12. इस्राएली लोका रा मिस्र देशा ते बारे निकलना (निर्गमन)

इस्राएली लोक मिस्र देशा बिचे ते निकलिके बहुत खुश थे। स्यो एबे गुलाम नी थे, ओर एबे स्यो वादे रे देशा खे जाणे लगिरे थे! इस्राएली लोका ने जो कुछ बी मिस्री लोका ते माँगया तिनाने से सब कुछ दिता, जियां कि सोना चाँदी ओर कुछ किमती चिजा बी। दूजे देशा रे कुछ लोका ने परमात्मा पादें परोसा किता ओर जेबे इस्राएली लोक मिस्र देशा बिचे ते निकले तो स्यो बी तिनारे पीछे चल पड़े।

परमात्मा दिन के समय बिचे बादला रा खम्बा बणिके, ओर रात के समय बिचे आगी रा खम्बा बणिके मूसा, हारून ओर इस्राएली लोका रे आगे-आगे चलया। परमात्मा हमेशा तिनारे साथे था ओर यात्रा करदे समय तिनारा मार्गदर्शण करो था। तिनाखे सिर्फ इतना करना था कि परमात्मा रे पीछे चलणा था।

कुछ समय बाद, फिरौन ओर तेसरे लोका रा मन बी बदलिगा। स्यो इस्राएली लोकाखे दोबारा आपणे सेवादार बणाणा चाओ थे। इजिखातर तिनाने इस्राएली लोका रा पीछा किता। ये परमात्मा था जिने तिनारा मन बदलया। परमात्मा ने एड़ा इजिखातर किता क्योंकि परमात्मा चाओ था कि सब लोकाखे पता लगी जाओ कि यहोवा परमात्मा, फिरौन ओर मिस्री लोका रे सब देवतेया ते जादा शक्तिशाली ए।

जेबे इस्राएली लोका ने मिस्र देशा री सेना आउंदे हुए देखी तो तिनाखे पता लगया कि ये फिरौना री सेना ए, ओर लाल समुद्रा बिचे फसिगी। इस्राएली लोक बहुत जादा डरिगे ओर रोणे लगे कि, “आसे मिस्र देश कउं छाडया? एबे आसाखे मरने ते कोई नी बचाई सकदा।”

मूसा ने इस्राएली लोकाखे बोल्या, “डरना बंद करो! परमात्मा आज तुसा खातर आपी लड़ना ओर तिनेई तुसे बचाणे।” तेबे परमात्मा ने मूसा खे बोल्या, “इना इस्राएली लोकाखे लाल समुद्रा बिचे आगे जाणे खातर बोल।”

तेबे परमात्मा ने से बादला रा खम्बा इस्राएली लोका रे ओर मिस्री लोका रे बिचे खड़ा करता, ओर रात के समय से आगी रा खम्बा बणिगा। मिस्री लोक पूरी रात इस्राएली लोका रे नजदीक नी आई सके।

परमात्मा ने मूसा खे समुद्रा बिचे आपणा आथ आगे बढ़ाणे खातर बोल्या। फेर परमात्मा ने हव्वा साथे समुद्रा रा पाणी दाएं ओर बाएं तरफ करता, ओर समुद्रा रिए हुइके एक बाट बणिगी।

इस्राएली लोक समुद्रा रिए हुइके सुक्की जमीना बिचे आगे चलणे लगे, ओर तिनारे दोनो तरफ पाणी रिया दीवारा थिया।

तेबे परमात्मा ने से बादला रा ओर आगी खम्बा तेस बाटा बिचे ते उबे उठाइला। तेबे मिस्री लोका ने इस्राएली लोक बचिके जादें हुए देखे। मिस्री लोका ने तिनाखे पकड़ने खातर दोबारा तिनारा पीछा करना शुरू करता।

तेथे बाद एड़ा हुआ कि मिस्री लोका ने समुद्रा रे जरिए इस्राएली लोका रा पीछा किता, पर परमात्मा ने मिस्री लोक डराइते ओर तिनारे रथ अटकाइते। मिस्री लोक चिल्लाणे लगे, “नठो! इस्राएली लोका री तरफा ते परमात्मा लड़ने लगिरा!”

सारे इस्राएली लोक समुद्रा रे दूजी तरफ पौंचिगे। तेबे परमात्मा ने मूसा खे बोल्या कि पाणी पादें आपणा आथ दोबारा आगे बढ़ा। जेबे मूसा ने आपणा आथ आगे बढ़ाया, तो पाणी आपणी सामान्य स्थिति बिचे हुइगा ओर सारा पाणी मिस्री सेना पादें आइगा ओर सारी मिस्री सेना डूबिगी।

जेबे इस्राएली लोका ने देख्या कि सारे मिस्री लोक मरिगे तो तिनाने परमात्मा पादें परोसा किता। तिनाने परोसा किता कि मूसा परमात्मा री तरफा ते भविष्यद्वक्ता ए।

इस्राएली लोक इजिखातर बी बहुत खुश थे क्योंकि परमात्मा ने स्यो मरने ते ओर गुलाम हुणे ते बचाइले थे। एबे स्यो परमात्मा री अराधना करने खातर ओर तेसरे आदेशा रा पालन करने खातर आजाद थे। इस्राएली लोका ने आपणे आजाद हुणे री खुशी मनाणे खातर ओर परमात्मा री बडयाई करने खातर बहुत सारे गीत गाए क्योंकि परमात्मा ने स्यो मिस्री सेना ते बचाए थे।

परमात्मा ने इस्राएली लोकाखे हर साल एक फसह त्योआर मनाणे रा आदेश दिता, ये याद करने खातर कि कियां परमात्मा ने इस्राएली लोक मिस्री लोका रे गुलाम हुणे ते बचाए थे, एस त्योआरा खे फसह त्योआर बोल्या गया। एस फसह त्योआर मनाणे खातर तिनाखे एक शुद्ध-निर्दोष मेमने री बली चढ़ाणी थी, ओर से मेमना पुजिके से बिना खमीर वाली रोटी साथे खाणा था।