात्मा ने मिस्र देशा बिचे दस खतरनाक महामारिया पेजिया
परमात्मा ने मूसा ओर हारूना खे चेतावनी दिती कि फिरौन जिद्दी हुई जाणा। जेबे स्यो फिरौना गे गए तो तिनाने बोल्या, “इस्राएला रा परमात्मा इयां बोलोए, “मेरे लोकाखे जाणे दे!” पर फिरौना ने तिनारी गल्ल नई सुणी, ओर फिरौना ने इस्राएली लोकाखे आजाद करने रे बजाए स्यो ओर बी जादा मुश्किल काम करने खातर मजबूर करते।
फिरौन इस्राएली लोकाखे आजाद करने ते लगातार इन्कार करदा रया, इजिखातर परमात्मा ने मिस्र देशा बिचे दस खतरनाक माहामारिया पेजिया। इना माहामारिया रे जरिए, परमात्मा ने फिरौना खे दखाया कि हाउं तादें ओर मिस्र देशा रे देवतेया ते कितना जादा शक्तिशाली ए।
परमात्मा ने नील नदी रा पाणी खुना बिचे बदलता, पर फिरौना ने तेबे बी इस्राएली लोक जाणे नी दिते।
परमात्मा ने पूरे मिस्र देशा बिचे मेंढक पेजे। फिरौना ने मेंढका खे दूर करने खातर मूसा गे विनती किती। जेबे फिरौना ने देख्या कि सारे मेंढक मरिगे तो तिने आपणा मन ओर बी जादा कठोर करिला ओर इस्राएली लोक मिस्र देशा बिचे ते निकलने नी दिते।
इजिखातर परमात्मा ने मिस्र देशा बिचे छोटी-छोटी काटणे वाली माखिया री माहामारी पेजी। ओर तेथे बाद तिने खून चूसणे वाली माखिया री माहामारी पेजी। फिरौना ने मूसा ओर हारून बुलाए ओर तिनाखे बोल्या कि अगर तुसे ये माहामारी दूर करती तो मैं एस्राएली लोक मिस्र देशा बिचे ते आजाद करी देणे। जेबे मूसा ने परमात्मा गे प्रार्थना किती तो परमात्मा ने मिस्र देशा बिचे ते खून चूसणे वाली माखिया री माहामारी दूर करती। पर फिरौना ने आपणा मन फेर कठोर करिला ओर तिने इस्राएली लोक जाणे नी दिते।
तेथे बाद परमात्मा ने मिस्री लोका रे सारे पालतू जानवर बमार करते ओर मर जाणे दिते। पर फिरौना रा मन तेबे बी कठोर रया ओर तिने इस्राएली लोक जाणे नी दिते।
तेबे परमात्मा ने मूसा खे बोल्या, कि माटिया बिचे राख मिलाइके तिजिखे फिरौना रे सामणे हव्वा बिचे उड़ा। जेबे मूसा ने एड़ा किता तो मिस्री लोका रे शरीरा पादें पीड़दायक फोड़े निकलने लगे, पर इस्राएली लोकाखे कुछ बी नी हुआ। परमात्मा ने फिरौना रा मन कठोर करता, ओर फिरौना ने इस्राएली लोक जाणे नी दिते।
तेथे बाद, परमात्मा ने बड़े-बड़े ओले बरसाए ओर मिस्री लोका री सारी फसल नष्ट करती ओर जो कोई बारे निकलया से परमात्मा ने खत्म करता। फिरौना ने मूसा ओर हारून बुलाए ओर तिनाखे बोल्या, “मैं पाप करी राख्या। तुसे इस्राएली लोक मिस्र देशा बिचे ते जाई सकोए।” तेबे मूसा ने परमात्मा गे प्रार्थना किती, ओर एकदम आसमाणा ते ओले बरसणे बंद हुइगे।
पर फिरौना ने फेर दोबारा पाप किता ओर तिने आपणा मन कठोर करिला। ओर इस्राएली लोक जाणे नी दिते।
तेबे परमात्मा ने पूरे मिस्र देशा बिचे टिड्डिया री माहामारी पेजी। इना टिड्डिया ने से सारी फसल खाइती जो ओलेया ने नष्ट नी किती थी।
फेर परमात्मा ने मिस्र देशा बिचे तीन दिन तक नेरा करता। ये नेरा इतना खतरनाक था कि मिस्री लोक आपणे करा ते बारे नी निकली सके। पर जेती इस्राएली लोक रओ थे तेती रोशनी थी।
इना नौ माहामारिया ते बाद बी, फिरौना ने इस्राएली लोक जाणे नी दिते। क्योंकि फिरौना ने परमात्मा री गल्ल नी सुणी, इजिखातर परमात्मा ने मिस्र देशा बिचे एक आखरी माहामारी पेजणे री योजना बणाई जेथे फिरौना रा मन बदलिगा।
निर्गमन अध्याय 5-10 बिचे ते एक बाईबला री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।