39. महासभा बिचे यीशु रा मुकदमा

जेबे सैनिका ने यीशु पकड़या तो आधी राती रा समय था। स्यो सैनिक यीशु खे महापुरोहिता रे करे लइगे, क्योंकि से यीशु ते पूछताछ करना चाओ था। पतरस दुरी जी बणाइके तिनारा पीछा करने लगिरा था। जेबे सैनिक यीशु खे करा रे आंदरे लइगे, तो पतरस बारे रुकिगा ओर आग सेकणे लगया।

करा रे आंदरे, यहूदी गुरुआ ने यीशु पादें मुकदमा चलाया। स्यो यीशु रे खिलाफ चुठी गवाई देणे खातर बहुत सारे चुठे गवाह लेइके आए। हालाँकि तिनारी गवाई एक दूजे साथे मिलदी-जुल्दी नी थी, इजिखातर यहूदी गुरु यीशु खे दोषी साबित नी करी सके। यीशु ने कुछ नी बोल्या।

तेबे महापुरोहिता ने यीशु री तरफ देखिके तेसके बोल्या, “आसाखे बता क्या तूंई जिउंदे परमात्मा रा पुत मसीह ए?”

यीशु ने बोल्या, “हाँ हाउं हाए, ओर तुसे हाउं परमात्मा रे दाएं तरफ बैठेयादा ओर स्वर्गा ते आउंदा हुआ देखणा।” महापुरोहिता ने गुस्से बिचे आपणे टाले फाड़ते क्योंकि से यीशु री एस गल्ला ते बहुत गुस्सा हुआ। से दूजे गुरुआ खे बोलणे लगया, “एबे आसाखे गवाह री कोई जरूरत निए कि एस आदमी ने क्या करी राख्या। तुसे एबु आपी सुणिला कि इने आपिखे परमात्मा रा पुत बोल्या। एबे तुसारा क्या फैंसला ए?”

सब यहूदी गुरुआ ने महापुरोहिता खे जवाब दिता, “ये मरने रे लायक ए!” तेबे तिनाने यीशु री आखिया पादें पट्टी बानी, तेस पादें थुक्या, तेसके कुटणे लगे ओर तेसरा मजाक उड़ाया।

पतरस बारे आँगणा बिचे बैठिरा था ओर एक सेवादारनिया ने से देख्या ओर बोल्या, “तूं बी तो यीशु रे साथे था!” पतरसा ने इन्कार करता। बादाते दूजी सेवादारनिया ने बी पतरसा खे देखिके येई गल्ल बोली कि तूं यीशु रे साथे था, ओर पतरसा ने फेर इन्कार करता। बादाते, कुछ लोका ने पतरसा खे बोल्या, “आसाखे पता ए कि तूं यीशु रे साथे था क्योंकि तुसे दोनो गलील जिले तेइए।”

तेबे पतरसा ने बोल्या, “अगर हाउं एस आदमी खे जाणु हुगा तो परमात्मा माखे श्राप देयो!” ओर पतरसा रे ये गल्ल बोलणे ते बाद, एकदम मुर्गे ने बाँग दिती। यीशु ने पीछे मुड़िके पतरसा री तरफ देख्या।

पतरस तेथे चलिगा ओर बारे जाइके जोरा-जोरा साथे रोणे लगया। तेसी समय, यीशु खे पकड़वाणे वाले यहूदा ने देख्या कि यहूदी गुरुआ ने यीशु खे दोषी ठैराइके मौत वाली सजा सुणाई। यहूदा बहुत दुखी हुइगा ओर तिने जाइके आपिखे फांसी लगाइली।

एबे तेस देशा रा राज्यपाल पिलातुस था जो रोमी सरकारा खातर काम करो था। इजिखातर यहूदी गुरु यीशु खे पिलातुसा गे लेइके आए। स्यो चाओ थे कि पिलातुस यीशु खे मौत वाली सजा देइके खत्म करदो। तेबे पिलातुसा ने यीशु ते पुछया, “क्या तूं यहूदियों रा राजा ए।”

यीशु ने जवाब दिता, “तैं ठीक बोल्या। पर मेरा राज्य एती तरती रा निए। अगर मेरा राज्य एती रा हुंदा तो मेरे सेवादार मेरे खातर लड़ने थे। हाउं तरती पादें परमात्मा री सच्चाई बताणे खातर आइरा। हर एक आदमी जो सच्चाइया साथे प्यार करोआ से मेरी सुणोआ।” पिलातुसा ने बोल्या, “तो सच्चाई क्या ए?”

यीशु साथे गल्ल करने ते बाद, पिलातुसा ने बारे जाइके लोकाखे बोल्या, “माखे एस आदमी बिचे मौत वाली सजा रे लायक कोई दोष नी मिलया।” पर यहूदी गुरुआ ने ओर भीड़ वाले लोका ने चिल्लाइके बोल्या, “एसके क्रुसा पादें चढ़ा!” पिलातुसा ने जवाब दिता, “एस आदमी ने कोई गलत काम नी करी राख्या।” पर स्यो ओर बी ऊची आवाजा बिचे चिल्लाणे लगे। तेबे पिलातुसा ने तीजी बार बोल्या, “ये आदमी दोषी निए!”

पिलातुस डरिगा कि भीड़ वाले लोका ने दंगा-फसाद शुरू करी देणा, इजिखातर से यीशु खे क्रुसा पादें चड़ाणे खातर मानिगा। रोमी सैनिका ने यीशु रे कोढ़े लगाए, ओर तेसके बैंगनी चोगा पैनाया, ओर तेसरे सिरा पादें कांडेया रा मुकट राख्या। तेबे स्यो ये बोलिके यीशु रा मजाक उड़ाणे लगे, “देखो, यहूदियों रा राजा!”