40. यीशु खे क्रूसा पादें चढ़ाया जाणा

यीशु रा मजाक उड़ाणे ते बाद, सैनिक तेसके क्रूसा पादें चढ़ाणे खातर लइगे। तिनाने से क्रुस तेसतेई उठवाया, जिजी पादें से मरना था।

स्यो सैनिक यीशु खे तेस जैगा बिचे लेइके आए, जेती खे खोपड़िया री जैगा बोल्या जाओआ, ओर तेती तिनाने तेसरे आथ-पैर क्रूसा पादें ठोकिते। पर यीशु ने बोल्या, “ए पिता परमात्मा, इनाखे माफ करदे, क्योंकि ये नी जाणदे कि ये क्या करने लगिरे।” पिलातुसा ने सैनिका खे यीशु रे क्रुसा पादें एक तख्ती लगाणे रा आदेश दिता ओर तेस तख्ती पादें लिख्या कि, “यीशु यहूदियो रा राजा ए।”

तेबे सैनिका ने यीशु रे टाले आपी-पिछिए बांडणे खातर परचिया डालिया कि केसके क्या मिलणा। जेबे तिनाने एड़ा किता तो तिनाने ये भविष्यवाणी पूरी किती, जिचे बोल्या गइरा, “तिनाने मेरे टाले आपी-पिछिए बांडिले ओर तिजिखे पाणे खातर तिजी पादें परचिया डालिया।”

जेती यीशु क्रूसा पादें चढ़ाया गया तेती दो डाकू बी थे जो सैनिका ने तेसी समय क्रुसा पादें चढ़ाए थे। एक यीशु रे दाएं तरफ ओर दूजा बाएं तरफ। तिना दोनो बिचे ते एकी ने यीशु री निन्दा करिके बोल्या, अगर तूं मसीह ए तो आसाखे ओर आपिखे बचाइले। पर दुजे ने तेसके बोल्या, “क्या तूं परमात्मा री सजा ते नी डरदा? आसे तो दोनो आपणे बुरे कामा री सजा पाणे लगिरे, पर इने कोई बुरा काम नी करी राख्या ये आदमी निर्दोष ए।” फेर तिने यीशु खे बोल्या कि, “जेबे तूं आपणे राज्य बिचे आओगा तो माखे याद राख्या।” यीशु ने जवाब दिता, “तूं आज ही मेरे साथे स्वर्गा बिचे हुणा।”

तेथे बाद यहूदी गुरु ओर भीड़ वाले लोक ये बोलिके यीशु री निन्दा करने लगे “अगर तूं परमात्मा रा पुत ए, तो आपिखे बचा ओर क्रुसा पादें ते उतरिके थाले आओ! तेबे आसे तेरे पादें परोसा करुंगे।”

तेबे तेस पूरे देशा बिचे नेरा छाइगा, बेशक ये दिन का समय था। ये नेरा दिन के समय छाया था ओर लगभग तीन कंटे तक छायादा रया था।

तेबे यीशु ने पुकारिके बोल्या, “पूरा हुआ! ए पिता परमात्मा, हाउं आपणी आत्मा तेरे आथा बिचे देउँए।” तेबे यीशु ने सिर झुकाइके आपणे प्राण छाडिते। जेबे यीशु मरया, तो एक भूकंप हुआ। ओर मन्दरा रा बड़ा पर्दा जो सबी खे पवित्र जैगा बिचे जाणे ते रोको था पादें ते लेइके थाले तक फटिके तिजिरे दो भाग हुइगे।

आपणी मौता रे जरिए यीशु ने लोका खातर परमात्मा गे जाणे री बाट खोलती। जेबे यीशु री निगरानी करने वाले एक सैनिका ने ये सब देख्या तो तिने बोल्या, “ये आदमी निर्दोष था। सच्चेई ये परमात्मा रा पुत था।”

तेबे युसुफ ओर निकुदेमुस नावां रे दो यहूदी गुरु आए। स्यो परोसा करो थे कि यीशु ही मसीह था। तिनाने पिलातुसा गे जाइके यीशु रा शरीर माँगया। तिनाने तेसरा शरीर चमकदार चादरी बिचे लपेटया। ओर जो कब्र चटाना बिचे बणाई राखी थी तिजी बिचे राखिता। ओर तेस कब्रा रे दरवाजे पादें एक बड़ा सारा पात्थर राखिता।