26. यीशु ने सेवा करनी शुरू किती

जेबे शैतान यीशु री परीक्षा लेई चुक्या तो तेथे बाद, यीशु वापस गलील जिले बिचे आया। येई से जैगा ए जेती यीशु रओ था। पवित्रआत्मा यीशु खे बहुत जादा सामर्थ्य देणे लगिरी थी, ओर तिने जैगा-जैगा बिचे जाइके लोकाखे शिक्षा दिती। सब यीशु रे बारे चे अच्छिया गल्ला बोलो थे।

फेर यीशु आपणे गावँ नासरत सैरा बिचे गया, ये से गावँ ए जेती तिने आपणा बचपण बिताया था। सब्त वाले दिन, यीशु यहूदी सभाघरा बिचे गया। तेती रे लोका ने तेसके यशायाह भविष्यद्वक्ता री कताब पढ़ने खातर दिती। तेबे यीशु ने कताब खोलिके तिजिरा एक भाग पढ़िके लोकाखे सुणाया।

तेबे यीशु ने ये वचन पढ़िके सुणाया, “परमात्मा ने माखे आपणी पवित्रआत्मा देई राखी ताकि हाउं कंगाल लोकाखे शुभ समाचार सुणाई सकूं। परमात्मा ने हाउं इजिखातर पेजी राख्या ताकि हाउं कैदिया खे आजाद करूं, ओर अंधे लोकाखे फेर नजर वापस पाणे रा प्रचार करूं, ओर जिनाखे दूजे लोक कुचलने लगिरे तिनाखे छुटकारा देउं। येई समय ए, जेबे परमात्मा ने आसा पादें दया करनी ओर आसारी मदद करनी।”

फेर यीशु बैठिगा। सब लोक तेसके त्याना साथे देखणे लगिरे थे। तिनाखे पता था कि पवित्रशास्त्रा रा जो वचन इने एबु पढ़या से मसीह रे बारे चे था। यीशु ने बोल्या, “जो वचन मैं तुसा खातर एबु पढ़या, से एस समय पूरा हुणे लगिरा।” सब लोक चौंकिगे थे। तिनाने बोल्या, “क्या ये यूसुफा रा पुत निए?”

तेबे यीशु ने बोल्या, “ये सच्च ए कि एक भविष्यद्वक्ता रा आपणे नगरा बिचे कदी आदर नी हुंदा, जो तिनारे नगरा बिचे पलया बढ़यादा हो। जेबे एलिय्याह भविष्यद्वक्ता रे समय बिचे, साढ़े तीन साल तक बरखा नी हुई ओर बरखा ना हुणे रे कारण सारे देशा बिचे आकाल पड़या, तो तेस समय इस्राएल देशा बिचे बहुत सारिया विधवा थिया, पर परमात्मा ने एलिय्याह इस्राएल देशा बिचे केस बी विधवा री मदद करने खातर नी पेज्या। इजिरे बजाए परमात्मा ने से सिदोन देशा री विधवा री मदद करने खातर पेज्या।”

यीशु ने ये बी बोल्या कि, “एलीशा भविष्यद्वक्ता रे समय बिचे, इस्राएल देशा बिचे बहुत सारे कोढ़ वाले रोगी थे। पर एलीशा ने तिना बिचे ते कोई बी चंगा नी किता। तिने सिर्फ इस्राएली दुशमणा रा सेनापति नामान, चंगा किता।” पर जो लोक यीशु खे सुणने लगिरे थे स्यो यहूदी थे। इजिखातर जेबे तिनाने यीशु इयां बोलदे हुए सुणया, तो स्यो तेस पादें गुस्सा हुए।

नासरत सैरा रे लोका ने यीशु पकड़िला ओर स्यो तेसके सभाघरा बिचे ते घसिटिके एक काड़ी पादें लइगे। ओर तिनाने से तेस काड़ी पादें ते थाले गिराणा चाया। पर यीशु भीड़ा बिचे ते अलग निकलिगा ओर नासरत सैर छाडिके चलिगा।

फेर यीशु गलील जिले रे सारे इलाके बिचे गया, ओर बहुत सारे लोक तेसगे आए। स्यो आपी साथे बहुत सारे बमार लोकाखे लयाए, तिना बमार लोका बिचे कुछ लोक विकलांग थे, कुछ अंधे थे, कुछ लंगड़े थे, ओर कुछ बैहरे ओर गूँगे थे, यीशु ने स्यो सब बमार लोक चंगे किते।

एथे अलावा, बहुत सारे एड़े लोक यीशु गे लयाए गए जिना बिचे दुष्टआत्मा थिया। यीशु ने दुष्टआत्मा खे तिना लोका बिचे ते बारे निकलने रा आदेश दिता। ओर स्यो दुष्टआत्मा तिना लोका बिचे ते बारे निकलिगिया ओर चिल्लाई-चिल्लाइके यीशु खे बोलणे लगिया, “तूं परमात्मा रा पुत ए!” ये देखिके सब लोक चौंकिगे, ओर तिनाने परमात्मा री स्तुति किती।

फेर यीशु ने बारा खास चेले चुणे जिनाखे तिने प्रेरित नाओं दिता। इना बारा खास चेल्या ने यीशु साथे यात्रा कितिया, ओर तेसते शिक्षा हांसिल किती।