35. एक दयालु पापे री कहाणी

एक दिन, यीशु तिना बहुत सारे लोकाखे शिक्षा देणे लगिरा था जो तेसरी शिक्षा सुणने खातर तेती कट्ठे हुइरे थे। ये लोक चुंगी लेणे वाले ओर साथेई दूजे लोक बी थे जिनाने मूसा री व्यवस्था रा पालन करने री कोशिश नी किती थी

तेती कुछ तार्मिक गुरुआ ने देख्या कि यीशु इना पापी लोका साथे एक दोस्ता री तरह गल्ला करोए। इजिखातर स्यो आपी-पिछिए बोलणे लगे कि यीशु गलत करने लगिरा, यीशु ने स्यो ये गल्ला करदे हुए सुणिले, इजिखातर यीशु ने तिनाखे ये कहाणी सुणाई।

“एक आदमी था जेसरे दो पुत थे। छोटे पुता ने आपणे पापे खे बोल्या, “पापा, माखे मेरी जायदाता रा हिस्सा एबु चइयो!” तेबे पापे ने आपणे दोनो पुता बिचे आपणी जायदात बांडिती।”

“कुछ दिन बाद, छोटा पुत आपणा सब कुछ बेचिके दूर देशा बिचे चलिगा, ओर तिने पापी जीवन जीणे बिचे आपणा सारा पैसा बर्बाद करता।”

“तेथे बाद, जेस देशा बिचे छोटा पुत गया था तेस देशा बिचे एक बहुत खतरनाक आकाल पड़या, ओर से छोटा पुत कंगाल हुइगा तेसगे खाणा खरिदणे तक पैसे नी रए। तेती तेसके सिर्फ सूँरा खे चारने रा काम मिलया। से इतना दुखी ओर पुखा था कि से सूँरा रा खाणा खाइके आपणा पेट परना चाओ था।”

“आखिरकार, जेबे तेस छोटे पुता खे समझ आई तो से आपिखे बोलणे लगया, हाउं एती क्या करने लगिरा? मेरे पापे रे करे कितने मजदूर काम करोए ओर तिनाखे पेट भर खाणा मिलोआ, पर हाउं एती पुखा मरने लगिरा। एबे मैं आपणे पापे गे वापस जाणा ओर तेसगे विनती करनी कि माखे एक सेवादारा री तरह आपी साथे राखिले।”

“तेबे से छोटा पुत आपणे पापे रे करा खे वापस चली पड़या। से एबु करा ते दूर ही था कि तेसरे पापे ने से देख्या ओर तेस पादें दया किती। से दौड़िके आपणे पुता गे गया ओर गले लगाइके तेसके प्यार किता।”

“तेस पुता ने बोल्या, “पापा, मैं परमात्मा रे खिलाफ ओर तेरे खिलाफ पाप करी राख्या। हाउं तेरा पुत बोलणे रे लायक बी निए।”’

“पर पापे ने आपणे एक सेवादारा खे बोल्या, “जल्दी जाइके एक नवें टाले रा जोड़ा लयाओ ओर मेरे पुता खे पैनाओ! एसरी गुठिया बिचे अंगूठी ओर एसरे पैरा बिचे जूते पैनाओ। ओर खाणे खातर एक सबिते बढ़िया वाला पालयादा जानवर बाडो ताकि आसे तिजी खाइके जशन मनाई सकूं, क्योंकि मेरा पुत जेड़ा कि मरिगा था, पर एबे ये जिउंदाए! मेरा पुत खोइगा था, पर एबे ये माखे मिलिगादाए!”’

“इजिखातर लोका ने जशन मनाणा शुरू किता। थोड़ी देर बाद, बड़ा पुत डोरुआ बिचे ते काम करिके करे आया। तिने करे आइके नाचणे-गाणे री आवाज सुणी ओर चौंकिगा कि एती ये क्या हुणे लगिरा।”

“जेबे बड़े पुता खे पता लगया कि ये मेरे छोटे पाई रे वापस आउणे री खुशी बिचे जशन मनाणे लगिरे, तो से बहुत गुस्सा हुआ ओर करा रे आंदरे नी आया। तेसरे पापे ने बारे आइके तेसके बोल्या कि, “तूं बी जशन मनाणे खातर आसा साथे आंदरे चल, पर से मुकरिगा कि मैं नी जाणा।”

“तेस बड़े पुता ने आपणे पापे खे बोल्या, “पापा, मैं इतने साल तक तेरे खातर ईमानदारी साथे काम किता! ओर कदी बी तेरी गल्ल नी टाली, पर तैं माखे कदी बाकरी रा बच्चा तक नी दिता कि हाउं जाइके आपणे दोस्ता साथे जशन मनाई सकूं। तेरे एस छोटे पुता ने तेरा सारा पैसा पाप वाले काम करने बिचे बर्बाद करता। ओर एबे जेबे ये करे वापस आइगा तो तैं एसरा जशन मनाणे खातर सबी ते बढ़िया वाला पालयादा जानवर मारता!”’

“पापे ने जवाब दिता, “ए मेरे पुत, तूं हमेशा मेरे साथ ए, ओर जो कुछ मेरा ए से सब कुछ तेरा ए। पर आसा खातर जशन मनाणा ठीक ए क्योंकि तेरा छोटा पाई जेड़ा कि मरिगा था, पर एबे से जिउंदाए। से खोइगा था, पर एबे से आसाखे मिलिगादाए!”’