29. निर्दयी सेवादारा री कहाणी

एक दिन, पतरसा ने यीशु ते पुछया, “ए गुरु, जेबे मेरा पाई मेरे खिलाफ पाप करो, तो माखे आपणे पाई खे कितनी बार माफ करना चइयो? क्या सात बार?” यीशु ने बोल्या, “सात बार नी, पर साता री बजाय सत्तर बार!” यीशु रे बोलणे मतलब था की आसाखे हमेशा माफ करना चइयो। तेबे यीशु ने तिनाखे एक कहाणी सुणाई।

यीशु ने बोल्या, “परमात्मा रा राज्य तेस राजा री तरह ए जिने आपणे सेवादारा ते लेखा लेणा चाया। जेबे से लेखा लेणे लगया, तो एक सेवादार तेसरे सामणे लयाया गया, जो बहुत सारे पैसेयारा कर्जदार था।”

पर से सेवादार आपणा कर्ज चुकाई नी सक्या, इजिखातर राजा ने बोल्या, “एसरा कर्ज चुकाणे खातर एसके ओर एसरे परिवारा खे गुलामा रे रूपा चे बेचीं दो।”

“तेस सेवादारा ने राजे रे सामणे घुटणे टेकिके बोल्या, “किरपा करिके धीरज राख, हाउं तेरा सारा कर्ज चुकाई दूँगा।” राजे खे तेस सेवादारा पादें दया आई, इजिखातर तिने तेसरा सारा कर्ज माफ करता ओर से जाणे दिता।”

“पर जेबे से सेवादार राजे गे ते बारे गया, तो तेसके तेसरा एक साथी सेवादार मिलया जो तेसरे थोड़े जे पैसेयारा कर्जदार था। तेस सेवादारा ने आपणा साथी सेवादार पकड़िला ओर तेसके बोल्या, “तेरे पादें जो मेरा कर्ज ए से सारा कर्ज माखे एबु दे!”

“तेस साथी सेवादारा ने घुटणे टेकिके बोल्या, “किरपा करिके धीरज राख, हाउं तेरा सारा कर्ज चुकाई दूँगा।” पर से सेवादार नई मान्या, तिने आपणा साथी सेवादार तब तक जेला बिचे बंद करता जब तक कि से तेसरा कर्ज ना चुकाई दो।”

“जो कुछ तेस सेवादारा ने आपणे साथी सेवादारा साथे किता से दूजे सेवादारा ने देखिला, ओर ये देखिके स्यो बहुत परेशान हुइगे। स्यो राजे गे गए ओर तेसके सब कुछ बताइता।”

“राजे ने से सेवादार आपिगे बुलाया ओर तेसके बोल्या, “ए दुष्ट सेवादार! मैं तेरा कर्ज इजिखातर माफ किता क्योंकि तैं मागें विनती किती थी। ताखे बी तियांई आपणे साथी सेवादारा रा कर्ज माफ करना चइयो था।” तेबे राजा इतना जादा गुस्सा हुइगा कि तिने से सेवादार तब तक जेला बिचे बंद करता जब तक कि से तेसरा सारा कर्ज ना चुकाई दो।”

तेबे यीशु ने बोल्या, “अगर तुसे आपणे पाई खे आपणे मना ते माफ नी करोगे, तो मेरा पिता जो स्वर्गा बिचे विराजमान ए तिने बी तुसा सबी साथे एड़ाई करना।”