20. गुलामी ओर वादे रे देशा बिचे वापस मुड़ना

इस्राएल राज्य ने ओर यहूदा राज्य ने दोनो ने परमात्मा रे खिलाफ पाप किता। तिनाने से वाचा तोड़ती जो परमात्मा ने तिना साथे सीनै पाड़िया पादें बानी थी। परमात्मा ने बहुत सारे भविष्यद्वक्ता चेतावनी देणे खातर तिनागे पेजे, ताकि स्यो आपणे पाप मानो ओर दोबारा परमात्मा री आराधना करना शुरू करो। पर तिनाने भविष्यद्वक्ताओं री गल्ल मानणे ते इन्कार करता।

तेबे परमात्मा ने इस्राएल राज्य ओर यहूदा राज्य दोनो खे सजा दिती ओर तिनारे दुशमणा खे आदेश दिता कि तुसे दोनो राज्य नष्ट करदो। अश्शूर एक दूजा देश था जो बहुत शक्तिशाली हुइगा था। स्यो दूजे देशा रे प्रति बहुत निर्दयी बी थे। तिनाने आइके इस्राएल राज्य नष्ट करता। अश्शूरी लोका ने इस्राएल राज्य बिचे आइके बहुत सारे लोक खत्म करते, तिनाने जो चाया से लुटिला ओर देशा रे कई हिस्से आगी साथे फुकिते।

अश्शूरी लोका ने शिक्षा देणे वाले लोक, अमीर लोक, ओर एड़े कारीगर लोक जो किमती चीजा बणाई सको थे सब एक साथ कट्ठे किते ओर तिनाखे आपणे अश्शूर देशा बिचे लइगे। एबे इस्राएल देशा बिचे सिर्फ थोड़े जे गरीब इस्राएली लोक बचे।

फेर अश्शूरी लोक इस्राएल राज्य बिचे रौणे खातर विदेशी लोकाखे लेइके आए। तिना विदेशी लोका ने स्यो नगर दोबारा बणाए। ओर जो इस्राएली लोक तेती बचे थे विदेशिया ने तिना साथे ब्या करिला। इना लोका रे वंशजा खे सामरी बोल्या गया।

यहूदा राज्य रे लोका ने देख्या कि परमात्मा रा आदेश ना मानणे रे कारण ओर तेस पादें परोसा ना करने रे कारण कियां परमात्मा ने इस्राएल राज्य रे लोकाखे सजा दिती। पर तेबे बी तिनाने मुर्तिया री पूजा किती ओर कनानी देवतेया री मुर्तिया री पूजा बी किती। परमात्मा ने तिनाखे चेतावनी देणे खातर भविष्यद्वक्ता पेजे, पर तिनाने भविष्यद्वक्ता री गल्ल सुणने ते इन्कार करता।

अश्शुरी लोका रे जरिए इस्राएल राज्य नष्ट करने ते लगभग 100 साल बाद, परमात्मा ने बेबीलोन देशा रा राजा, नबूकदनेस्सर यहूदा राज्य पादें हमला करने खातर पेज्या। बेबीलोन एक शक्तिशाली देश था। यहूदा रा राजा, नबूकदनेस्सरा रा सेवादार बणने खातर ओर हर साल तेसके बहुत सारा धन देणे खातर तैयार हुइगा।

पर कुछ साल बाद, यहूदा रे राजा ने बेबीलोना रे खिलाफ तोखा किता। तेबे बेबीलोनी लोका ने वापस आइके यहूदा रे राज्य पादें हमला करता। तिनाने यरूशलेम सैरा पादें कब्जा करिला, मन्दर नष्ट करता, ओर सैर ओर मन्दरा रा खजाना लुटिके लइगे।

बेबीलोन देशा साथे तोखा करने रे कारण नबूकदनेस्सर राजा ने यहूदा रे राजा खे सजा दिती, ओर तेसरे सैनिका ने यहूदा राजा रा पुत तेसरे सामणे खत्म करता ओर फेर यहूदा रा राजा अंधा करता। तेथे बाद स्यो यहूदा रे राजा खे लइगे ताकि से बेबीलोन देशा री जेला बिचे मरी जाओ।

नबूकदनेस्सर ओर तेसरी सेना यहूदा राज्य रे लगभग सारेई लोकाखे पकड़िके बेबीलोन देशा बिचे लइगे, यहूदा राज्य बिचे तिनाने सिर्फ गरीब लोक छाडे ताकि स्यो तेती डोरुआ बिचे फसल उगाई सको। एस समय खे बधुआई बोल्या जाओआ ये से समय था जेबे परमात्मा रे लोक वादे रा देश छाडणे खातर बेबस किते गए थे।

बेशक परमात्मा ने आपणे लोकाखे तिनारे पापा रे कारण सजा दिती, पर तिनारे गुलाम हुणे ते बाद बी परमात्मा आपणे लोकाखे ओर आपणे वादे नी पुल्या। परमात्मा री नजर हर समय आपणे लोका पादें रओ थी ओर से आपणे भविष्यद्वक्ता रे जरिए तिना साथे गल्ला करदा रया। परमात्मा ने वादा किता कि सत्तर साल बाद, स्यो फेर वादे रे देशा बिचे वापस आई जाणे।

लगभग सत्तर साल बाद, फारसा रे राजा कुस्त्रू ने बेबीलोन देश हराया, इजिखातर बेबीलोन देशा रे बजाए फारस देशा ने कई देशा पादें शासन किता। इस्राएली लोकाखे एबे यहूदी बोल्या जाओ था। तिना बिचे ते बहुत सारे लोका ने आपणा जीवन बेबीलोन देशा बिचे बिताया। सिर्फ थोड़े-बहुत बुडे यहूदी थे जिनाखे यहूदा रा राज्य याद था।

फारसी लोक बहुत सामर्थी थे, तिनाने आपणे जीते दे लोका पादें दया किती। फारसी लोका रा राजा बणने ते थोड़े समय बाद, कुस्त्रू ने आदेश दिता कि कोई बी यहूदी जो यहूदा रे राज्य बिचे वापस जाणा चाओए, से फारसा बिचे ते निकलिके वापस यहूदा रे राज्य बिचे जाई सकोआ। बल्कि तिने तिनाखे मन्दर दोबारा बणाणे खातर धन बी दिता। गुलामी ते सत्तर साल बाद, थोड़े-बहुत यहूदी लोक यहूदा राज्य रे यरूशलेम सैरा बिचे वापस आए।

जेबे स्यो लोक यरूशलेम सैरा बिचे पौंचे तो तिनाने मन्दर ओर नगरा रे चारो तरफा री दीवार दोबारा बणाई। फारसी लोक एबु बी तिना पादें शासन करो थे पर स्यो एक बार फेर वादे रे देशा बिचे रौणे लगिरे थे ओर मन्दरा बिचे परमात्मा री आराधना करने लगिरे थे।