38. यीशु खे पकड़वाया जाणा

यहूदी लोक हर साल फसह त्योआर मनाओ थे। एस त्योआरा बिचे स्यो याद करो थे, कि कियां कई सदियो पैले परमात्मा ने आसारे बजुर्ग मिस्र देशा री गुलामी ते बचाए थे। यीशु रे जरिए पैली बार खुल्लेआम प्रचार करने ओर शिक्षा देणे री शुरुवात करने ते लगभग तीन साल बाद, यीशु ने आपणे चेल्या खे बोल्या, कि ये फसह त्योआर हाउं तुसा साथे यरूशलेम सैरा बिचे मनाणा चाउंए, ओर ये सेई जैगा ए जेती हाउं मारया जाणा।

यीशु रे चेल्या बिचे यहूदा इस्करियोती नावां रा एक आदमी था। यहूदा खे खास चेल्या री धन वाली थैली राखणे री जिम्मेवारी थी, से पैसे साथे प्यार करो था ओर हर बार तेस थैलिया बिचे ते पैसे चुराइलो था। जेबे यीशु ओर तेसरे चेले यरूशलेम सैरा बिचे पौंचे, तो तेथे बाद यहूदा यहूदी गुरुआ गे गया। तिने पैसे रे बदले अधिकारिया खे यीशु री पैछाण बताइके तेसके तिनारे आथे पकड़वाणे रा प्रस्ताव राख्या। क्योंकि से जाणो था, कि यहूदी गुरु यीशु खे मसीह स्वीकार नी करदे, से जाणो था कि स्यो तेसके खत्म करना चाओए।

महापुरोहिता रे बोलणे पादें यहूदी गुरुआ ने यीशु खे तोखे साथे पकड़वाणे खातर यहूदा इस्करियोती खे तीस चाँदी रे सिक्के दिते। एस गल्ला री भविष्यवाणी भविष्यद्वकताओं ने पैलेई करती थी, यहूदा यीशु खे पकड़वाणे खातर मानिगा ओर तिना तीस चाँदी रे सिक्के लेइके तेथे चलिगा। ओर मौका टोलने लगया कि यीशु खे केस तरह पकड़वाऊँ।

यीशु यरूशलेम सैरा बिचे आपणे चेल्या साथे फसह त्योआर मनाणे लगिरा था। फसह त्योआरा बिचे खाणा खाणे रे समय यीशु ने रोटी लेई ओर आशिष माँगिके तोड़ी ओर तिनाखे दिती ओर बोल्या, “ये लेयो ओर खाओ। ये मेरा शरीर ए, जो तुसा खातर दिता जाणा। मेरी यादा बिचे एड़ाई करया करो।” एस तरह, यीशु ने तिनाखे बोल्या कि हाउं तुसा लोका खातर मरी जाणा।

फेर यीशु ने दाखरसा रा प्याला लेया ओर बोल्या, “इजिखे पी लो। ये नई वाचा रा मेरा से खून ए, जो बहुता रे पापा री माफी खातर बहाया जाणा। तुसे बी सेई करयो जो कुछ हाउं एबु करने लगिरा, ताकि हर बार जेबे तुसे इजिखे पीयो तो माखे याद करो।”

तेबे यीशु ने अपणे चेल्या खे बोल्या, “तुसा बिचे ते एकी ने हाउं पकड़वाणा।” चेले चौंकिगे, ओर पुछणे लगे कि एड़ा काम कुण करी सकोआ। यीशु ने बोल्या, “जेसके मैं ये रोटिया रा टुकड़ा देणा सेई माखे पकड़वाणे वाला ए।” तेबे यीशु ने से रोटिया रा टुकड़ा यहूदा इस्करियोती खे दिता।

तेस रोटी रा टुकड़ा खाणे ते बाद, यहूदा इस्करियोती बिचे शैतान समाइगा। यहूदा तेथे चलिगा ताकि से यीशु खे पकड़वाणे खातर यहूदी गुरुआ री मदद करी सको। ये रात का समय था।

खाणा खाणे ते बाद, यीशु ओर तेसरे चेले जैतून वाली पाड़िया पादें चलिगे। तेबे यीशु ने तिनाखे बोल्या, “आज राती तुसे सब माखे छाडिके नठी जाणे। क्योंकि पवित्रशास्त्रा बिचे लिख्यादाए कि; “मैं पेडा रा चरवाहा मारना, ओर सारिया पेडा बिखरी जाणिया।”

पतरसा ने बोल्या, “बेशक सब ताखे छाडिके नठी जाओगे, पर मैं ताखे छाडिके कदी नी जाणा!” तेबे यीशु ने पतरसा खे बोल्या, “शैतान तुसा सबी री परीक्षा लेणा चाओए, पर ए पतरस मैं तेरे खातर प्रार्थना करी राखी, ताकि तेरा परोसा कमज़ोर ना हो। फेर बी आज राती, मुर्गे रे बाँग देणे ते पैले तैं तीन बार माखे पैछाणने ते इन्कार करना, कि हाउं ताखे नी जाणदा।”

पतरसा ने यीशु खे ओर बी जोर देइके बोल्या, “अगर माखे तेरे साथे मरना बी पड़ो तो बी मैं ताखे पैछाणने ते कदी इन्कार नी करना!” बाकि सब चेल्या ने बी इयांई बोल्या।

तेबे यीशु आपणे चेल्या साथे गतसमनी नावां री जैगा बिचे गया। यीशु ने आपणे चेल्या खे प्रार्थना करने खातर बोल्या, ताकि शैतान तिनारी परीक्षा ना करी सको। फेर यीशु आपी प्रार्थना करने खातर चलिगा।

यीशु ने तीन बार प्रार्थना किती ओर बोल्या, “ए मेरे पिता परमात्मा, अगर हुई सकोए तो किरपा करिके ये दुखा रा समय मेरे पादें ते हटाइदे। पर अगर लोका रे पाप माफ करने खातर ओर कोई जरिया निए, तो फेर मेरी नी, बल्कि तेरी इच्छा पूरी हो।” यीशु बहुत बैचेन था, ओर तेसरा पसीना खूना री बूँदा री तरह जमीना पादें गिरने लगिरा था। यीशु खे सामर्थ्य देणे खातर परमात्मा ने एक स्वर्गदूत पेज्या।

हर बार प्रार्थना करने ते कुछ समय बाद, यीशु आपणे चेल्या गे वापस आया, पर स्यो सइगे थे। जेबे यीशु तीजी बार प्रार्थना करिके वापस आया, तो तिने आपणे चेल्या खे बोल्या, “जागी जाओ! माखे पकड़वाणे वाला एती आइगा।”

तेबे यहूदा इस्करियोती यहूदी गुरुआ खे ओर बहुत सारे सैनिका खे हथियारा समेत लेइके आया। यहूदा यीशु गे आया ओर बोल्या, “प्रणाम गुरु, “ओर से गले लगाया। यहूदा ने तिनाखे पैलेई था बतायादा कि जेसके हाउं प्रणाम करूँगा ओर गले लगाऊँगा सेई यीशु ए। तेबे यीशु ने बोल्या, “ए यहूदा, क्या तूं गले लगाइके माखे पकड़वाणे लगिरा?”

जेबे सैनिक यीशु खे पकड़ने लगे, तो पतरसा ने आपणी तलवार काडिली ओर महापुरोहिता रे सेवादारा रा कान बाडिता। तेबे यीशु ने बोल्या, “आपणी तलवार म्याना बिचे राख! क्या तूं नी जाणदा कि अगर हाउं आपणे पिता परमात्मा गे विनती करूं, तो तिने माखे बचाणे खातर स्वर्गदूता री सेना पेजी देणी। पर माखे मेरे पिता परमात्मा रा आदेश मानणा जरुरी ए।” यीशु ने तेस आदमी रा कान छूँइके पैले री तरह ठीक करता। तेबे सारे चेले यीशु खे छाडिके नठिगे।