27. दयालु सामरी आदमी री कहाणी

एक दिन जेबे यीशु लोकाखे शिक्षा देणे लगिरा था, तेबे तेती मूसा री व्यवस्था सिखाणे वाला एक आदमी यीशु री परीक्षा लेणे खातर यीशु गे आया, ओर बोलणे लगया, “ए गुरु, अनन्त जीवन पाणे खातर हाउं क्या करूं?” यीशु ने जवाब दिता, “परमात्मा री व्यवस्था बिचे क्या लिख्यादा, तूं तिजिखे कियां समझोआ?”

तेस आदमी ने बोल्या, “परमात्मा री व्यवस्था बिचे ये लिख्यादा कि आपणे परमात्मा साथे आपणे पूरे मन, प्राण, सामर्थ्य, ओर समझ-बुधि साथे प्यार राखो। ओर आपणे पड़ोसी साथे आपणी तरह प्यार राखो।” यीशु ने जवाब दिता, “तूं ठीक बोलोए! अगर तूं एड़ा करोगा, तो ताखे अनन्त जीवन मिलणा।”

पर तेस आदमी ने आपिखे तर्मी ठैराणे री इच्छा ते यीशु ते पुछया, “तो मेरा पड़ोसी कुणे?”

“ये गल्ल सुणिके यीशु ने तेस आदमी खे एक कहाणी सुणाइके जवाब दिता कि एक बार एक आदमी यरूशलेम सैरा ते यरीहो नगरा खे जाणे लगिरा था।”

“तेबे बाटा बिचे कुछ डाकुआ ने से देख्या ओर तिनाने तेस पादें हमला करता। तिनाने से बहुत कुटेया, ओर तेसरा सब कुछ लुटिला ओर तेसके अदमरा छाडिके चलिगे।”

“तेथे थोड़ी बाद, तेसी बाटा रिए एक यहूदी पुरोहित जाणे लगिरा था। तेस यहूदी पुरोहिता ने से आदमी बाटा बिचे जख्मी पड़यादा देख्या। ओर तिने तेसरी कोई मदद नी किती ओर से तेसके पूरी तरह ते अनदेखा करिके बाटा री दूजी तरफा रिए चलिगा।”

“फेर थोड़ी देर बाद, एक लेवी आदमी तेस बाटा रिए आया, (लेवी यहूदियों रा एक गोत्र था जो मन्दरा बिचे पुरोहिता री मदद करो थे।) तिने बी तेसरी कोई मदद नी किती ओर से बी तेसके अनदेखा करिके बाटा री दूजी तरफा रिए चलिगा।”

“आगला आदमी जो तेस बाटा रिए आया से सामरिया देशा रा आदमी था। तेस सामरी आदमी ने बाटा बिचे से जख्मी आदमी देख्या। तिने देख्या कि ये तो यहूदी ए, (सामरी लोक ओर यहूदी लोक एक-दूजे ते नफरत करो थे।) पर फेर बी तेस सामरी आदमी ने तेस पादें दया किती। से सामरी आदमी तेस जख्मी आदमी गे गया ओर तिने तेसरे जख्मा पादें पट्टिया बानिया।”

“फेर से सामरी आदमी तेस जख्मी आदमी खे आपणे गधे पादें लेटाइके एक सरांई बिचे लइगा। ओर तेती तेसरी देखभाल किती।”

“आगले दिना, तेस सामरी आदमी खे आपणी यात्रा करनी जरूरी थी। तिने सरांई रे मालका खे कुछ खर्चा दिता ओर तेसके बोल्या कि तूं एस जख्मी आदमी रा ख्याल राख्या। अगर एसरी देखभाल करने बिचे एथे जादा खर्चा हुआ तो हाउं वापसी बिचे ताखे सारा खर्चा चुकाई दूंगा।”

फेर यीशु ने तेस व्यवस्था सिखाणे वाले आदमी ते पुछया, “ताखे क्या लगोए? इना तीन आदमिया बिचे ते कुण तेस जख्मी आदमी रा पड़ोसी ए?” तिने जवाब दिता, “सेई जिने तेस जख्मी आदमी पादें दया किती।” यीशु ने तेसके बोल्या, “जा ओर तूं बी एड़ाई कर।”