30. यीशु ने पाँज हजार लोकाखे खाणा खिलाया

यीशु ने आपणे बारा खास चेले प्रचार करने खातर ओर शिक्षा देणे खातर अलग-अलग गावाँ बिचे पेजे। जेबे स्यो चेले यीशु गे वापस आए तो तिनाने यीशु खे बताया कि आसे गावां बिचे क्या-क्या किता। तेबे यीशु ने तिनाखे झीला री दूजी तरफ एक शान्त जैगा बिचे थोड़ी देर आराम करने खातर बोल्या। इजिखातर स्यो किश्तिया बिचे चढ़िगे ओर झीला री दूजी तरफ चलिगे।

पर तेती बहुत सारे लोक थे जिनाने यीशु ओर तेसरे चेले किश्तिया बिचे जादें हुए देखिले थे। ये देखिके लोक बी झीला री दूजी तरफ जाणे खातर झीला रे कनारे-कनारे रिए पैदल नठे ओर तिनाते पैले पौंचिगे। जेबे यीशु ओर तेसरे चेले झीला री दूजी तरफ पौंचे तो इनाई लोका री बहुत सारी भीड़ पैलेई तिनारा इन्तजार करने लगिरी थी।

तेस भीड़ा बिचे लगभग पाँज हजारा ते जादा मर्द थे, पर तिना बिचे ज्वाणसा री ओर बच्या री गिणती नी थी। यीशु ने तिना लोका पादें बड़ी दया किती। क्योंकि यीशु खातर स्यो लोक तिना पेडा री तरह थे, जिनारा कोई रखवाला ना हो। इजिखातर यीशु ने तिनाखे शिक्षा दिती ओर तिना बिचे जो लोक बमार थे स्यो चंगे किते।

जेबे दिन बितिगा, तो चेल्या ने यीशु खे बोल्या, “एबे देर बहुत हुइगी ओर एती नजदीक कोई नगर निए। इना लोकाखे एथे पेजिदे ताकि यो जाइके खाणे खातर कुछ लेइलो।”

पर यीशु ने चेल्या खे बोल्या, “तुसे आपी इना लोका खातर खाणे रा इन्तजाम करो!” चेल्या ने जवाब दिता, “इना लोका खातर इतनी रोटिया रा इन्तजाम आसाते नई हुणा? क्योंकि आसागे तो सिर्फ पाँज रोटिया ओर दो छोटी मछलिया ए।”

यीशु ने आपणे चेल्या खे बोल्या कि इना लोकाखे बोलो कि पँजा-पँजा आदमिया रा चुण्ड बणाइके बैठी जाओ।

तेबे यीशु ने पाँज रोटिया ओर दो मछलिया आथा बिचे लेइके स्वर्गा री तरफ देख्या, ओर तेस खाणे खातर परमात्मा खे धन्यवाद दिता।

ओर यीशु रोटिया तोड़ी-तोड़िके चेल्या खे देदां गया कि सब लोका बिचे बांडिदो, ओर से दो मछलिया बी सब लोका बिचे बांडतिया। पर तेबे बी खाणा खत्म नी हुआ ओर स्यो सब लोक खाइके रजिगे।

तेथे बाद चेल्या ने बचेदे टुकड़े कट्ठे किते जो सब लोका रे खाणे ते बाद बचिगे थे। ओर तिना टुकड़ेया ते परिया दिया बारा टोकरिया चकिया। ये सारा खाणा तिना पाँज रोटिया ते ओर दो मछलिया ते आया था।