24. यूहन्ना ने यीशु खे बपतिस्मा दिता

जकर्याह ओर एलीशिबा रा पुत यूहन्ना, बड़ा हुइके एक भविष्यद्वक्ता बणिगा। यूहन्ना सुनसाण जैगा बिचे रया करो था, ओर टिड्डिया ओर जंगली शैत खाया करो था, ओर ऊँटा रे बाला ते बणेदे टाले पैन्या करो था।

बहुत सारे लोक यूहन्ना री गल्ला सुणने खातर तेसगे आए। यूहन्ना ने तिना लोकाखे बताया कि, “आपणे पाप मानिके परमात्मा ते माफी माँगो, क्योंकि स्वर्गा रा राज्य नजदीक ए!”

जेबे लोका ने यूहन्ना रा समाचार सुणया, तो तिना बिचे ते कइया ने आपणे पाप मानिके परमात्मा ते माफी माँगी, ओर यूहन्ना ने तिनाखे पाणी बिचे बपतिस्मा दिता। यूहन्ना खे देखणे खातर बहुत सारे तार्मिक गुरु बी आए, पर तिनाने आपणे पाप नी माने, ओर ना परमात्मा ते माफी माँगी।

यूहन्ना ने तार्मिक गुरुआ खे बोल्या, “ए साँपा री तरह जैहरिले लोको! आपणे पाप मानो ओर आपणा व्यवहार बदलो। एबे गल्ल एड़ी ए कि परमात्मा हर एक आदमी खे जिने आपणे पाप नी मानणे, तिनाखे सजा देणे खातर बिलकुल तैयार ए। ठीक तियांई जियां कोई डाली अच्छा फल ना देणे पादें आगी बिचे फुकी जाओई।” यूहन्ना ने से वचन पूरा किता जो यशायाह भविष्यद्वक्ता री कताबा बिचे लिख्यादा कि, “देख, मैं बहुत जल्दी तादें पैले आपणा शुभ समाचार देणे वाला पेजणा जिने तेरे खातर लोका रा मन तैयार करना।”

कुछ तार्मिक गुरुआ ने यूहन्ना ते पुछया कि क्या तूं मसीह ए। यूहन्ना ने जवाब दिता, “हाउं मसीह निए, पर से मादें बाद आउणे वाला ए। से इतना जादा सामर्थी ए कि हाउं तो तेसरे जूते रा पिथा खोलणे रे लायक बी निए।”

दूजे दिना यीशु यरदन नदी बिचे बपतिस्मा लेणे खातर यूहन्ना गे आया। जेबे यूहन्ना ने यीशु देख्या, तो तिने बोल्या, “देखो! ये परमात्मा रा मेम्ना ए जिने संसारा रे सारे पाप आपी पादें लेई लेणे।”

पर यूहन्ना ये बोलिके यीशु खे रोकणे लगया, “माखे तेरे आथा ते बपतिस्मा लेणे री जरूरत ए, ओर तूं बपतिस्मा लेणे खातर मागें आइरा।” पर यीशु ने बोल्या, “एबे तो ताखे माखे बपतिस्मा देणा चइयो, क्योंकि माखे एस तरीके ते परमात्मा री इच्छा पूरी करनी ए।” तेबे यूहन्ना ने यीशु खे बपतिस्मा दिता, जबकि यीशु ने कदी बी कोई पाप नी करी राख्या था।

बपतिस्मा लेणे ते बाद, जेबे यीशु पाणी बिचे ते बारे निकलया, तो परमात्मा री पवित्रआत्मा कबूतरा रे रूपा चे परगट हुई ओर थाले उतरिके यीशु पादें ठैरिगी। तेसी समय परमात्मा ने स्वर्गा बिचे ते बोल्या, “तूं मेरा प्यारा पुत ए। हाउं तेरे साथे प्यार करूंआ, ओर हाउं तादें बहुत खुश ए।”

परमात्मा ने यूहन्ना खे बोल्या था कि, “जेस पादें तूं पवित्रआत्मा खे उतरदे ओर ठैरदे देखोगा, सेई परमात्मा रा पुत मसीह ए, पुत ओर परमात्मा एकी ए। पर जेबे यूहन्ना ने यीशु खे बपतिस्मा दिता, तो तिने पिता परमात्मा पुता साथे गल्ल करदा हुआ सुणया, तिने पुत ओर परमात्मा देख्या, जो कि यीशु ए, ओर तिने पवित्रआत्मा यीशु पादें ठैरदी हुई देखी।”