37. यीशु ने लाजर मरयादे बिचे ते जिउंदा किता।

एक बार लाजर नावां रा एक आदमी था तेसरी दो बैणा थिया एकी रा नाओं मरियम ओर दूजी रा नाओं मार्था था, ये तीनो यीशु रे बहुत अच्छे दोस्त थे। एक दिन किने यीशु खे बताया कि लाजर बहुत बमार ए। ये सुणिके यीशु ने बोल्या, “ये बमारी मौत हुणे खातर निए; बल्कि परमात्मा री बडयाई खातर ए, ताकि लोक परमात्मा रा आदर करो।”

यीशु आपणे दोस्ता साथे प्यार करो था, पर जेती से था तेती तिने दो दिन तक इन्तजार किता। तिना दो दिना ते बाद, यीशु ने आपणे चेल्या खे बोल्या, “आओ वापस यहूदिआ परदेशा खे चलिए। चेल्या ने जवाब दिता, “ए गुरु, एबु कुछ ही समय पैले तो तेती रे लोक ताखे मारना चाओ थे!’’ यीशु ने बोल्या “आसारा दोस्त लाजर सइगादाए, ओर मैं से जगाणा ए।”

यीशु रे चेल्या ने जवाब दिता, “ए प्रभु, अगर लाजर सइगादाए, तो क्या से ठीक हुई जाणा।” तेबे यीशु ने तिनाखे साफ-साफ बोलता, “लाजर मरिगादाए। हाउं खुश ए कि हाउं तेती नी था, ताकि तुसे मेरे पादें परोसा करी सको।”

जेबे यीशु लाजरा रे गावां बिचे पौंच्या तो लाजरा खे कब्रा बिचे राखेदे चार दिन हुई चुके थे। मार्था यीशु खे मिलणे खातर बारे आई ओर बोल्या, “ए प्रभु, अगर तूं एती हुंदा तो मेरा पाई नी मरदा। पर हाउं परोसा करूंई कि जो कुछ बी तैं परमात्मा ते माँगणा, तिने ताखे देणा।”

यीशु ने तेसाखे बोल्या, “दोबारा जिउंदा करने वाला ओर जीवन देणे वाला सिर्फ हाउं ए। जो कोई मेरे पादें परोसा करोआ, अगर से मरी बी जाओ तो बी जीउणा। जो कोई मेरे पादें परोसा करोआ, से कदी बी नी मरना। क्या तूं एस गल्ला पादें परोसा करोई? “मार्था ने जवाब दिता, “हाँ प्रभु, हाउं परोसा करुंई, कि तूं परमात्मा रा पुत मसीह ए।”

तेबे मरियम तेती पौंची जेती यीशु था। से यीशु रे पैरा बिचे पड़िगी ओर बोलणे लगी, “ए प्रभु, अगर तूं एती हुंदा तो मेरा पाई नी मरदा। “यीशु ने तेसाते पुछया, तुसे लाजर केई दफणाई राख्या? “तिनाने यीशु खे बोल्या, “ए प्रभु, कब्रा पादें चल ओर देखिले।” तेबे यीशु रोणे लगया।

से कब्र एक गुफा बिचे बणाई राखी थी, ओर तिजिरे दरवाजे पादें एक बड़ा सारा पात्थर राखी राख्या था। जेबे यीशु कब्रा पादें पौंच्या, तो तिने तिनाखे बोल्या, “एस पात्थर कनारे हटाओ। पर मार्था ने यीशु खे बोल्या, “ए प्रभु, लाजरा खे मरेदे तो चार दिन हुई चुके दे। एबे तो तेसते बदबू आउणे लागिगी हुणी।”

यीशु ने जवाब दिता, “क्या मैं ताखे बोल्या नी था कि अगर तूं मेरे पादें परोसा करोगी, तो तैं परमात्मा री सामर्थ्य देखणी?” तेबे तिनाने से पात्थर कनारे हटाइता।

तेबे यीशु ने स्वर्गा री तरफ देखिके बोल्या, “ए पिता परमात्मा, हाउं तेरा धन्यवाद करुँए क्योंकि तैं मेरी सुणी। हाउं जाणुआ कि तूं हमेशा मेरी सुणोआ, पर जो एती आसपास लोका री भीड़ खड़िरी, इनारी मदद करने खातर मैं ये बोल्या, ताकि ये लोक परोसा करो कि हाउं तैं पेजी राख्या।” तेबे यीशु ने आवाज लगाई, “ए लाजर कब्रा बिचे ते निकलिके बारे आओ।”

तेबे लाजर कफणा समेत कब्रा बिचे ते बारे आइगा। यीशु ने तिनाखे बोल्या, “एसरे कफण खोलणे बिचे एसरी मदद करो ओर एसके जाणे दो।” तेबे जो यहूदी लोक मरियमा गे आइरे थे ओर जेबे तिनाने यीशु रा ये चमत्कार देख्या तो तिना बिचे ते बहुत सारे लोका ने यीशु पादें परोसा किता।

पर यहुदी लोका रे तार्मिक गुरु यीशु ते जलन करने लगे, इजिखातर स्यो कट्ठे हुइके यीशु खे ओर लाजरा खे खत्म करने री योजना बणाणे लगे।