21. परमात्मा ने मसीह खे पेजणे रा वादा किता

जेबे परमात्मा ने संसार बणाया था तो तेसके पता था कि एक ना एक दिन माखे संसारा बिचे मसीह पेजणा पड़ना। परमात्मा ने आदम ओर हव्वा साथे वादा किता कि मैं एड़ा करना। परमात्मा ने बोल्या कि हव्वा ते एक वंशज पैदा हुणा जिने साँपा रा सिर कुचलना। परमात्मा रे बोलणे रा मतलब था। कि मसीह ने पूरी तरह ते शैतान हराई देणा। क्योंकि से शैतान ही था जिने साँपा रे रूपा बिचे आइके हव्वा खे तोखा दिता था।

परमात्मा ने अब्राहमा साथे वादा किता था कि तेरे जरिए संसारा री सब बरादरिया खे आशीष मिलणी। परमात्मा ने बोल्या कि, एक दिन मैं मसीह खे संसारा बिचे पेजिके ये वादा जरुर पूरा करना। मसीह ने संसारा री सब बरादरिया रे लोक तिनारे पापा ते छुड़ाणे।

परमात्मा ने मूसा साथे वादा किता था कि आउणे वाले समय बिचे मैं तेरी तरह एक दूजा भविष्यद्वक्ता पेजणा। ये भविष्यद्वक्ता मसीह हुणा। एस तरह परमात्मा ने फेर वादा किता कि मैं मसीह संसारा बिचे पेजणा।

परमात्मा ने दाऊदा साथे वादा किता था कि तेरा एक वंशज मसीह हुणा। से राजा हुणा ओर तिने परमात्मा रे लोका पादें हमेशा खातर शासन करना।

परमात्मा ने यिर्मयाह भविष्यद्वक्ता साथे गल्ल किती ओर बोल्या एक दिन मैं एक नई वाचा बानणी। पर से वाचा तेस पुराणी वाचा री तरह नी हुणी जो इस्राएली लोका साथे सीनै पाड़िया पादें बानी गई थी। जेबे मैं लोका साथे आपणी नई वाचा बानणी, तो मैं आपणे आपिखे तिना पादें परगट करना। हर एक आदमी ने मेरे साथे प्यार राखणा ओर मेरी व्यवस्था रा पालन करने री इच्छा राखणी। मैं आपणी व्यवस्था तिनारे मना बिचे लिखणी। स्यो मेरे लोक हुणे, ओर मैं तिनारे पाप माफ करने। से मसीह हुणा जिने तिना लोका साथे से नई वाचा बानणी।

परमात्मा रे भविष्यद्वकताओं ने ये बी बोल्या कि मसीह एक भविष्यद्वक्ता हुणा। एक भविष्यद्वक्ता से होआ जो परमात्मा रे वचन सुणोआ ओर फेर तिजी परमात्मा रे लोकाखे सिखाओआ। परमात्मा ने जेसके पेजणे रा वादा किता था से सिद्ध भविष्यद्वक्ता मसीह हुणा। मसीह ने परमात्मा रे वचन अच्छी तरह ते सुणने, ओर समझणे ओर फेर स्यो वचन अच्छी तरह ते परमात्मा रे लोकाखे सिखाणे।

इस्राएली पुरोहिता ने लोका खातर परमात्मा रे आगे बली चढ़ाणा जारी राख्या। ताकि परमात्मा तिनाखे तिनारे पापा री सजा ना देयो। पुरोहिता ने लोका खातर प्रार्थना बी किती। पर मसीह सिद्ध महापुरोहित हुणा जिने एस संसारा रे लोका रे पाप आपी पादें लेइके परमात्मा खातर आपणी बली चढ़ाणी। मतलब मसीह ने कदी बी पाप नी करना, ओर जेबे तिने आपणी बली चढ़ाणी, तो संसारा री कोई बी दूजी बली जरूरी नी हुणी।

राजा से होआ जो लोका पादें शासन करोआ ओर लोका रा इन्साफ करोआ, ओर कदी-कदी स्यो पाप बी करो। राजा दाऊदा ने सिर्फ इस्राएली लोका पादें शासन किता, पर राजा दाऊदा रे वंशज मसीह ने पूरे संसारा पादें हमेशा खातर शासन करना। तिने हमेशा सच्चाइया साथे शासन करना, ओर सही फैंसले लेणे।

परमात्मा रे भविष्यद्वकताओं ने मसीह रे आउणे ते पैले बहुत सारिया भविष्यवाणिया कितिया। मलाकी भविष्यद्वक्ता ने भविष्यवाणी किती कि मसीह रे आउणे ते पैले एक महान भविष्यद्वक्ता आउणा। से भविष्यद्वक्ता बहुत जादा खास हुणा। यशायाह भविष्यद्वक्ता ने भविष्यवाणी किती कि मसीह ने एक कुँवारी लड़की ते जन्म लेणा। ओर मीका भविष्यद्वक्ता ने भविष्यवाणी किती कि मसीह ने बैतलहम नगरा बिचे जन्म लेणा।

यशायाह भविष्यद्वक्ता ने बोल्या कि मसीह ने गलील जिले बिचे वास करना। जो लोक बहुत जादा दुखी ए मसीह ने तिनाखे शान्ति देणी। मसीह ने कैदी लोक बी आजाद करने। मसीह ने बमार, अंधे, गूंगे, टौणे, लंगड़े सब लोक चंगे करने।

यशायाह भविष्यद्वक्ता ने ये बी बोल्या कि लोका ने मसीह ते नफरत करनी ओर लोका ने से स्वीकार नी करना। दूजे भविष्यद्वकताओं ने बोल्या कि मसीह रे एक साथी ने मसीह खे तोखा देणा। जकर्याह भविष्यद्वक्ता ने बोल्या कि मसीह खे पकड़वाणे खातर तेसरे साथी ने लोका ते 30 चाँदी रे सिक्के लेणे। एथे अलावा, कुछ भविष्यद्वकताओं ने बोल्या कि लोका ने मसीह खत्म करी देणा, ओर तिनाने मसीह रे टाले आपी-पिछिए बांडणे खातर परचिया डालनिया।

भविष्यद्वकताओं ने ये बी बताया कि मसीह कियां मरना। यशायाह भविष्यद्वक्ता ने भविष्यवाणी किती कि लोका ने मसीह पादें थूकणा, तेसरा मजाक उड़ाणा, ओर तिनाने से कुटणा। तिनाने तेसरे आथा-पैरा बिचे छेद करने ओर तेसरी मौत बहुत जादा पीड़दायक हुणी जबकि तिने कोई बी पाप नी किता हुणा।

भविष्यद्वकताओं ने ये बी बताया कि मसीह ने कोई पाप नी करना। से सिद्ध हुणा। पर से लोका रे पापा खातर मारया जाणा। तेसरे मरने ते लोक परमात्मा खे जाणने। इजिखातर परमात्मा चाओआ कि मसीह मरो।

भविष्यद्वकताओं ने ये बी बताया कि परमात्मा ने मसीह मरेयादे बिचे ते जिउंदा करना। मसीह री मौत ओर जी उठणा ये बताओआ कि संसारा रे लोका साथे नई वाचा बानणी परमात्मा री योजना थी, ताकि से तिना लोकाखे बचाई सको जिनाने तेसरे खिलाफ पाप किता था।

परमात्मा ने भविष्यद्वकताओं खे मसीह रे बारे चे बहुत सारिया गल्ला बताइया, पर मसीह तिना भविष्यद्वकताओं बिचे ते केसरे बी समय बिचे नी आया। इना भविष्यवाणिया करने ते 400 साल बाद, ठीक समय पादें, परमात्मा ने मसीह एस संसारा बिचे पेजणा।