18. इस्राएल देशा रा दो राज्य बिचे बंटवारा

दाऊद राजा ने इस्राएल देशा पादें चाली साल तक शासन किता। तेथे बाद से मरिगा, ओर तेसरे पुत सुलैमाना ने इस्राएल देशा पादें शासन करना शुरू करता। परमात्मा ने सुलैमाना साथे गल्ल किती ओर तेसते पुछया, कि तूं सबी ते जादा क्या चाओआ जो हाउं तेरे खातर करूं। सुलैमाना ने परमात्मा खे बोल्या कि माखे बुदिमान बणाइदे। एस गल्ला ने परमात्मा खुश किता, इजिखातर परमात्मा ने सुलैमान संसारा रा सबी ते बुदिमान आदमी बणाइता। सुलैमाना ने बहुत सारिया गल्ला सिखिया ओर से शासन करने वाला एक बुदिमान आदमी था। परमात्मा ने से बहुत जादा अमीर बी बणाइता था।

सुलैमाना ने यरूशलेम सैरा बिचे से मन्दर बणाया जिजिरी योजना तेसरे पापे ने बणाई थी ओर तिजिखे बणाणे खातर समान कट्ठा किता था। एबे लोक मिलाप वाले तम्बू री बजाए मन्दरा बिचे परमात्मा री आराधना करो थे ओर तेस खातर बली चढ़ाओ थे। परमात्मा आइके मन्दरा बिचे हाजिर रया करो था, ओर तेती आपणे लोका साथे वास करो था।

पर सुलैमाना ने दूजे देशा री ज्वाणसा साथे प्यार किता। तिने लगभग 1,000 ज्वाणसा साथे ब्या करिला, ओर एड़ा करिके तिने परमात्मा रा अनादर किता! इना बिचे बहुत सारिया ज्वाणसा दूजे देशा ते आइया थिया ओर आपणे साथे आपणे देवतेया खे बी लयाइया थिया ओर तिनाने आपणे देवतेया री पूजा करनी जारी राखी। जेबे सुलैमान बुडा हुइगा तो तिने बी तिना ज्वाणसा रे देवतेया री पूजा किती।

एस कारण परमात्मा सुलैमाना ते गुस्सा हुइगा, ओर तिने सुलैमाना खे बोल्या कि मैं तेरे मरने ते बाद इस्राएल देशा रे दो राज्य बणाणे ओर तिनाखे सजा देणी।

सुलैमाना रे मरने ते बाद, तेसरा पुत रहबाम राजा बणया। इस्राएल देशा रे सब लोक तेसके आपणा राजा स्वीकार करने खातर एक साथ कट्ठे हुए। लोका ने रहबामा गे शिकायत किती कि सुलैमाना ने आसा ते बहुत मुशिकल मेहणत करवाई थी ओर बहुत सारी चुंगी वसूल किती थी। तिनाने रहबामा गे विनती किती कि तूं आसा ते कम काम करवाणा।

पर रहबामा ने तिनाखे गुस्से बिचे जवाब दिता, “तुसे बोलोए कि मेरे पापे ने यानी सुलैमाना ने आसा ते बहुत मुश्किल मेहणत करवाई। पर मैं तुसाते तेथे बी जादा मुश्किल मेहणत करवाणी, ओर मैं तुसाखे तेथे बी जादा कष्ट देणा।”

जेबे लोका ने रहबाम इयां बोलदे हुए सुणया तो तिना बिचे ते कइया ने तेसरा विरोध किता। तिना बिचे ते दस गोत्रा ने से छाडिता; एबे तेस साथे सिर्फ दो गोत्र बचे थे। ओर इना दोनो गोत्रा ने मिलिके आपी खातर यहूदा रा राज्य बणाइला।

बाकी दस गोत्रा ने यारोबाम नावां रा एक आदमी आपणा राजा बणाइला। ये गोत्र देशा रे उत्तर-पूर्व हिस्से बिचे थे। इना दस गोत्रा ने बी मिलिके आपी खातर इस्राएल राज्य बणाइला।

पर यारोबामा ने परमात्मा रा विरोध किता ओर लोका ते पाप करवाया। तिने आपणे लोका रे जरिए पूजा करने खातर दो मुर्तिया बणाइया। एबे स्यो यहूदा रे राज्य बिचे, यरूशलेम सैरा बिचे, ओर परमात्मा रे मन्दरा बिचे परमात्मा री आराधना करने खातर नी जाओ थे।

यहूदा रा राज्य ओर इस्राएल देशा रा राज्य दुशमण बणिगे ओर एक-दूजे रे खिलाफ लड़ने लगे।

इस्राएल देशा रे नए राज्य बिचे, जितने बी राजा आए स्यो सब के सब दुष्ट थे। इना बिचे ते बहुत सारे राजा इस्राएली लोका रे जरिए मारे गए जो आपिखे राजा बणाणा चाओ थे।

इस्राएल देशा रे सारे राजेया ने ओर सारे लोका ने मुर्तिया री पूजा किती। जेबे तिनाने एड़ा किता, तो तिनाने हर बार वेश्या ज्वाणसा साथे नाजायज रिश्ता राख्या, बल्कि कई बार तिनाने मुर्तिया रे आगे बच्या री बली बी चढ़ाई।

यहूदा राज्य रे राजे, दाऊदा रे वंशज थे। इना राजेया बिचे ते कई अच्छे आदमी थे जिनाने ईमानदारी साथे शासन किता ओर परमात्मा री आराधना किती। पर यहूदा राज्य रे जादातर राजे दुष्ट थे। तिनाने बुराई करिके शासन किता, ओर मुर्तिया री पूजा किती। बल्कि तिना बिचे ते कई राजेया ने चुठे देवतेया रे आगे आपणे बच्या री बली तक चढ़ाइती। यहूदा राज्य रे जादातर लोका ने परमात्मा रा विरोध किता ओर दूजे देवतेया री पूजा किती।