11. फसह त्योआर

परमात्मा ने मूसा ओर हारुन ये बोलणे खातर फिरौना गे पेजे कि इस्राएली लोकाखे जाणे दे। परमात्मा ने मूसा ओर हारूना रे जरिए फिरौना खे चेतावनी दिती कि अगर तैं इस्राएली लोक मिस्र देशा बिचे ते नी जाणे दिते, तो मैं मिस्री लोका रे जेठे बच्चे ओर तिनारे सब जानवरा रे जेठे बच्चे खत्म करी देणे। फिरौना ने ये सुणिके बी परमात्मा पादें परोसा नी किता ओर परमात्मा रा आदेश मानणे ते इन्कार करता।

परमात्मा पादें परोसा करने वाले हर एक आदमी रे जेठे पुता खे बचाणे खातर परमात्मा ने एक उपाय दिता। पर हर परिवारा खे एक शुद्ध-निर्दोष मेमने री बली चढ़ाणे पड़नी थी।

परमात्मा ने इस्राएली लोकाखे बोल्या कि तुसे मेमने रा खून आपणे करा रे दरवाजे पादें लगाई देयो ओर तेसी राती मेमने खे पुजिके बिना खमीर वाली रोटी साथे जल्दी-जल्दी खाई लेयो। ओर तेथे बाद मिस्र देश छाडणे खातर तैयार रयो।

इस्राएली लोका ने सब कुछ तियांई किता जियां परमात्मा ने तिनाखे आदेश दिता। आधी राती बिचे, परमात्मा हर एक जेठे पुता खे खत्म करदे हुए पुरे मिस्र देशा रिए हुंदा हुआ गया।

इस्राएली लोका रे हर करा रे दरवाजे पादें खून था लगयादा, इजिखातर परमात्मा ने स्यो कर छाडिते। ओर तिना करा बिचे सब लोक बचेदे थे। स्यो मेमने रे खुना रे कारण बचिगे थे।

पर मिस्री लोका ने परमात्मा पादें परोसा नी किता ओर परमात्मा रा आदेश नी मान्या। इजिखातर परमात्मा ने मिस्री लोका रे कर नष्ट करते। ओर मिस्री लोका रा हर एक जेठा पुत खत्म करता।

परमात्मा ने जेलखाने रे कैदिया रे जेठे पुता ते लेइके, फिरौना रे पुता तक, सब जेठे पुत खत्म करते। इजिखातर मिस्र देशा बिचे बहुत सारे लोक जोरा-जोरा साथे रोणे लगिरे थे।

तेबे तेसी राती, फिरौना ने मूसा ओर हारून बुलाए ओर तिनाखे बोल्या, “तुसे एसी समय एथे इस्राएली लोकाखे लेइके निकली जाओ!” मिस्र देशा रे लोका ने बी इस्राएली लोकाखे बोल्या कि तुसे मिस्र देशा बिचे ते निकली जाओ।