16. छुड़ाणे वाले

यहोशू रे मरने ते बाद, इस्राएली लोका ने परमात्मा रे आदेशा रा ओर नियमा रा पालन नी किता, ओर तिनाने वादे रे देशा बिचे बचे हुए कनानी लोक बारे नी काडे। इस्राएली लोका ने आपणे सच्चे परमात्मा, यहोवा खे छाडिके कनानी देवतेया री पूजा करनी शुरू करती। इस्राएली लोका गे कोई राजा नी था, इजिखातर जेसके जो ठीक लगया तिने सेई किता।

परमात्मा रा आदेश ना मानणे रे कारण इस्राएली लोका ने एक तरीका शुरू करता जो कई बार दोहराया गया। ये तरीका एस तरह चलया: कुछ साल तक इस्राएली लोक परमात्मा रा आदेश नी मानो थे, तेबे परमात्मा तिनाखे तिनारे दुशमणा रे जरिए हराइके सजा देयो था। ये दुशमण इस्राएली लोका ते सब कुछ लूटिलो थे, ओर तिनारी जायदात नष्ट करिदो थे, ओर तिना बिचे ते बहुत सारे इस्राएली लोकाखे मारिदो थे। फेर जेबे इस्राएली लोका रे दुशमण कई साल तक तिना पादें अत्याचार करो थे, तेथे बाद इस्राएली लोक आपणे पापा रा पछतावा करो थे ओर परमात्मा गे प्रार्थना करो थे कि आसाखे बचा।

हर बार जेबे इस्राएली लोक पछ्तावा करो थे तो परमात्मा तिनाखे बचाओ था। से एक छुड़ाणे वाले रे जरिए एड़ा करो था- एक एड़ा आदमी जो इस्राएली लोका रे दुशमणा रे खिलाफ लड़ो था ओर तिनाखे हराओ था। तेबे देशा बिचे शान्ति हो थी ओर से छुड़ाणे वाला अच्छी रीति ते तिना पादें शासन करो था। परमात्मा ने तिना लोकाखे बचाणे खातर बहुत सारे छुड़ाणे वाले पेजे। परमात्मा ने नजदीक वाली एक दुशमण बरादरी, मिघानियो खे इजाजत दिती कि इस्राएली लोकाखे हराओ।

मिघानी लोका ने सात साल तक इस्राएली लोका री फसल लूटी। इस्राएली लोक बहुत जादा डरिगे थे, ओर स्यो गुफा बिचे छुपी जाओ थे ताकि मिघानी लोक तिनाखे टोली ना सको। आखिरकार, तिनाने परमात्मा पुकारया कि आसाखे बचा।

गिदोन नावां रा एक इस्राएली आदमी था। एक दिन, से एक गुप्त जैगा बिचे कणक चाड़ने लगिरा था ताकि मिघानी लोक तिजिखे चुराई ना सको। यहोवा परमात्मा रे स्वर्गदूता ने गिदोना गे आइके तेसके बोल्या, “ए सुरवीर सुरमा, परमात्मा तेरे साथ ए। जा ओर इस्राएली लोकाखे मिघानी लोका ते बचा।”

गिदोना रे पापे ने मुर्तिया रे सामणे बली चड़ाणे खातर एक वेदी बणाई थी। सबी ते पैले परमात्मा ने गिदोना खे से वेदी तोड़ने खातर बोल्या। पर गिदोन लोका ते डरो था, इजिखातर तिने रात हुणे रा इन्तजार किता। तेबे गिदोना ने तेस वेदी रे तोड़िके टुकड़े-टुकड़े करते। तिने परमात्मा खातर एक नई वेदी बणाई ओर तिजी पादें परमात्मा खातर बली चढ़ाई।

आगली सबेरा लोका ने देख्या कि किने वेदी तोड़िके टुकड़े-टुकड़े करती, इजिखातर लोक बहुत गुस्सा हुए। जेबे तिनाखे पता लगया कि ये गिदोना ने तोड़ी राखी तो स्यो तेसके मारने खातर तेसरे करे गए, पर गिदोना रे पापे ने बोल्या, “तुसे कउं आपणे देवते री रक्षा करने री कोशिश करने लगिरे? अगर से देवता ए तो तेसके आपणी रक्षा आपी करने दो!” तिने एड़ा बोल्या इजिखातर लोका ने गिदोन नई मारया।

तेबे इस्राएली लोकाखे लुटणे खातर मिघानी लोक फेर आए। स्यो इतने सारे थे कि तिनारी गिणती बी नी किती जाई सको थी। गिदोना ने तिनारे खिलाफ लड़ने खातर इस्राएली लोक एक साथ बुलाए। गिदोना ने परमात्मा ते दो नसाणा री माँग किती ताकि तेसके परोसा हुई जाओ कि परमात्मा सच्चेई तेसके इस्राएली लोकाखे बचाणे खातर बोलणे लगिरा।

पैले नसाणा खातर, गिदोना ने पेडा री उन जमीना पादें राखिके परमात्मा खे बोल्या कि सबेर कि ओस सिर्फ एस पेडा री उना पादें पड़ो ओर जमीना पादें ना पड़ो। परमात्मा ने एड़ाई किता। आगली राती, तिने परमात्मा खे बोल्या कि जमीन गीली हुई जाओ पर पेडा री उन सुक्की रओ। परमात्मा ने फेर एड़ाई किता। इना दो नसाणा रे कारण, गिदोना ने परोसा किता कि परमात्मा सच्चेई चाओए कि हाउं इस्राएली लोकाखे मिघानी लोका ते बचाऊँ।

तेबे गिदोना ने सैनिक आपिगे बुलाए ओर 32,000 सैनिक आए। पर परमात्मा ने तेसके बोल्या कि ये बहुत जादा ए। तेबे गिदोना ने 22,000 सैनिक करा खे वापस पेजिते जो लड़ने ते डरो थे। परमात्मा ने गिदोना खे बोल्या कि ये सैनिक एबु बी बहुत जादा ए। इजिखातर गिदोना ने 300 सैनिका खे छाडिके बाकी सब सैनिक करा खे पेजिते।

तेसी राती परमात्मा ने गिदोना खे बोल्या, “मिघानी लोका रे तम्बू बिचे जा ओर तिनाखे गल्ला करदे हुए सुण। जेबे तैं सुणना कि स्यो क्या गल्ला करने लगिरे तेबे तूं तिना पादें हमला करने ते नी डरना।” इजिखातर तेसी राती, गिदोन थाले तिनारे तम्बू बिचे गया ओर गिदोना ने एक मिघानी सैनिक आपणे दोस्ता खे से गल बतादें हुए सुणया जो तिने सुपने बिचे देखी थी। तेस सैनिका रे दोस्ता ने बोल्या, “एस सुपने रा मतलब ये कि गिदोना री सेना ने मिघानी सेना हराई देणी!” जेबे गिदोना ने ये सुणया तो तिने परमात्मा री स्तुति किती।

तेबे गिदोन आपणे सैनिका गे वापस आया ओर तिने हर सैनिका खे एक-एक नरसिंगा, एक-एक माटिया रा पांडा, ओर एक-एक मशाल दिती। तिनाने से तम्बू केरिला जेती मिघानी सैनिक सौणे लगिरे थे। गिदोना रे 300 सैनिका ने आपणिया मशाला माटिया रे पांडे साथे टकी राखिया थिया इजिखातर मिघानी लोक तिना मशाला री रोशनी नी देखी सके।

तेबे गिदोना रे सैनिका ने एक साथ आपणे-आपणे माटिया रे पांडे तोड़े ओर अचाणक मशाला बिचे ते आगी री रोशनी चमकी। गिदोना रे सैनिका ने आपणे-आपणे नरसिंगे बजाए ओर नारा लगाणे लगे, “यहोवा री तलवार ओर गिदोना री तलवार!”

परमात्मा ने मिघानी लोक कबराइते, इजिखातर स्यो एक-दूजे खे मारने-काटणे लगे। तेसी समय गिदोना ने बाकी इस्राएली लोक बी तिनारे करा ते बुलाइले ताकि स्यो मिघानी लोका रा पीछा करने बिचे तिनारी मदद करी सको। तिनाने बहुत सारे मघानी लोक खत्म करते ओर बाकी जो बचे स्यो इस्राएल देशा ते बारे खदेड़ते। तेस दिना 1,20,000 मिघानी लोक मारे गए। एस तरह परमात्मा ने इस्राएल देश बचाया।

स्यो लोक गिदोना खे आपणा राजा बणाणा चाओ थे, पर गिदोना ने तिनाखे एड़ा नी करने दिता, पर तिने तिनाते से सोने रे ज्योर माँगे जो तिनाने मिघानी लोका ते लुटे थे। तिना लोका ने गिदोना खे बहुत सारा सोना दिता।

तेबे गिदोना ने तेस सोने ते एक खास टाले रा जोड़ा बणाया जेड़ा महापुरोहित पैनी राखो थे। पर लोका ने एक मुर्तिया री तरह तेसरी पूजा करनी शुरू करती। तेबे परमात्मा ने फेर इस्राएली लोकाखे सजा दिती क्योंकि तिनाने मुर्तिया री पूजा किती थी। परमात्मा ने तिनाखे हराणे खातर तिनारेई दुशमण तैयार किते। आखिरकार तिनाने मदद लेणे खातर फेर परमात्मा गे प्रार्थना किती, ओर परमात्मा ने तिनाखे बचाणे खातर तिनागे एक छुड़ाणे वाला पेज्या।

येई गल्ल कई बार हुई: इस्राएली लोका ने पाप करना, परमात्मा ने तिनाखे सजा देणी, तिनाने पछ्तावा करना, परमात्मा ने तिनाखे छुड़ाणे खातर कोई पेजी देणा। कई साल तक, परमात्मा ने बहुत सारे छुड़ाणे वाले पेजे जिनाने इस्राएली लोक तिनारे दुशमणा ते बचाए।

आखिरकार, तिना लोका ने दूजे देशा री तरह परमात्मा ते आपी खातर एक राजा री माँग किती। स्यो एक एड़ा राजा चाओ थे जो लम्बा ओर ताकतवर हो, ओर युद्धा बिचे तिनारा मार्गदर्शण करी सको। परमात्मा खे तिनारी ये गल्ल पसंद नी आई, पर परमात्मा ने तिनाखे तेड़ाई राजा दिता जेड़ी तिनाने माँग किती थी।