22. यूहन्ना रा जन्म

पुराणे समय बिचे, परमात्मा आपणे लोका साथे भविष्यद्वकताओं रे जरिए गल्ला करो था ताकि स्यो तेसरे लोकाखे मसीह रे बारे चे बताई सको। पर तेस समय ते लेइके फेर 400 साल बीतणे तक परमात्मा ने तिना साथे कोई गल्ल नी किती। तेबे परमात्मा ने जकर्याह नावां रे भविष्यद्वक्ता गे एक स्वर्गदूत पेज्या। जकर्याह ओर तेसरी करवाली एलीशिबा परमात्मा रा आदर करो थे। स्यो बहुत बुडे हुइगे थे, ओर तिनारे कोई औलाद पैदा नी हुई थी।

जो स्वर्गदूत परमात्मा ने पेज्या था तिने जकर्याह खे बोल्या, “तेरी करवाली एलीशिबा रे एक पुत पैदा हुणा। ओर तैं तेसरा नाओं यूहन्ना राखणा। से पवित्र आत्मा साथे परिपूर्ण हुणा, ओर तिने लोका रा मन मसीह री तरफ फेरना।” जकर्याह ने स्वर्गदूता ते पुछया, “ये गल्ल हाउं कियां सच्च मानिलूं? क्योंकि हाउं ओर मेरी करवाली औलाद पैदा करने खातर बहुत बुडे हुइगे दे?”

तेस स्वर्गदूता ने जकर्याह खे जवाब दिता, “ये शुभ समाचार सुणाणे खातर हाउं तागें परमात्मा ने पेजी राख्या। पर तैं मेरे पादें परोसा नी किता, इजिखातर एबे बच्चे रे जन्म लेणे तक तेरी जुबान बंद रौणी।” ओर एकदम तेसरी जुबान बंद हुइगी। तेबे से स्वर्गदूत तेथे चलिगा। तेथे बाद, जकर्याह करे वापस आया ओर तेसरी करवाली गर्बवती हुई।

जेबे एलीशिबा खे गर्बवती हुएदे छे महीने हुइगे, तो सेई स्वर्गदूत एलीशिबा री रिश्तेदार मरियमा रे सामणे परगट हुआ। मरियम कुँवारी थी तेसारा रिश्ता यूसुफ नावां रे एक आदमी साथे हुइरा था। स्वर्गदूता ने मरियमा खे बोल्या, “तेरे पादें परमात्मा री दया हुइरी ओर से तेरे साथ ए, तूं गर्बवती हुणी ओर तेरे एक पुत पैदा हुणा। ओर तैं तेसरा नाओं यीशु राखणा। से सर्वशक्तिमान परमात्मा रा पुत हुणा ओर तिने हमेशा खातर शासन करना।”

तेबे मरियमा ने जवाब दिता, “ये कियां हुई सकोआ, हाउं तो कुँवारी ए?” तेस स्वर्गदूता ने मरियमा खे समझाया, “पवित्र आत्मा तेरे पादें उतरनी, ओर परमात्मा री सामर्थ्य तेरे पादें बणिदी रौणी। इजिखातर से बच्चा पवित्र ओर परमात्मा रा पुत हुणा।” जो कुछ तेस स्वर्गदूता ने बोल्या मरियमा ने तिजी पादें परोसा किता ओर मरियमा ने बोल्या सुण हाउं प्रभु री सेवादारनी ए जेड़ा प्रभु चाओआ मेरे खातर तेड़ाई हो। तेबे से स्वर्गदूत तेथे चलिगा।

तेथे बाद, मरियमा ने जाइके एलीशिबा साथे मुलाकात किती। जियांई मरियमा ने एलीशिबा खे प्रणाम किता, एलीशिबा रा बच्चा तेसारे पेटा बिचे उछ्लया, ओर एलिशिबा पवित्र आत्मा साथे परिपूर्ण हुइगी। तिना दोनो ज्वाणसा रे जीवना बिचे जो परमात्मा ने किता तिजी देखिके बाकी ज्वाणसा बहुत खुश हुइया। मरियम एलीशिबा साथे तीन महीने तक रई ओर तेथे बाद से करा खे वापस चलिगी।

जेबे एलीशिबा रा बच्चे खे जन्म देणे रा समय आया तो तेसाने एक पुता खे जन्म दिता। जकर्याह ओर एलीशिबा ने तेस बच्चे रा नाओं यूहन्ना राख्या, जेड़ा कि तेस स्वर्गदूता ने तिनाखे आदेश दिता था। तेबे परमात्मा ने जकर्याह री जुबान खोलती ओर से दोबारा बोलणे लगया। जकर्याह ने बोल्या, “परमात्मा री स्तुति हो, क्योंकि तिने आपणे लोका पादें दया किती! ओर बोल्या ये जो मेरा पुत ए, ये सर्वशक्तिमान परमात्मा रा भविष्यद्वक्ता हुणा। इने लोकाखे बताणा कि कियां तिनारे पाप माफ हुई सकोए।”