33. एक किसाना री कहाणी

एक दिन, यीशु झीला रे कनारे पादें बहुत सारे लोकाखे शिक्षा देणे लगिरा था। यीशु री शिक्षा सुणने खातर इतने सारे लोक आए कि यीशु खे खड़े हुणे खातर जैगा नी बची। इजिखातर यीशु पाणी बिचे एक खड़ी किश्तिया बिचे चढ़िके बैठिगा ओर लोकाखे शिक्षा देणे लगया।

यीशु ने तिनाखे ये कहाणी सुणाई, “एक किसान बीज बिजणे खातर निकलया। बिजदे समय कुछ बीज बाटा रे कनारे गिरे ओर पँछिया ने आइके स्यो सब बीज चुगिले।”

“कुछ बीज पात्थर वाली जमीना पादें गिरे जेती बहुत कम माटी थी। स्यो बीज बहुत जल्दी लूँगिगे, पर कम माटी हुणे रे कारण तिनारी जड़ जादा गैहरी नी गई। ओर सूरज निकलने ते बाद जेबे तेज तूप लगी तो तिना बीजा रिया लूँगा मुरझाइगिया, ओर सुकिगिया।”

“कुछ बीज कांडेदार झाड़िया बिचे गिरे। स्यो बीज बढ़ने लगे, पर झाड़िया ने स्यो थाले दबाइते ओर पादें नी बढ़ने दिते। इजिखातर कांडेदार झाड़िया बिचे लूँगेदे बीज कोई अनाज पैदा नी करी सके।”

“कुछ बीज अच्छी जमीना पादें गिरे। स्यो बीज लूँगे ओर बड़े हुइके तेथे बहुत सारे बीज लगे, केथे 30 गुणा बीज लगे, केथे 60 गुणा बीज लगे, ओर केथे 100 गुणा बीज लगे। तेबे यीशु ने लोकाखे बोल्या, “जो कोई बी परमात्मा रे पीछे चलना चाओए से एस गल्ला पादें त्यान देयो जो हाउं बोलणे लगिरा!”

ये कहाणी सुणिके चेले उलझना बिचे पड़िगे। इजिखातर यीशु ने तिनाखे समझाया, “बीज परमात्मा रा वचन ए। बाटा रे कनारे गिरेदे बीज तेस आदमी री तरह ए जो परमात्मा रा वचन तो सुणोआ, पर तिजिखे समझदा नी। तेबे शैतान एकदम आइके तेसरे मना बिचे ते वचन चुराइके लई जाओआ। मतलब शैतान तेसके वचन समझणे ते दूर राखोआ।”

“पात्थर वाली जमीना पादें गिरेदे बीज तेस आदमी री तरह ए जो परमात्मा रा वचन सुणिके तिजिखे खुशिया साथे स्वीकार करिलोआ। पर जेबे तेसरे जीवना बिचे दुखा रा समय आओआ, या जेबे तेसके दूजे लोक सताणा शुरू करो, तो से परमात्मा ते दूर चली जाओआ। ओर परमात्मा पादें परोसा नी राखदा।”

“कांडेदार झाड़िया बिचे गिरेदे बीज तेस आदमी री तरह ए जो परमात्मा रा वचन तो सुणोआ, पर से बहुत सारी गल्ला री चिन्ता करनी शुरू करिदोआ, ओर से बहुत सारा धन कमाणे री ओर बहुत सारी चीजा खे पाणे री कोशिश करोआ। थोड़े समय ते बाद, से परमात्मा साथे प्यार नी करी पादां। इजिखातर जो कुछ तिने परमात्मा रे वचना ते सिख्या था, तेथे से परमात्मा खे खुश नी करी पादां।” से कणका रे डंडले री तरह ए जो कोई अनाज पैदा नी करदा।

“पर अच्छी जमीना पादें गिरेदे बीज तेस आदमी री तरह ए जो परमात्मा रा वचन सुणोआ, ओर तिजी पादें परोसा करोआ, ओर फलदार बणोआ।