23. यीशु रा जन्म

यीशु मसीह रे जन्म लेणे ते पैले एड़ा हुआ कि तेसरी आम्मा मरियमा रा रिश्ता यूसुफ नावां रे एक आदमी साथे हुआ। पर तिनारा ब्या हुणे ते पैले मरियम पवित्र आत्मा रे जरिए गर्बवती हुई। यूसुफ जो मरियमा रा हुणे वाला करवाला था से एक तर्मी आदमी था। जेबे तेसके ये गल्ल पता चली तो से मरियमा खे बदनाम नी करना चाओ था, ये सोचिके तिने चुपचाप तेसाखे छाडणे रा विचार किता। पर यूसुफा रे एड़ा करने ते पैले परमात्मा रे स्वर्गदूता ने तेसरे सुपने बिचे आइके तेस साथे गल्ल किती।

तेस स्वर्गदूता ने बोल्या, “ए यूसुफ, मरियमा खे आपणी करवाली बणाणे ते मत डर। मरियमा रे पेटा बिचे जो बच्चा ए से पवित्रआत्मा री तरफा ते ए। तेसाने एक पुता खे जन्म देणा ओर तैं तेसरा नाओं यीशु राखणा (जिजिरा मतलब ए, ‘यहोवा बचाओआ’), क्योंकि तिने लोक तिनारे पापा ते बचाणे।”

तेबे यूसुफा ने मरियमा साथे ब्या किता ओर तेसाखे आपणी करवाली बणाइके करे लेइके आया, पर यीशु रा जन्म हुणे तक यूसुफा ने मरियमा साथे कोई शारीरिक रिश्ता नी बणाया।

जेबे मरियमा रा बच्चे खे जन्म देणे रा समय नजदीक आया, तो तेसाने ओर यूसुफा ने बैतलहम नगरा खे जाणे री एक लम्बी यात्रा किती। तिनाखे तेती जाणा जरूरी था क्योंकि रोमी अधिकारी इस्राएल देशा बिचे रौणे वाले सब लोका री गिणती करना चाओ थे। स्यो चाओ थे कि सब लोक तेती जाओ जेती-जेती तिनारे बजुर्ग रओ थे। राजा दाऊदा रा जन्म बैतलहम नगरा बिचे हुआ था, ओर से मरियम ओर यूसुफ दोनो रा बजुर्ग था।

मरियम ओर यूसुफ बैतलहम नगरा बिचे गए, पर तेती ठैरने खातर तिनाखे डाँगर बानणे वाली जैगा ते अलावा ओर कोई जैगा नी मिली। सेई जैगा थी जेती मरियमा ने आपणे बच्चे खे जन्म दिता। मरियमा ने से बच्चा टाले बिचे लपेटिके चरनिया बिचे लेटाया क्योंकि तेती मरियमा खे रौणे खातर कोई अच्छी जैगा नी थी। तिनाने तेस बच्चे रा नाओं यीशु राख्या।

तेसी राती, तेती नजदीक वाले डोरू बिचे कुछ चरवाहे आपणी बहुत सारी पेडा री जुगाली करने लगिरे थे। एकदम एक चमकदार स्वर्गदूत तिनारे सामणे परगट हुआ, ओर स्यो डरिगे। तेस स्वर्गदूता ने बोल्या, “डरो मत, देखो हाउं तुसाखे एक शुभ समाचार सुणाउंए जो संसारा रे सब लोका खातर हुणा। आज दाऊद राजा रे बैतलहम नगरा बिचे तुसा खातर उद्धार करने वाला पैदा हुइरा ओर सेई मसीह प्रभु ए!”

तुसा खातर तेस बच्चे री ये पैछाण ए कि, “से तुसाखे टाले बिचे लिपटेयादा ओर चरनी बिचे सयादा मिलणा।” एकदम, आसमाण स्वर्गदूता साथे परिगा। ओर स्यो परमात्मा री स्तुति करने लगिरे थे। तिनाने बोल्या, “स्वर्गा बिचे विराजमान परमात्मा री बडयाई हो। तरती पादें तिना लोकाखे शान्ति मिलो, जिना पादें से किरपा करोआ!”

जेबे स्वर्गदूत चलिगे। तेबे स्यो चरवाहे बी आपणी पेडा खे छाडिके तेस बच्चे खे देखणे गए। एकदम स्यो तेस जैगा बिचे पौंचे जेती यीशु रा जन्म हुइरा था ओर तिनाखे से चरनी बिचे लेटयादा मिलया, जेड़ा कि तेस स्वर्गदूता ने बोल्या था। स्यो बहुत खुश थे। तेबे स्यो चरवाहे वापस आपणी पेडा गे चलिगे। ये सब कुछ देखी सुणिके तिनाने परमात्मा री स्तुति किती।

पूर्व दिशा रे एक देशा बिचे कुछ बुदिमान आदमी आए, जिनाखे तारेया रे बारे चे ज्ञान था। तिनाने आसमाणा बिचे एक बहुत बड़ा तारा देख्या। तिनाने बोल्या कि एस तारे रा मतलब ये कि यहूदी लोका रा एक नया राजा पैदा हुइरा। इजिखातर तिनाने तेस बच्चे खे देखणे खातर आपणे देशा बिचे ते यात्रा करने रा फैंसला किता। एक लम्बी यात्रा ते बाद, स्यो बैतलहम नगरा बिचे पौंचे ओर तेती तिनाखे से कर मिलया जेती यीशु ओर तेसरे आम्मा-पापा ठैरिरे थे।

जेबे इना बुद्धिमान आदमिया ने यीशु आपणी आम्मा री गोदी बिचे देख्या तो तिनाने घुटणे टेकिके तेसरी आराधना किती। तिनाने यीशु खे कुछ किमती तौफे दिते। फेर स्यो आपणे करा खे वापस चलिगे।