31. यीशु रा पाणी पादें चलना

पाँज हजार लोकाखे खाणा खिलाणे ते बाद, यीशु ने आपणे चेल्या खे किश्तिया बिचे चढ़ने खातर बोल्या। यीशु ने तिनाखे झीला री दूजी तरफ जाणे खातर बोल्या जबकि यीशु आपी थोड़े समय खातर तेसी जैगा ठैरिगा। तेबे चेले चलिगे ओर यीशु ने भीड़ वाले लोक विदा किते कि आपणे करा खे जाओ। तेथे बाद, यीशु प्रार्थना करने खातर एक पाड़िया पादें चलिगा। यीशु तेती कल्ला था, ओर तिने राती बहुत देर तक प्रार्थना किती।

तेस समय, चेले किश्तिया बिचे जाणे लगिरे थे, पर हव्वा तिनारे खिलाफ बड़ी जोरा साथे चलने लगिरी थी। आधी रात हुणे तक बी स्यो सिर्फ झिला रे बिचेई पौंचिरे थे।

प्रार्थना करने ते बाद, यीशु आपणे चेल्या गे वापस चलिगा। यीशु किश्तिया री तरफ जाणे खातर पाणी पादें चलने लगया।

तेबे चेल्या ने यीशु झीला रे पाणी पादें चलदे हुए देख्या। स्यो डरिगे क्योंकि तिनाने सोच्या कि ये कोई भूत ए। यीशु खे पता था कि चेले डरिगे, इजिखातर यीशु ने तिनाखे आवाज लगाइके बोल्या, “डरो मत, हाउं ए!”

तेबे पतरसा ने यीशु खे बोल्या, “ए प्रभु, अगर ये तूं ए तो माखे पाणी पादें चलिके आपिगे आउणे रा आदेश दे।” यीशु ने पतरसा खे बोल्या, “आई जा!”

तेबे पतरस किश्तिया बिचे ते उतरिके यीशु गे जाणे खातर पाणी पादें चलने लगया। पर थोड़ा जा आगे जाइके तिने आपणी नजर यीशु पादें ते फेरली ओर लैहरा खे देखणे लगया ओर तेज हव्वा खे महसूस करने लगया।

तेबे पतरस डरिगा ओर पाणी बिचे डूबणे लगया ओर चिल्लाणे लगया, “ए प्रभु, माखे बचा!” यीशु ने तेसी समय आपणा आथ आगे बढ़ाया ओर से पकड़िला। तेबे यीशु ने पतरसा खे बोल्या, “तेरा परोसा बहुत कम ए! तैं मेरे पादें परोसा कउं नी किता?”

तेबे यीशु ओर पतरस किश्तिया बिचे चढ़िगे, ओर एकदम तेज हव्वा चलनी बंद हुइगी। ओर पाणी रिया लैहरा शान्त हुइगिया। चेले चौंकिगे ओर तिनाने यीशु रे आगे घुटणे टेकिके तेसरी आराधना किती, ओर तेसके बोल्या, “तूं सच्चेई परमात्मा रा पुत ए।”