28. एक अमीर जवान शासक

एक दिन एक अमीर जवान यहूदी शासक यीशु गे आया ओर तेसते पुछणे लगया, “ए उत्तम गुरु, अनन्त जीवन पाणे खातर माखे क्या करना चइयो?” यीशु ने तेसके बोल्या, “तूं माखे उत्तम’ कउं बोलोए? उत्तम सिर्फ एकिए ओर से परमात्मा ए। अगर तूं अनन्त जीवन पाणा चाओए तो परमात्मा रे आदेशा रा पालन कर।”

“तिने पुछया, माखे कुण-कुण जे आदेशा रा पालन करना चइयो?” यीशु ने जवाब दिता, “हत्या ना कर, व्यबिचार ना कर, चोरी ना कर, ओर चुठ नी बोल। आपणे आम्मा-पापा रा आदर कर, ओर आपणे पड़ोसी साथे आपणी तरह प्यार कर।”

पर तेस जवान आदमी ने बोल्या, “ये सब आदेश तो हाउं बचपणा तेई मानदा आया। अनन्त जीवन पाणे खातर एबु बी माखे क्या करने री जरूरत ए?” यीशु ने तेसरी तरफ देख्या ओर तेस साथे प्यार किता।

तेबे यीशु ने तेसके बोल्या, “अगर तूं सिद्ध हुणा चाओए तो जाइके आपणा सब कुछ बेची दे ओर सारा धन गरीब लोकाखे बांडिदे, ताखे स्वर्गा बिचे धन मिलणा। फेर आइके मेरे पीछे चल पड़।”

जेबे तेस जवान आदमी ने यीशु रिया गल्ला सुणिया तो से बहुत उदास हुइगा, क्योंकि से बहुत अमीर था ओर से आपणा सारा धन देणा नी चाओ था। इजिखातर से यीशु गे ते मुड़िके वापस चलिगा।

तेबे यीशु ने आपणे चेल्या खे बोल्या, “अमीर लोका रा परमात्मा रे राज्य बिचे परवेश करना बहुत मुश्किल ए! हाँ, अमीर लोका रा परमात्मा रे राज्य बिचे परवेश करना मुश्किल ए जबकि ऊँटा रा सुइया रे नक्के बिचे ते निकलना आसान ए।”

यीशु रिया गल्ला सुणिके चेले चौंकिगे। ओर बोलणे लगे, “अगर एड़ा ए तो परमात्मा ने कुण बचाणा?”

यीशु ने चेल्या री तरफ देखिके बोल्या, “लोक आपणा उद्धार आपी नी करी सकदे। एड़ा करना नामुमकिन ए। पर परमात्मा सब कुछ करी सकोआ।”

पतरसा ने यीशु खे बोल्या, “आसे तेरे चेले आपणा सब कुछ छाडिके तेरे पीछे चली पड़ेदे। तो आसाखे इजिरा क्या प्रतिफल मिलणा?”

यीशु ने जवाब दिता, “हर एक आदमी जिने मेरे खातर आपणा कर, पाई, बैण, आम्मा-पापा, बच्चे ओर जायदात सब कुछ छाडी राख्या, तेसके तेथे 100 गुणा जादा मिलणा ओर तेसके अनन्त जीवन बी मिलणा। पर एस समय संसारा बिचे बहुत सारे लोक आपिखे बड़ा समझोए, स्यो लोक परमात्मा री नजरी बिचे छोटे हुई जाणे, ओर जो लोक एस संसारा बिचे छोटे समझे जाओए, स्यो परमात्मा री नजरी बिचे बड़े हुई जाणे।”