19. भविष्यद्वक्ता

परमात्मा हमेशा इस्राएली लोका गे भविष्यद्वक्ताओं खे पेजदा रओ था। भविष्यद्वक्ता परमात्मा ते शुभ समाचार सुणो थे ओर फेर तिजी लोकाखे बताओ थे।

जेबे आहाब इस्राएल देशा रा राजा था तो तेस समय एलिय्याह भविष्यद्वक्ता था। अहाब एक बुरा आदमी था। तिने परमात्मा री आराधना छाडिके चुठे देवतेया री पूजा करवाणे खातर लोक बेबस किते थे। इजिखातर एलिय्याह ने अहाबा खे बोल्या कि परमात्मा इना लोकाखे सजा देणेई वाला ए। तिने तेसके बोल्या, “जब तक मैं दोबारा बरखा हुणे खातर नी बोलणा तब तक इस्राएल देशा रे राज्य बिचे बरखा नी हुणी ओर ना ओस पड़नी।” एस गल्ला ते अहाबा खे इतना गुस्सा आया कि तिने एलिय्याह भविष्यद्वक्ता खे खत्म करने रा फैंसला किता।

इजिखातर परमात्मा ने एलिय्याह भविष्यद्वक्ता खे बोल्या कि तूं बणा बिचे जाइके अहाबा ते छुपी जा। एलिय्याह बणा बिचे तेस पाणी रे सोते गे गया जेती जाणे खातर परमात्मा ने तेसके बताया था। हर रोज सँझा-सबेरा, पँछी एलिय्याह खे रोटी ओर माँस लेइके आओ थे। एस पूरे समय बिचे, अहाब राजा ओर तेसरी सेना एलिय्याह खे टोलदे रए, पर स्यो तेसके टोली नी सके।

बरखा ना हुणे ते कुछ समय बाद से पाणी रा सोता सूकिगा। इजिखातर एलिय्याह नजदीक वाले एक देशा बिचे चलिगा। तेस देशा बिचे एक गरीब विधवा ज्वाणस थी जेसारे एक पुत था। आकाल पड़ने रे कारण तिनागे खाणे खातर अनाज लगभग खत्म हुई चुक्या था। पर फेर बी, तेस गरीब विधवा ज्वाणसा ने तेस समय एलिय्याह री मदद किती, इजिखातर परमात्मा ने तेस ज्वाणसा रिया ओर तेसारे पुता री जरूरता पूरी किती, एस कारण तिनागे आटा राखणे रा पांडा ओर तेला री कुप्पी कदी बी खली नी हुई। तेस पुरे आकाल वाले समय बिचे बी तिनागे खाणे खातर अनाज था। एलिय्याह तेती 3 साल तक रया।

साढ़े तीन साल बाद, परमात्मा ने एलिय्याह भविष्यद्वक्ता खे बोल्या कि हाउं फेर दोबारा बरखा करूंगा। परमात्मा ने एलिय्याह खे बोल्या कि तूं इस्राएल देशा रे राज्य बिचे जा ओर अहाबा राजा साथे मिल। इजिखातर एलिय्याह अहाबा गे गया। जेबे अहाबा ने से देख्या तो तिने बोल्या, “अच्छा तूं ए, मुसीबत पैदा करने वाला!” एलिय्याह भविष्यद्वक्ता ने जवाब दिता, मुसीबत पैदा करने वाला तो तूं ए! तूं सच्चे परमात्मा यहोवा री आराधना छाडिके चुठे बाल देवते री पूजा करने लगिरा। एबे ताखे इस्राएल राज्य रे सारे लोकाखे ओर भविष्यद्वक्ता खे कर्मल नावां री पाड़िया पादें लेइके आउणा ए।”

तेबे सारे इस्राएली लोक कर्मल पाड़िया पादें गए। स्यो मर्द बी आए जो बोलो थे कि आसे बाल देवते री शिक्षा देउं। ये बाल देवते रे भविष्यद्वक्ता थे। स्यो सब 450 थे। एलिय्याह भविष्यद्वक्ता ने लोकाखे बोल्या, “तुसे कब तक आपणे मन बदलदे रओगे? अगर परमात्मा यहोवा ए तो तेसरी आराधना करो! ओर अगर परमात्मा बाल देवता ए तो तेसरी पूजा करो।”

तेबे एलिय्याह भविष्यद्वक्ता ने बाल देवते रे भविष्यद्वकताओं खे बोल्या, “एक जानवरा री बली चढ़ाओ ओर तेसरा माँस एक वेदी पादें राखो, पर आग ना लगायो। तेथे बाद हाउं बी जानवरा रा माँस एक अलग वेदी पादें राखूंगा। तेबे अगर परमात्मा ने वेदी पादें आग गिराइती तो तुसे समझी जाणे कि सेई सच्चा परमात्मा ए।” तेबे बाल देवते रे भविष्यद्वक्ताओं ने एक बली तैयार किती पर आग नी लगाई।

तेबे बाल देवते रे भविष्यद्वकताओं ने बाल देवते गे प्रार्थना किती, “ए बाल देवता आसारी प्रार्थना सुण!” पूरा दिन तिनाने चिल्लाई-चिल्लाइके प्रार्थना किती बल्कि तिनाने आपणे-आपी खे चाकुआ साथे जख्मी करिला, पर बाल देवते ने कोई जवाब नी दिता ओर ना कोई आग गिराई।

बाल देवते रे भविष्यद्वकताओं ने बाल देवते गे प्रार्थना करने बिचे पूरा दिन बिताइता। फेर तिनाने प्रार्थना करनी बंद करती। तेबे एलिय्याह भविष्यद्वक्ता ने दूजे जानवरा रा माँस परमात्मा री वेदी पादें राखिता। तेथे बाद, तिने लोकाखे बोल्या कि तुसे पाणी रे 12 बड़े-बड़े पांडे तब तक एस माँसा पादें खिंडदे रओ जब तक कि माँस, लकड़िया, ओर वेदी रे नजदीक वाली जमीन गिली ना हुई जाओ।

तेबे एलिय्याह भविष्यद्वक्ता ने प्रार्थना किती, “ए यहोवा, अब्राहम, इसहाक, ओर याकूबा रे परमात्मा, आसाखे दिखा कि तूं इस्राएला रा परमात्मा ए ओर हाउं तेरा सेवादार ए। माखे जवाब दे ताकि इना लोकाखे पता लगी जाओ कि तूंई सच्चा परमात्मा ए।”

एकदम आसमाणा ते आग गिरी ओर तिजिने माँस, लकड़िया, पात्थर, माटी, सब कुछ फुकिता बल्कि तिजिने वेदी रे नजदीक वाला पाणी बी फुकिता। जेबे लोका ने ये सब देख्या, तो स्यो जमीना पादें गिर पड़े ओर बोलणे लगे, “ए यहोवा, सिर्फ तूंई सच्चा परमात्मा ए! सिर्फ तूंई सच्चा परमात्मा ए!”

तेबे एलिय्याह भविष्यद्वक्ता ने बोल्या, “बाल देवते रा एक बी भविष्यद्वक्ता बचिके नी जाणा चइयो!” इजिखातर लोका ने बाल देवते रे सब भविष्यद्वक्ता पकड़िले ओर तिनाखे तेथे अलग लइगे ओर स्यो खत्म करते।

तेबे एलिय्याह भविष्यद्वक्ता ने अहाब राजा खे बोल्या, “फटाफट आपणे करा खे नठी जा क्योंकि बड़ी तेज बरखा हुणे वाली ए।” एकदम बादल घणे हुइगे, ओर बरखा लगणी शुरू हुइगी। यहोवा ने सारा आकाल खत्म करता ओर लोकाखे दिखाइता कि सच्चा परमात्मा सिर्फ यहोवा ए।

एलिय्याह भविष्यद्वक्ता रे समय ते बाद, परमात्मा ने एलीशा नावां रा एक आदमी भविष्यद्वक्ता चुणया। परमात्मा ने एलीशा रे जरिए बहुत सारे चमत्कार किते। जिना बिचे एक चमत्कार नामान नावां रे आदमी साथे हुआ। नामान दुशमणा री सेना रा सरदार था, पर तेसके कोढ़ वाला रोग हुइगा था। नामाना ने एलीशा रे बारे चे सुणी राख्या था, इजिखातर तिने एलीशा गे आइके विनती किती कि माखे एस कोढ़ वाले रोगा ते ठीक करदे। एलीशा ने नमाना खे बोल्या कि यरदन नदी बिचे सात बार डूबकी लगा।

ये गल्ल सुणिके नामान गुस्सा हुइगा, ओर तिने एड़ा करने ते इन्कार करता, क्योंकि ये तेसके मुर्ख वाला काम लगो था। पर बादाते तिने आपणा मन बदली ला ओर जाइके यरदन नदी बिचे सात बार डूबकी लगाई। जेबे से सातवीं डूबकी लगाइके पाणी बिचे ते बारे निकलया, तो परमात्मा ने तेसरा कोढ़ वाला रोग ठीक करता।

परमात्मा ने इस्राएली लोका गे बहुत सारे भविष्यद्वक्ता पेजे। तिना भविष्यद्वक्ताओं ने लोकाखे बोल्या कि तुसे मुर्तिया री पूजा करना बंद करदो। इजिरी बजाए तुसे एक-दूजे साथे अच्छा व्यवहार करो, ओर एक-दूजे पादें दया करो। तिना भविष्यद्वक्ताओं ने लोकाखे चेतावनी दिती कि तुसे बुरे काम करने बंद करदो ओर तिजिरी बजाए परमात्मा रे आदेशा रा पालन करो। फेर तिने ये बी बोल्या अगर तुसे एड़ा नी किता तो परमात्मा ने तुसे दोषी ठैराइके तुसारा इन्साफ करना ओर तुसाखे सजा देणी।

जादातर समय, तिना लोका ने परमात्मा रे आदेशा रा पालन नी किता। तिनाने भविष्यद्वकताओं साथे बुरा व्यवहार किता बल्कि तिनाने कुछ भविष्यद्वक्ता खत्म करते। एक बार, तिनाने यिर्मयाह भविष्यद्वक्ता सुक्के कुँए बिचे सेटिता ओर तेती से मरने खातर छाडिता। यिर्मयाह कुँए रे थाले चिकड़ा बिचे धँसिगा। पर तेबे बिन्यामीन राजा खे तेस पादें दया आई ओर तिने आपणे सैनिका खे आदेश दिता कि यिर्मयाह खे मरने ते पैले कुँए बिचे ते बारे काडो।

भविष्यद्वकताओं ने परमात्मा री तरफा ते बोलणा जारी राख्या बेशक लोका ने तिना साथे नफरत किती। तिनाने लोकाखे चेतावनी दिती कि अगर तुसे आपणे पाप नी माने ओर आपणे पापा रा पछतावा नी किता तो परमात्मा ने तुसे नष्ट करी देणे। तिनाने लोकाखे परमात्मा रा से वादा याद कराया कि मसीह जल्दी आउणे वाला ए।