25. शैताना ने यीशु री परीक्षा किती

यीशु रा बपतिस्मा हुणे ते तुरंत बाद, पवित्रआत्मा यीशु खे सुनसाण जैगा बिचे लइगी। यीशु चाली दिन ओर चाली रात तक सुनसाण जैगा बिचे रया। तेस समय बिचे तिने व्रत राखे ओर कुछ नी खाया-पीया, तेबे शैतान यीशु गे आया, ओर शैताना ने यीशु ते पाप करवाणे खातर तेसरी परीक्षा किती।

जेबे यीशु खे पुख लगी, तेबे शैताना ने परखणे खातर यीशु खे बोल्या, “अगर तूं परमात्मा रा पुत ए तो इना पात्थरा खे बोल कि रोटी बणी जा ताकि तूं तिजी खाई सको!”

पर यीशु ने शैताना खे बोल्या, “पवित्रशास्त्रा बिचे ये लिख्यादाए, “आदमी सिर्फ रोटिया तेई नी बल्कि परमात्मा रे हर वचना ते जिउंदा रौणा!”

तेबे शैतान यीशु खे मन्दरा रे सबी ते ऊचे वाले सिरे पादें लइगा। ओर यीशु खे बोल्या, “अगर तूं परमात्मा रा पुत ए तो आपिखे एथे थाले गिराइदे, क्योंकि पवित्रशास्त्रा बिचे लिख्यादाए कि, “परमात्मा ने ताखे बचाणे खातर आपणे स्वर्गदूत पेजणे ओर तिना स्वर्गदूता ने तूं आथा बिचे उठाई लेणा ताकि तेरे पैरा ते ठोकर तक ना लगो।”

पर यीशु ने से कुछ नी किता जो शैताना ने तेसके करने खातर बोल्या। इजिरी बजाए, यीशु ने शैताना खे बोल्या, “पवित्रशास्त्रा बिचे ये बी लिख्यादाए कि, “तूं आपणे परमात्मा री परीक्षा ना कर।”

फेर शैतान यीशु खे एक ऊची पाड़िया पादें लइगा ओर तेथे संसारा रे सारे राज्य दखाइके यीशु खे बोलणे लगया, “अगर तूं घुटणे टेकिके माखे प्रणाम करो ओर मेरी पूजा करो तो ये सब कुछ हाउं ताखे देई दूंगा।”

तेबे यीशु ने जवाब दिता, “ए शैतान मेरे सामणे ते दूर चली जा! क्योंकि पवित्रशास्त्रा बिचे लिख्यादाए कि, “तूं सिर्फ आपणे प्रभु परमात्मा रे सामणे प्रणाम कर ओर सिर्फ तेसरी आराधना कर।”

यीशु शैताना री परीक्षा बिचे नी पड़या, इजिखातर शैतान यीशु गे ते चलिगा। तेबे स्वर्गदूत आइके यीशु री सेवा करने लगे।