15. वादे रा देश

एबे इस्राएली लोका रा कनान देशा बिचे परवेश करने रा समय आइगा था। तेस देशा बिचे यरीहो नावां रा एक नगर था। तिजिरी सुरक्षा खातर तिजिरे चारो तरफ मजबूत दीवारा थिया। यहोशू ने यरीहो नगरा रा भेद लेणे खातर तेती दो आदमी पेजे। तेस नगरा बिचे राहाब नावां री एक वेश्या ज्वाणस रओ थी। तेसाने ये दो भेदी छुपाए, ओर फेर बादाते तेसाने यरीहो नगरा ते बचिके निकलने बिचे तिनारी मदद किती। तेसाने एड़ा इजिखातर किता क्योंकि से परमात्मा पादें परोसा करो थी। तिना दो भेदी आदमिया ने राहाबा साथे वादा किता कि जेस समय इस्राएली लोका ने यरीहो नगर नष्ट करना तो तेस समय आसे तेरी ओर तेरे परिवारा री रक्षा करनी।

इस्राएली लोकाखे वादे रे देशा बिचे परवेश करने खातर यरदन नदी पार करनी थी। परमात्मा ने यहोशू खे बोल्या, “पुरोहिता खे पैले जाणे दे।” जेबे पुरोहिता ने यरदन नदी बिचे आपणे पैर राखे तो नदी बिचे पाणी रिया तेज धारा थमिगिया, ताकि इस्राएली लोक सुक्की जमीना रिए हुइके नदी ते पार जाई सको।

जेबे इस्राएली लोका ने यरदन नदी पार करिली तो परमात्मा ने यहोशू खे बोल्या कि यरीहो नगरा पादें हमला करने खातर तैयार रओ, हालाँकि यरीहो बहुत मजबूत नगर था। परमात्मा ने इस्राएली लोका रे पुरोहिता खे ओर सैनिका खे छे दिन तक यरीहो नगरा रे चारो तरफ एक बार चक्कर लगाणे खातर बोल्या। तेबे पुरोहिता ने ओर सैनिका ने एड़ाई किता।

परमात्मा ने ये बी बोल्या कि इस्राएल देशा रे चारो तरफ सात बार चक्कर लगाणा ए। तेबे पुरोहित आपणे नरसिंगे बजाओ, ओर सब लोक ऊची आवाजा बिचे जयजयकार करो। इजिखातर तिनाने एड़ाई किता।

तेबे यरीहो नगरा रे चारो तरफा रिया दीवारा टलिगिया! परमात्मा रे आदेशा रे अनुसार इस्राएली लोका ने यरीहो नगरा री हर एक चीज नष्ट करती। तिनाने सिर्फ राहाब ओर तेसारा परिवार छाडया, क्योंकि स्यो इस्राएली लोका रा हिस्सा बणिगे थे। जेबे कनान देशा बिचे रौणेवाले दूजे लोका ने सुणया कि इस्राएली लोका ने यरीहो नगर नष्ट करता, तो स्यो डरिगे कि इस्राएली लोका ने आसा पादें बी हमला करना।

परमात्मा ने इस्राएली लोकाखे आदेश दिता कि तुसे कनान देशा बिचे रौणे वाली केस बी बरादरिया साथे शान्ति रा समझौता नी करना। पर गिबोनियो नावां री एक कनानी बरादरी ने यहोशू गे चुठ बोल्या कि आसे कनान देशा ते दूर रौणे वाले लोक ए। तिनाने यहोशू गे इस्राएली लोका साथे शान्ति रा समझौता करने री विनती किती। यहोशू ओर इस्राएली लोका ने परमात्मा ते नी पुछया कि आसाखे क्या करना चइयो। इजिरे बजाए, तिनाने गिबोनी बरादरी साथे शान्ति रा समझौता करिला।

तीन दिन बाद, इस्राएली लोकाखे पता लगया कि गिबोनी लोक कनान देशा बिचेई रओए। इस्राएली लोक गुस्सा हुइगे क्योंकि गिबोनी लोका ने तिना साथे तोखा किता। पर तिनाने गिबोनी लोका साथे शान्ति रा समझौता बणाएदे राख्या क्योंकि से शान्ति रा समझौता परमात्मा रे सामणे किता गया था। तेबे कुछ समय बाद, कनान देशा बिचे रौणे वाली एक दूजी बरादरी, एमोरियो रे राजेया ने सुणया कि गिबोनी लोका ने इस्राएली लोका साथे शान्ति रा समझौता करिला, इजिखातर तिनाने आपणी-आपणी सेना कट्ठी करिके एक बड़ी सेना बणाई ओर गिबोनी बरादरी पादें हमला करता। गिबोनी लोका ने यहोशू गे एक समाचार पेज्या कि आसारी मदद कर।

ये समाचार सुणिके यहोशू ने इस्राएली लोका री सेना कट्ठी किती ओर गिबोनी लोका गे पौंचणे खातर स्यो पूरी रात चले। सबेरा तड़केई तिनाने एमोरियो री सेना चौंकाइती ओर तिना पादें हमला करता।

तेस दिना परमात्मा इस्राएली लोका खातर लड़या। परमात्मा ने एमोरियो री सेना कबराइती, ओर तिने बड़े-बड़े ओले बरसाइके बहुत सारे एमोरी सैनिक मारते।

परमात्मा ने सूरज बी आसमाणा बिचे एक जैगा खड़ा करता ताकि इस्राएली लोकाखे पूरा समय मिली सको ओर स्यो एमोरी सेना खे पूरी तरह ते हराई सको। तेस दिना, परमात्मा ने इस्राएली लोका खातर एक बड़ी जीत हांसिल किती।

जेबे परमात्मा ने एमोरियो री सेना हराई तो तेथे बाद, कनानी बरादरी रे बहुत सारे लोक इस्राएली लोका पादें हमला करने खातर कट्ठे हुए। पर यहोशू ओर इस्राएली लोका ने हमला करिके तिनारा सर्वनाश करता।

एस युद्धा ते बाद, परमात्मा ने इस्राएली लोकाखे सारा कनान देश देइता जिजिखे देणे रा वादा परमात्मा ने तिनारे बजुर्गा साथे किता था ओर स्यो तेस देशा बिचे अधिकारी बणिके रौणे लगे। तेबे परमात्मा ने इस्राएल देशा री सब सीमा तक शान्ति प्रदान किती।

जेबे यहोशू बुडा हुइगा तो तिने इस्राएल देशा रे सब लोक एक साथ बुलाए। तेबे यहोशू ने तिना लोकाखे याद कराया कि आसे तेस वाचा रा पालन करने रा वादा किता था जो वाचा परमात्मा ने आसा साथे सीनै पाड़िया पादें बानी थी। तिना लोका ने परमात्मा रे प्रति परोसे लायक रौणे रा ओर तेसरी व्यवस्था रा पालन करने रा वादा किता।