34. यीशु ने बहुत सारिया कहाणिया सुणाइया

यीशु ने परमात्मा रे राज्य रे बारे चे ओर बी बहुत सारिया कहाणिया सुणाइया। यीशु ने बोल्या, “परमात्मा रा राज्य एक राई रे बीजा री तरह ए जो किने आपणे डोरुआ बिचे बिजिता। तुसाखे पता ए कि राई रा बीज सब बीजा ते छोटा होआ।”

“पर जेबे राई रा बीज बड़ा होआ तो से बगीचे री सब डालिया ते बड़ा हुई जाओआ। से इतना बड़ा हुई जाओआ कि पँछी बी आइके तिजिरी टैणिया पादें बसेरा करो।”

यीशु ने एक ओर कहाणी सुणाई, “परमात्मा रा राज्य खमीरा री तरह ए। एक ज्वाणस खमीर लेइके आटे बिचे मिलाइदोई, ओर हुंदे-हुंदे से सारे आटे बिचे फैली जाओआ।”

“परमात्मा रा राज्य तेस खजाने री तरह ए जो किने डोरु बिचे छुपाइता। केस दूजे आदमी खे से खजाना मिलिगा ओर तिने तिजिखे हांसिल करने री बहुत इच्छा राखी। इजिखातर तिने से खजाना दोबारा तियांई दबाइता। से आदमी इतना जादा खुश हुइगा कि तिने जाइके आपणा सब कुछ बेचिता ताकि से तेस खजाने वाले डोरू खे खरिदी सको जेती से खजाना था।”

“परमात्मा रा राज्य एक किमती शुद्ध मोती री तरह ए। जेबे एक मोती रे व्यापारी खे से किमती मोती मिलया, तो तिने आपणा सब कुछ बेचिता ताकि से तिजिखे खरीदी सको।”

तेती कुछ लोक थे जो सोचो थे कि परमात्मा ने आसे इजिखातर स्वीकार करने क्योंकि आसे अच्छे काम करने लगिरे। ये लोक एड़े लोकाखे तुच्छ मानो थे जो तिना अच्छे कामा खे नई करो थे। इजिखातर यीशु ने तिनाखे ये कहाणी सुणाई, “दो आदमी थे ओर दोनो आदमी मन्दरा बिचे प्रार्थना करने खातर गए। तिना बिचे एक चुंगी लेणे वाला था, ओर दूजा तार्मिक गुरु था।”

“तेस तार्मिक गुरु ने एस तरह प्रार्थना किती, “ए परमात्मा, तेरा धन्यवाद हो कि हाउं दूजे लोका री तरह एक डाकू, अन्यायी, व्यभिचारी ओर एती खड़ेदे चुंगी लेणे वालेया री तरह पापी आदमी निए।”’

“हाउं हर हप्ते बिचे दो बार व्रत राखूँआ, ओर आपणी कमाइया बिचे ते दसवाँ हिस्सा ताखे देउंआ।”

“पर तेस चुंगी लेणे वाले आदमी ने तेस तार्मिक गुरु ते दूर खड़े हुइके आपणिया आखिया स्वर्गा री तरफ बी नी उठाइया। इजिरी बजाय तिने आपणी छाती पिटी-पिटिके प्रार्थना किती, “ए परमात्मा, किरपा करिके मेरे पादें दया कर क्योंकि हाउं एक पापी आदमी ए।”’

फेर यीशु ने बोल्या, “हाउं तुसाखे सच्च बोलूंए, परमात्मा ने तेस चुंगी लेणे वाले री प्रार्थना सुणी ओर से तर्मी ठैराया। पर तिने तेस तार्मिक गुरु री प्रार्थना पसंद नी किती। इजिखातर हर एक आदमी जो आपिखे बड़ा समझोआ, परमात्मा ने से छोटा करना, ओर जो आपिखे छोटा समझोआ, परमात्मा ने से बड़ा करना।”