14. इस्राएली लोका रा चाली साल तक बणा बिचे भटकणा

इस्राएली लोकाखे सारे नियम बताणे ते बाद, परमात्मा ने सीनै पाड़िया ते आगे तिना लोका रा मार्गदर्शण किता। परमात्मा तिनाखे वादे रे देशा बिचे लई जाणा चाओ था जिजिखे कनान देश बी बोल्या जाओआ। परमात्मा बादला रा खम्बा बणिके तिनारे आगे-आगे चलया, ओर स्यो लोक तेसरे पीछे-पीछे चले।

परमात्मा ने अब्राहम, इसहाक ओर याकूबा साथे वादा किता था कि हाउं वादे रा देश तुसारे वंशजा खे देउंगा, पर एबे तेती बहुत सारी बरादरिया रे लोक बसिगे थे। तिनाखे कनानी लोक बोल्या जाओ था। ये कनानी लोक परमात्मा री आराधना नी करो थे ओर तेसरा आदेश नी मानो थे। स्यो चुठे देवतेया री पूजा करो थे ओर बहुत सारे बुरे काम बी करो थे।

परमात्मा ने इस्राएली लोकाखे बोल्या, “जेबे तुसे तेस वादे रे देशा बिचे जाओगे तो तेती रे सब कनानी लोका ते छुटकारा पाई लेयो। तुसे तिना साथे दोस्ती ना करयो ओर ना तिना साथे ब्या करयो। तुसे तिनारिया सब मुर्तिया नष्ट करी देयो। अगर तुसे मेरा आदेश नी मानोगे, तो तुसे मेरी बजाए तिनारे देवतेया री आराधना करने लगी जाणे।”

जेबे इस्राएली लोक कनान देशा री सीमा पादें पौंचे, तो मूसा ने इस्राएली लोका रे हर गोत्रा बिचे ते एक-एक करिके बारा मर्द चुणे। ओर तिनाखे कनान देशा रा भेद लेणे रा आदेश दिता ये जाणने खातर कि कनान केड़ा देश ए। मूसा ने तिनाखे कनानी लोका रा भेद लेणे खातर बी बोल्या ये जाणने खातर कि स्यो ताकतवर ए या नई।

तिना बारा मर्दा ने पूरे कनान देशा बिचे चाली दिना री यात्रा किती ओर फेर स्यो वापस आए। तिनाने लोकाखे बताया कि, “कनान बहुत उपजाऊ देश ए ओर तेती बहुत सारी फसल होई!” पर तिना बारा बिचे ते दस मर्दा ने बोल्या, “कनानी लोका रे नगर बहुत मजबूत ए ओर तेती रे बहुत लम्बे हटे-कट्टे लोक ए! अगर आसे तिना पादें हमला करुंगे तो तिनाने आसे पक्का हराई देणे ओर मारी देणे।”

तेबे एकदम कालेब, यहोशू ओर दूजे दो पाई बोलणे लगे, “ये सच्च ए कि कनानी लम्बे हटे-कट्टे ओर शक्तिशाली लोक ए, पर आसे तेबे बी तिनाखे हराई सकूंए! क्योंकि आसा खातर परमात्मा लड़ना!”

पर लोका ने कालेब ओर यहोशू री गल्ल नई सुणी। स्यो मूसा ओर हारुना पादें गुस्सा हुइगे ओर बोलणे लगे, “तुसे आसाखे एड़ी खतरनाक जैगा बिचे कउं लेइके आइरे? आसाखे मिस्र देशा बिचेई रौणा चइयो था। अगर आसे कनान देशा बिचे गए तो आसे युद्धा बिचे मारे जाणे, ओर कनानी लोका ने आसारी करवालिया ओर बच्चे गुलाम बणाई लेणे।” स्यो एक नया गुरु चुणने लगे ताकि से तिनाखे मिस्र देशा बिचे वापस लई जाओ।

जेबे तिना लोका ने इयां बोल्या तो परमात्मा बहुत गुस्सा हुइगा, ओर तिने मिलाप वाले तम्बू बिचे आइके बोल्या, “तुसे मेरे खिलाफ विद्रोह करी राख्या, इजिखातर तुसा सबी खे एस बणा बिचे भटकणा पड़ना। तुसा बिचे जो आदमी 20 साला रा ए या तेथे जादा उम्रा रा ए से तेती मरी जाणा ओर तिने कदी बी तेस देशा बिचे परवेश नी करना जो देश मैं तुसाखे देणा। तेस देशा बिचे सिर्फ कालेब ओर यहोशू ने परवेश करना।”

जेबे लोका ने परमात्मा इयां बोलदे हुए सुणया, तो स्यो दुखी हुए क्योंकि तिनाने पाप किता था। इजिखातर तिनाने कनान देशा रे लोका पादें हमला करने रा फैंसला किता। मूसा ने तिनाखे चेतावनी दिती कि तुसे कनान देशा बिचे नी जायो क्योंकि परमात्मा तुसारे साथे नी जाणा, पर तिनाने मूसा री गल्ल नई सुणी।

परमात्मा एस युद्धा बिचे तिनारे साथे नी गया था, इजिखातर कनानी लोका ने स्यो हराइते ओर तिना बिचे ते बहुत सारे लोक मारते। तेबे इस्राएली लोक कनान देशा बिचे ते वापस मुड़ी आए। आगले चाली साल तक स्यो बणा बिचे ओरे-पोरे भटकदे रए।

जेबे इस्राएली लोक चाली साल तक बणा बिचे भटकदे रए, तेबे परमात्मा ने तिनारी हर जरूरत पूरी किती। परमात्मा ने तिनाखे स्वर्गा ते रोटी दिती जिजिखे “मन्ना” बोल्या जाओआ। परमात्मा ने छोटे-छोटे बटेरू बी तिनारे डेरे बिचे पेजे ताकि तिनागे खाणे खातर माँस हो। परमात्मा ने इना चाली साला बिचे तिनारे टाले-जूते तक नी फटणे दिते।

परमात्मा ने तिनाखे पीणे खातर चट्टाना बिचे ते पाणी काडया। ये सब हुणे ते बाद इस्राएली लोका ने परमात्मा रे खिलाफ ओर मूसा रे खिलाफ शिकायत किती ओर कुड़कुड़ाए। फेर बी परमात्मा आपणे वादे पादें परोसे लायक रया, परमात्मा ने अब्राहम, इसहाक ओर याकूबा रे वंशजा खातर करने रा जो वादा किता था से तिने पूरा किता।

एक ओर समय था जेबे तिनागे पाणी नी था, परमात्मा ने मूसा खे बोल्या, “चट्टाना साथे गल्ला कर, ओर तिजी बिचे ते पाणी निकलना।” पर मूसा ने चट्टाना साथे गल्ल नी किती। इजिरी बजाए तिने चट्टाना पादें दो बार डंडी मारी। एड़ा करिके तिने परमात्मा रा आदर नी किता। सबी खे पीणे खातर चट्टाना बिचे ते पाणी तो निकलिगा, पर परमात्मा मूसा ते गुस्सा हुइगा। परमात्मा ने बोल्या, “तैं मेरा आदेश नी मान्या, इजिखातर एबे तूं वादे रे देशा बिचे परवेश नी हुई सकदा।”

जेबे इस्राएली लोक चाली साल तक बणा बिचे भटकी चुके थे, तेबे जिनाने परमात्मा रे खिलाफ विद्रोह किता था स्यो सब मरिगे। तेबे परमात्मा तिना लोकाखे फेर तेस वादे रे देशा बिचे लइगा। एबे मूसा बहुत बुडा हुइगा था, इजिखातर परमात्मा ने तिना लोका रा मार्गदर्शण करने खातर यहोशू चुणया। परमात्मा ने मूसा साथे ये वादा बी किता था कि एक दिन मैं तिना लोका गे मूसा जेड़ा एक भविष्यद्वक्ता पेजणा।

तेबे परमात्मा ने मूसा खे एक पाड़िया रे सिरे पादें जाणे खातर बोल्या ताकि से वादे रे देशा खे देखी सको। मूसा ने से वादे रा देश देख्या पर परमात्मा ने मूसा खे तिजी बिचे परवेश करने री इजाजत नी दिती। तेबे मूसा मरिगा, ओर इस्राएली लोका ने 30 दिन तक दुख मनाया। ओर मूसा री जैगा यहोशू तिना लोका रा मार्गदर्शण करने वाला बणिगा। क्योंकि तिने परमात्मा पादें परोसा किता ओर तेसरा आदेश मान्या।