36. यीशु रा रूप बदलना

एक दिन यीशु ने आपणे तीन चेले पतरस, याकूब, ओर यूहन्ना आपी साथे ले। ओर से तिनाखे प्रार्थना करने खातर एक ऊची पाड़िया पादें लइगा।

जेबे यीशु प्रार्थना करने लगिरा था तो तेसरा चेहरा सूरजा री तरह चमकणे लगया। तेसरे टाले रोशनी री तरह सफेद हुइगे, इतने सफेद कि तरती पादें कोई बी आदमी इतने टाले नी चमकाई सकदा।

तेबे मूसा ओर एलिय्याह भविष्यद्वक्ता परगट हुए। ये आदमी एस तरती पादें सैंकड़ो साल पैले रया करो थे। स्यो यीशु री मौता रे बारे चे गल्ल करने लगिरे थे, जो बहुत जल्दी येरूशलेम सैरा बिचे हुणे वाली थी।

जेबे मूसा ओर एलिय्याह यीशु साथे गल्ला करने लगिरे थे, तेबे पतरसा ने यीशु खे बोल्या, “ए गुरु आसारा एती रौणा ठीक ए।” अगर तेरी इच्छा हो तो आसे तीन तम्बू बणाऊं, एक तेरे खातर, एक मूसा खातर ओर एक एलिय्याह खातर।” पर पतरस नी जाणो था कि हाउं क्या बोलणे लगिरा।

पतरस एबु बोलणेई लगिरा था कि इतने बिचे एक चमकिला बादल तिना पादें छाइगा। फेर तिनाने बादला बिचे परमात्मा री ये आवाज सुणी कि “ये मेरा प्यारा पुत ए ओर हाउं एसते बहुत खुश ए। तुसे सब एसरी सुणो।” स्यो तीनो चेले डरिगे ओर जमीना पादें लेटिगे।

तेबे यीशु ने स्यो छूँए ओर बोल्या, “डरो मत। उठी जाओ। जेबे तिनाने चारो तरफ देख्या, तो यीशु खे छाडिके तिनाने आपी साथे ओर कोई नी देख्या।”

जेबे यीशु ओर तेसरे तीन चेले पाड़िया पादें ते उतरने लगिरे थे। तेबे यीशु ने तिनाखे आदेश देइके बोल्या, “एबु जो एती हुआ तिजिरे बारे चे तुसे केसके ना बतायो। हाउं जल्दी मरी जाणा ओर फेर जिउंदा हुई जाणा। तेथे बाद, तुसे लोकाखे बताई सकोए।”