17. दाऊदा साथे परमात्मा री वाचा

शाऊल इस्राएल देशा रा पैला राजा था। से लम्बा ओर सुंदर था, जेड़ा राजा इसराएली लोक चाओ थे तिनाखे तेड़ाई मिलया। इस्राएल देशा पादें शासन करने ते पैले कुछ साल तक शाऊल एक अच्छा राजा था। पर बादाते से एक दुष्ट आदमी बणिगा ओर तिने परमात्मा रे आदेशा रा पालन नी किता, इजिखातर परमात्मा ने तेसरी जैगा दूजा राजा चुणया।

परमात्मा ने एक जवान इस्राएली आदमी चुणया जेसरा नाओं दाऊद था ताकि से शाउला री जैगा राजा बणी सको। दाऊद बैतलहम नगरा रा एक चरवाहा था। से आपणे पापे रिया पेडा चारया करो था, तिने एक बार शेर ओर एक बार भालू मारया था क्योंकि तिनाने तेसरी पेडा पादें हमला किता था। दाऊद नरम स्वभाव वाला एक तर्मी आदमी था। तिने परमात्मा पादें परोसा किता ओर तेसरा आदेश मान्या।

जेबे दाऊद एक जवान आदमी था, तो तिने लम्बे-चौड़े फलिस्तीन सैनिक गोलियता रे खिलाफ लड़ाई किती थी। गोलियत एक बहुत ताकतवर सैनिक था। ओर लगभग तीन मीटर लम्बा था! पर परमात्मा ने गोलियता खे मारने खातर ओर इस्राएल देशा खे बचाणे खातर दाऊदा री मदद किती। तेथे बाद, दाऊदा ने इस्राएल देशा रे दुशमणा पादें कई बार जीत हांसिल किती। दाऊद एक बड़ा सैनिक बणिगा, ओर तिने बहुत सारे युद्धा बिचे इस्राएली लोका रा मार्गदर्शण किता। ओर लोका ने तेसरी बहुत तारीफ किती।

इस्राएली लोका ने दाऊदा साथे इतना प्यार किता कि शाऊल तेसते जलन करने लगया। शाऊल दाऊदा खे खत्म करना चाओ था, इजिखातर दाऊद तेसते ओर तेसरे सैनिका ते छुपणे खातर बणा बिचे नठिगा। एक दिन, जेबे शाऊल ओर तेसरे सैनिक दाऊदा खे टोलने लगिरे थे तो शाऊल एक गुफा बिचे गया। ये सेई गुफा थी जिचे दाऊद छुपिरा था, पर शाऊला ने देख्या निए। दाऊद शाऊला रे पीछे-पीछे तेसरे बहुत नजदीक चलिगा ओर तिने तेसरे टाले रा एक टुकड़ा बाडिला। बादाते जेबे शाऊल गुफा बिचे ते बारे निकलया तो दाऊदा ने तेसके से टाले रा टुकडा दखाया। तेबे शाऊला खे पता लगिगा कि दाऊद राजा बणने खातर माखे मारना नी चांदा ए।

कुछ समय बाद, शाऊल युद्धा बिचे मरिगा, ओर दाऊद इस्राएल देशा रा राजा बणिगा। दाऊद एक अच्छा राजा था, ओर लोका ने तेस साथे प्यार राख्या। परमात्मा ने दाऊदा खे आशीष दिती ओर से कामयाब बणाया। दाऊदा ने कई युद्ध लड़े, ओर परमात्मा ने इस्राएला रे दुशमणा खे हराणे बिचे दाऊदा री मदद किती। दाऊदा ने यरूशलेम सैर जितिके से आपणी राजधानी बणाई, ओर तेती रइके तिने शासन किता। दाऊद चाली साल तक राजा रया। एस समय बिचे इस्राएल देश बहुत जादा ताकतवर ओर अमीर बणिगा।

दाऊद एक मन्दर बणाणा चाओ था जेती सारे इस्राएली लोक परमात्मा री आराधना करी सको ओर तेसके बली चढ़ाई सको। इस्राएली लोक लगभग 400 साला ते मूसा रे बणाएदे मिलाप वाले तम्बू बिचे परमात्मा री आराधना करो थे ओर तेसके बली चढ़ाओ थे।

पर तेती नातान नावां रा एक भविष्यद्वक्ता था। परमात्मा ने से दाऊदा गे ये बोलणे खातर पेज्या: “तैं बहुत सारे युद्ध लड़े, इजिखातर तैं मेरे खातर ये मन्दर नी बणाणा। ये मन्दर तेरे पुता ने बणाणा। तेबे बी हाउं ताखे बहुत जादा आशीष देउंगा। तेरे एक वंशजा ने हमेशा खातर मेरे लोका पादें राजा री तरह शासन करना।” हमेशा खातर शासन करने वाला से दाऊदा रा एकमात्र वंशज मसीह ए। मसीह परमात्मा रा चुणयादा आदमी ए जिने संसारा रे लोक तिनारे पापा ते बचाणे।

जेबे दाऊदा ने नातान भविष्यद्वक्ता रा ये समाचार सुणया तो तिने परमात्मा रा धन्यवाद किता ओर तेसरी स्तुति किती। परमात्मा दाऊदा री इज्जत बढ़ाणे लगिरा था ओर तेसके बहुत सारी आशीष देणे लगिरा था। बेशक दाऊदा खे पता नी था कि परमात्मा ने ये गल्ला कदी पूरिया करनिया। एस समय आसाखे पता ए कि इस्राएली लोकाखे लगभग 1000 साल तक मसीह रे आउणे रा इन्तजार करना पड़ना।

दाऊदा ने कई साल तक आपणे लोका पादें शासन किता। तिने बिसवासा साथे परमात्मा रे आदेशा रा पालन किता ओर परमात्मा ने तेसके आशीष दिती। हालांकि तिने आपणे आखरी जीवना बिचे परमात्मा रे खिलाफ बहुत खतरनाक पाप किता था।

एक दिन दाऊदा रे सारे सैनिक दूर लड़ाई करने गइरे थे। तेबे दाऊद आपणे मैहला ते बारे आया, ओर तिने एक सुंदर ज्वाणस नहादें हुए देखी। पर तिने तेसाते आपणी नजर नी हटाई। दाऊद तेस ज्वाणसा खे नी जाणो था, पर तिने पता करिला कि तेस ज्वाणसा रा नाओं बतशेबा ए।

दाऊदा ने तेस ज्वाणसा खे आपणा बणाणे खातर आपणा एक सैनिक तेसागे पेज्या। दाऊदा ने तेस ज्वाणसा साथे नाजायज रिश्ता बणाया ओर तिने से वापस करा खे पेजती। कुछ समय बाद बतशेबा ने ये बोलिके दाऊदा गे समाचार पेज्या कि हाउं गर्बवती ए।

बतशेबा रा करवाला ऊरिय्याह नावां रा एक आदमी था। से दाऊदा रे अच्छे सैनिका बिचे ते एक था। तेस समय से युद्ध करने खातर बारे जाइरा था। दाऊदा ने ऊरिय्याह युद्धा बिचे ते वापस बुलाइला ओर तेसके आपणी करवालिया साथे रौणे खातर बोल्या। पर दूजे सैनिक युद्धा बिचे थे इजिखातर ऊरिय्याह ने करे जाणे ते इन्कार करता। दाऊदा ने ऊरिय्याह वापस युद्धा बिचे पेजिता, ओर योआब सेनापती खे बोल्या कि ऊरिय्याह खे युद्धा बिचे खतरनाक दुशमणा गे पेज ताकि से मारया जाओ। ओर तेथे बाद एड़ा हुआ कि ऊरिय्याह युद्धा बिचे मारया गया।

जेबे ऊरिय्याह युद्धा बिचे मरिगा तो तेथे बाद दाऊदा ने बतशेबा साथे ब्या करिला। बादाते तेसाने दाऊदा रे पुता खे जन्म दिता। दाऊदा ने जो पाप किता तेथे परमात्मा बहुत गुस्सा हुआ, इजिखातर परमात्मा ने नातान भविष्यद्वक्ता दाऊदा गे ये बताणे खातर पेज्या कि दाऊदा रा पाप कितना बुरा था। दाऊदा ने आपणा पाप मानिला ओर परमात्मा ने तेसके माफ करता। आपणे बचेदे जीवना बिचे, ओर आपणे मुश्किल समय बिचे बी दाऊद परमात्मा रे पीछे-पीछे चलया ओर तेसरा आदेश मान्या।

पर दाऊदा रा बच्चा मरिगा। एस तरह परमात्मा ने दाऊदा खे सजा दिती। एथे अलावा दाऊदा रे मरने तक, तेसरे आपणे परिवारा ने तेसरे खिलाफ लड़ाई किती, ओर दाऊद हर तरह ते कमजोर पड़िगा था। पर परमात्मा परोसे लायक था ओर परमात्मा ने एबु बी से किता जो करने रा तिने दाऊदा साथे वादा किता था, बेशक तिने परमात्मा रा आदेश नी मान्या। पर बादाते दाऊद ओर बतसेबा रे दूजी औलाद पैदा हुई ओर तिनाने तेसरा नाओं सुलैमान राख्या।