13. इस्राएली लोका साथे परमात्मा री वाचा
इस्राएली लोकाखे लाल समुद्रा रे पार ले जाणे ते बाद, परमात्मा तिनाखे बणा रिए हुइके सीनै नावां री एक पाड़िया पादें लइगा। ये सेई पाड़ी थी जेती मूसा ने जलदी हुई झाड़ी देखी थी। इस्राएली लोका ने तेस पाड़िया ते थाले आपणे तम्बू बणाए।
परमात्मा ने मूसा खे ओर सब इस्राएली लोकाखे बोल्या, “अगर तुसे हमेशा मेरा आदेश मानोगे ओर मेरी वाचा रा पालन करोगे, तो सब लोका बिचे ते तुसेई मेरे खास लोक ठैरने, ओर तुसे मेरी नजरी बिचे मेरे पुरोहिता रा राज्य ओर एक पवित्र बरादरी ठैरने।”
तीन दिन तक स्यो आपणे तन-मना खे शुद्ध करदे रए ताकि परमात्मा तिनागे आई सको। तेबे परमात्मा सीनै पाड़िया ते थाले उतरया। ओर जेबे से थाले आया तो भूकम्प हुआ, बिजली चमकी, काला बादल छाइगा, ओर नरसिंगे री जोरदार आवाज सुणाई देणे लगी। तेस पाड़िया पादें जाणे री इजाजत सिर्फ मूसा खे थी ओर मूसा पाड़िया पादें चढ़िगा।
तेबे परमात्मा ने इस्राएली लोका साथे एक वाचा बानी। तिने बोल्या, “हाउं तुसारा परमात्मा, यहोवा ए। से हाउंए जिने तुसे मिस्री लोका री गुलामी ते बचाए। तुसे मादें अलावा ओर केस बी देवते री आराधना नी करयो।”
“मूर्तिया बणाइके तिजिरी पूजा नी करयो क्योंकि हाउं, यहोवा, तुसारा एकमात्र सच्चा परमात्मा ए। तुसे मेरा नाओं गलत रीति ते नी लेयो, ओर सब्त वाला दिन पवित्र मानणे खातर याद राख्यो। तुसे छे दिन आपणा काम काज करयो, पर सातवाँ दिन तुसा खातर आराम करने रा ओर मेरी आराधना करने रा दिन हुणा।”
“तुसे आपणे आम्मा-पापा रा आदर करना। ओर केसरी हत्या नी करनी, केस साथे व्यबिचार नी करना, केसरी चोरी नी करनी, चुठ नी बोलणा। तुसे आपणे पड़ोसी री करवालिया ते, या तेसारे करा ते कोई बी चीज लेणे रा लालच नी करना।”
सब लोक तिना नियमा रा पालन करने खातर तैयार हुइगे जो नियम परमात्मा ने तिनाखे दिते थे। स्यो सिर्फ परमात्मा रे लोक बणने खातर ओर सिर्फ तेसरी आराधना करने खातर तैयार हुए।
परमात्मा ने इस्राएली लोकाखे एक बहुत बड़ा तम्बू बणाणे खातर बोल्या, एस तम्बू खे मिलाप वाला तम्बू बोल्या गया। परमात्मा ने तिनाखे अच्छी तरह बताया कि तुसे ये तम्बू कियां बणाणा, ओर तिजिरे आंदरे क्या-क्या चीजा राखणिया। परमात्मा ने तिनाखे तेस तम्बू बिचे दो कमरे बणाणे खातर ओर एक परदा लगाणे खातर बोल्या। जेस कमरे बिचे परमात्मा री उपस्थिति हुणी, तेस कमरे बिचे जाणे री इजाजत सिर्फ महापुरोहिता खे हुणी।
परमात्मा ने तिना लोकाखे बोल्या कि तेस मिलाप वाले तम्बू रे सामणे एक वेदी बणाओ। परमात्मा ने ये बी बोल्या कि जिने मेरी व्यवस्था रा नियम तोड़ना से एस वेदी पादें बली चढ़ाणे खातर एक जानवरा खे लेइके आओ। तेबे महापुरोहिता ने तेसरे पापा खातर तेस जानवरा री बली चढ़ाणी ओर तिने वेदी पादें मेरे खातर से जानवर बली रे रुपा चे फुकणा। तेस जानवरा रे खुना रे जरिए तेस आदमी रा पाप दूर हुणा। एस रीति ते, एबे परमात्मा ने से पाप नी देखणा। ओर तेथे बाद से आदमी परमात्मा री नजरी बिचे “शुद्ध” ठैरना। परमात्मा ने मूसा रा पाई हारून ओर हारुना रे वंशज आपणे पुरोहित बणाणे खातर चुणे।
तेबे परमात्मा ने ये दस आदेश पात्थरा री दो पटिया पादें लिखिके मूसा खे देइते। परमात्मा ने तिनाखे ओर बी बहुत सारे नियमा रा पालन करने खातर बोल्या। ओर तिना साथे ये वाचा बानी कि अगर तुसे इना नियमा रा पालन करोगे तो हाउं तुसाखे आशीष देउंगा ओर तुसारी रक्षा करुंगा। पर अगर तुसे इना नियमा रा पालन नी करोगे तो मै तुसाखे सजा देणी।
मूसा कई दिन तक सीनै पाड़िया पादें परमात्मा साथे गल्ला करदा रया। ओर लोक मूसा रे वापस आउणे रा इन्तजार करदे-करदे थकिगे। इजिखातर स्यो लोक हारुना गे सोना लेइके आए ओर तिनाने हारुना खे तेस सोने री मूर्ति बणाणे खातर बोल्या, ताकि स्यो परमात्मा री बजाए तेस मुर्तिया री आराधना करी सको। एस तरह तिनाने परमात्मा रे खिलाफ बहुत बड़ा पाप किता।
हारुना ने बछड़े रे आकारा री एक सोने री मूर्ति बणाई। फेर तिनाने तेस मुर्तिया री पूजा करनी शुरू करती ओर तिजिखे बली चढ़ाई! तिनारे एस पाप करने री वजह ते परमात्मा तिनाते बहुत गुस्सा हुआ। परमात्मा तिनाखे नष्ट करी देणा चाओ था। पर मूसा ने परमात्मा गे प्रार्थना किती कि इना लोकाखे मत मार। ओर तिने मूसा री प्रार्थना सुणी ओर स्यो लोक नष्ट नी किते।
तेबे मूसा सीनै पाड़िया ते उतरिके थाले आया। तिने से पात्थरा रिया दोनो पट्टिया आथा बिचे लेई राखिया थिया जिना पादें परमात्मा ने दस आदेश लिखी राखे थे। फेर जेबे मूसा ने से मूर्ति देखी। तो से इतना गुस्सा हुआ कि तिने दस आदेशा रिया दोनो पट्टिया तोड़तिया, क्योंकि जो कुछ तिना लोका ने किता, से परमात्मा रे दस आदेशा रे खिलाफ था।
फेर मूसा ने तेस मुर्तिया रा पिसिके बुरादा बणाइता, ओर तिने से बुरादा पाणी बिचे मिलाइके तिना लोकाखे पिलाइता। तिनारे पापा रे कारण परमात्मा ने तिना लोका पादें एक मुसीबत पेजी ओर तिना बिचे ते बहुत सारे लोक मरिगे।
जो पटिया मूसा ने तोड़िया थिया तिजिरी जैगा मूसा ने तिना दस आदेशा रिया नइया पट्टिया बणाइया। तेबे मूसा फेर पाड़िया पादें चढ़िगा ओर तिने परमात्मा गे प्रार्थना किती कि तिना लोकाखे माफ करदे। परमात्मा ने मूसा री प्रार्थना सुणी ओर तिना लोकाखे माफ करता। फेर मूसा दस आदेशा रिया नइया पट्टिया लेइके पाड़िया ते उतरिके थाले आया। तेबे परमात्मा ने सीनै पाड़िया ते लेइके वादे रे देशा तक सब इस्राएली लोका रा मार्गदर्शण किता।
निर्गमन अध्याय 19-34 बिचे ते एक बाईबला री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।