41. यीशु रा मरेयादे बिचे ते जी उठणा

जेबे सैनिका ने यीशु क्रूसा पादें चढ़ाइता तो तेथे बाद, यहूदी गुरुआ ने पिलातुसा खे बोल्या, “तेस चुठे, यीशु ने बोल्या था कि, “हाउं तीजे दिना मरेयादे बिचे ते जी उठणा। ये देखणे खातर आसाखे कब्रा री निगरानी करनी चइयो, केथी एड़ा ना हो कि तेसरे चेले तेसरा शरीर चुराइके लई जाओ ओर बादा ते बोलिदो कि से मरेयादे बिचे ते जी उठिगा।”

पिलातुसा ने बोल्या, “कुछ सैनिका खे लेई जाओ, ओर आपणी समझा रे अनुसार कब्रा री निगरानी करो।” इजिखातर तिनाने कब्रा रे दरवाजे पादें राखेदे पाथरा पादें मोहर लगाइती ओर निगरानी करने खातर सैनिका रा पैहरा लगाइता, ताकि कोई बी तेसरा शरीर चुराई ना सको।

यीशु रे मरने ते बाद, आगला दिन सब्त वाला दिन था। कोई बी सब्त वाले दिन काम नी करी सको था, इजिखातर यीशु रा कोई बी दोस्त कब्रा पादें नी आया था। पर सब्त वाले दिना ते आगले दिना सबेरा तड़केई कई ज्वाणसा यीशु री कब्रा पादें जाणे खातर तैयार हुइया। स्यो यीशु रे शरीरा पादें ओर बी खुशबूदार चीजा लगाणा चाओ थिया।

तिना ज्वाणसा रे पौंचणे ते पैले, कब्रा पादें एक बड़ा भूंकप हुआ। स्वर्गा ते एक स्वर्गदूता ने आइके से पात्थर कनारे हटाइता जो कब्रा रे दरवाजे पादें राखी राख्या था ओर तिजी पादें बैठिगा। ये स्वर्गदूत रोशनी री तरह चमकणे लगिरा था। जो सैनिक कब्रा री निगरानी करने लगिरे थे तिनाने से स्वर्गदूत देख्या। स्यो इतने जादा डरिगे कि मुर्दे री तरह जमीना पादें गिर पड़े।

जेबे स्यो ज्वाणसा कब्रा पादें पौंचिया तो तेस स्वर्गदूता ने तिनाखे बोल्या, “डरो मत। यीशु एती निए। से मरेयादे बिचे ते जी उठिगादा, जेड़ा कि तिने बोल्या था, कि हाउं जी उठणा! कब्रा बिचे टोलो ओर देखो।” तेबे स्यो ज्वाणसा कब्रा बिचे जाइके यीशु रा शरीर टोलने लगिया ओर तिनाने देख्या कि यीशु रा शरीर एती निए!

तेबे तेस स्वर्गदूता ने तिना ज्वाणसा खे बोल्या, “जाओ ओर जाइके तेसरे चेल्या खे बताओ कि, “यीशु मरेयादे बिचे ते जी उठिगादा ओर से तुसाते पैले गलील जिले खे जाणा।”

स्यो ज्वाणसा चौंकिगिया ओर बहुत खुश हुइया। स्यो चेल्या खे ये शुभ समाचार सुणाणे खातर नठिया।

जेबे स्यो ज्वाणसा चेल्या खे ये शुभ समाचार बताणे खातर जाणे लागिरिया थिया, तो बाटा बिचे यीशु तिना सामणे परगट हुआ। स्यो तेसरे पैरा बिचे गिर पड़िया। तेबे यीशु ने बोल्या, “डरो मत। जाइके मेरे चेल्या खे बोलो कि गलील जिले खे चली जाओ। तिनाने हाउं तेती देखणा।”