32. यीशु ने दुष्टआत्मा ते पीड़ित आदमी ओर एक बमार ज्वाणस चंगी किती

एक दिन यीशु ओर तेसरे चेले आपणी किश्तिया बिचे बैठिके तेस नगरा खे गए, जेती गिरासेनी लोक रओ थे। स्यो तेस नगरा बिचे पौंचिके किश्तिया बिचे ते उतरे।

तेती एक आदमी था जेस बिचे बहुत सारिया दुष्टआत्मा थिया।

से आदमी इतना खतरनाक था कि कोई बी तेसके काबू नी करी सको था। कई बार लोका ने तेसरे आथ-पैर लोहे री जंजीरा साथे बी बाने, पर से जंजीरा खे तोड़िदो था।

से आदमी कब्रिस्ताना बिचे रया करो था ओर दिन-रात चिल्लांदा रओ था। से टाले नी पैनो था ओर बार-बार आपिखे पात्थरा साथे घायल करदा रओ था।

जेबे तिने दूरा ते यीशु देख्या, तो से दौड़दा हुआ यीशु गे आया। ओर तेसरे सामणे घुटणे टेकिते। तेबे यीशु ने तेस आदमी बिचे री दुष्टआत्मा खे बोल्या, “ए दुष्टआत्माओं, एस आदमी बिचे ते बारे निकलो!”

स्यो दुष्टआत्मा ऊची आवाजा बिचे चिल्लाइके बोलणे लगिया, “ए यीशु, परमपरधान परमात्मा रे पुत, तूं माखे परेशान कउं करोए? किरपा करिके माखे पीड़ा ना दे!” तेबे यीशु ने तेस दुष्टआत्मा ते पुछया, “क्या नाओं तेरा?” दुष्टआत्मा ने बोल्या, “मेरा नाओं सेना ए, क्योंकि आसे बहुत ए।”

तिना दुष्टआत्मा ने यीशु गे विनती किती, “किरपा करिके आसाखे एस इलाके ते बारे ना पेज!” तेती पाड़िया पादें बहुत सारे सूँरा एक चुण्ड चुगणे लगिरा था। इजिखातर तिना दुष्टआत्मा ने यीशु गे विनती किती, “किरपा करिके आसाखे इना सूँरा बिचे पेजिदे!” यीशु ने बोल्या, “ठीक ए, तुसे इना सूँरा बिचे चली जाओ!”

तेबे स्यो दुष्टआत्मा तेस आदमी बिचे ते निकलिके तिना सूँरा बिचे समाइगिया। स्यो सूँर पाड़िया पादें ते थाले खे दौड़दे हुए झीला बिचे कुदिगे ओर पाणी बिचे डूबिके मरिगे। तेस चुण्डा बिचे लगभग 2,000 सूँर थे।

तेती तिना सूँरा री देखभाल करने वाले लोक थे। जेबे तिनाने ये सब देख्या तो स्यो नगरा री तरफ नट्ठे। ओर जो कुछ यीशु ने किता था से तिनाने नगर वाले सारे लोकाखे बताया। ओर तेस नगरा ते लोक ये सब देखणे आए। तेती आइके तिनाने से आदमी देख्या जेस बिचे पैले बहुत सारिया दुष्टआत्मा थिया, से आदमी शान्त, टाले पैनिके, एक आम आदमी री तरह व्यवहार करदा हुआ बैठिरा था।

स्यो लोक बहुत जादा डरेदे थे, ओर तिनाने यीशु खे तेथे जाणे खातर बोल्या। तेबे यीशु किश्तिया बिचे चढ़िगा। ओर जेस आदमी बिचे पैले दुष्टआत्मा थिया से यीशु गे विनती करने लगया कि माखे बी आपी साथे आउणे दे।

पर यीशु ने तेस आदमी खे बोल्या, “नई। हाउं चाउंआ कि तूं करे जाइके आपणे लोकाखे बताओ कि परमात्मा ने तेरे खातर क्या किता। तिना लोकाखे बता कि कियां परमात्मा ने तेरे पादें दया किती।”

इजिखातर से आदमी चलिगा ओर तिने सब लोकाखे बताया जो यीशु ने तेस खातर किता था। तेसरी कहाणी सुणिके सब लोक चौंकी जाओ थे।

जेबे यीशु झीला री दूजी तरफ वापस आया। तो तेसरे तेती पौंचणे ते बाद, बहुत सारे लोका री भीड़ यीशु रे नजदीक कट्ठी हुइगी ओर लोक यीशु खे देखणे खातर आपी-पिछिए धक्का-मुक्की करने लगे। तेस भीड़ा बिचे एक ज्वाणस थी जेसाखे बारा साला ते खून बैहणे री बमारी थी। तेसाने आपणा सारा धन वैधा पादें खर्च करता था ताकि स्यो तेसाखे ठीक करी सको, पर तेसारी बमारी ओर बी जादा बिगड़िगी थी।

तेस ज्वाणसा ने सुणी राख्या था कि यीशु ने बहुत सारे बमार लोक चंगे किते, तेसाने सोच्या कि, “अगर मैं यीशु रे टाले बी छूँइले, तो हाउं चंगी हुई जाणी!” इजिखातर से ज्वाणस यीशु रे पीछे ते आई ओर तेसाने यीशु रे टाले छूँइले। जियांई तेसाने यीशु रे टाले छूँए, तेसी समय तेसारा खून बैहणा बंद हुइगा।

यीशु खे एकदम पता लगिगा कि मेरे बिचे ते सामर्थ्य निकली। इजिखातर यीशु ने पीछे मुड़िके पुछया, “हाउं किने छूँया?” चेल्या ने जवाब दिता, “एती इतने सारे लोका ने तेरे चारो तरफ भीड़ लगाई राखी, ओर पादें गिरने लगिरे। ओर तूं पुछोए कि हाउं किने छूँया?”

तेबे से ज्वाणस डरा रे मारे काँबदी हुई घुटणे टेकिके यीशु रे सामणे बैठिगी। ओर तेसाने यीशु खे सच्च-सच्च बताइता कि तेरे टाले मैं छूँए, ओर तेसाने यीशु खे ये बी बताया कि ताखे छूणे ते मेरी बमारी ठीक हुइगी। यीशु ने तेसाखे बोल्या, “बेटी, तेरे परोसे ने तूं चंगी किती। खुशी-खुशी जा।”