42. यीशु रा स्वर्गा खे वापस जाणा

जेस दिना परमात्मा ने यीशु मरेयादे बिचे ते जिउंदा किता, तेसी दिना तेसरे दो चेले नजदीक वाले गावाँ बिचे जाणे लगिरे थे। ओर चलदे हुए जो कुछ यीशु साथे हुआ था तिजिरे बारे चे गल्ला करने लगिरे थे, स्यो बोलणे लगिरे थे कि से मसीह था, पर तेबे बी से मारया गया। एबे स्यो ज्वाणसा बोलणे लगिरिया थिया कि यीशु दोबारा जिउंदा हुइगादा। स्यो नी जाणो थे, कि केस गल्ला पादें परोसा करना ए।

यीशु आइके तिना चेल्या साथे चलने लगया, पर स्यो तेसके पैछाणी नी सके। यीशु ने तिनाते पुछया, कि तुसे केस बारे चे गल्ल करने लगिरे। तिनाने तेसके पिछले दिना बिचे यीशु साथे हुइदी सारी घटना रे बारे चे बताया। तिनाने सोच्या, कि आसे केस परदेशी आदमी साथे गल्ला करने लगिरे, जो नी जाणदा, कि यरुश्लेम सैरा बिचे क्या हुआ था।

तेबे यीशु ने तिनाखे समझाया कि परमात्मा रा वचन मसीह रे बारे चे क्या बोलोआ। बहुत समय पैले, भविष्यद्वक्ताओं ने बोल्या था कि बुरे लोका ने मसीह बहुत पीड़ित करना ओर तिनाने से खत्म करी देणा। पर भविष्यद्वकताओं ने ये बी बोल्या था कि से तीजे दिना मरेयादे बिचे ते जी उठणा।

जेबे स्यो तेस नगरा बिचे पौंचे जेती स्यो दो जणे ठैरना चाओ थे, तब तक लगभग सँझ हुइगी थी। तिनाने यीशु खे आपी साथे ठैरने खातर बोल्या, तेबे यीशु तिनारे साथे एक करा बिचे गया। ओर स्यो सँझ का खाणा खाणे बैठे। यीशु ने एक रोटी लेई ओर तिजी खातर परमात्मा खे धन्यवाद दिता, ओर फेर से रोटी तोड़ी। तेबे एकदम तिनाखे पता लगिगा, कि ये यीशु ए। पर तब तक से तिनारी नजरी ते गायब हुइगा था।

स्यो दो जणे एक दुजे खे बोलणे लगे, “ये यीशु था! जेबे तिने आसाखे परमात्मा रा वचन समझाया, तो आसे बहुत उत्साहित थे? स्यो एकदम यरुशलेम सैरा खे वापस चलिगे। जेबे स्यो पौंचे तो तिनाने बाकी चेल्या खे बताया कि, “यीशु सच्चेई जिउंदा हुइगादा! आसे से देख्या!”

जेबे चेले गल्ल करने लगिरे थे, तेबे यीशु अचानक तेस कमरे बिचे तिनारे सामणे परगट हुआ। यीशु ने बोल्या, “तुसाखे शान्ति मिलो!” चेल्या ने सोच्या, कि ये कोई भूत ए, पर यीशु ने बोल्या, “तुसे कउं डरने लगिरे?” तुसे ये कउं नी सोचदे कि ये सच्चेई हाउं यीशु ए? मेरे आथा-पैरा खे छुइके देखो। क्योंकि भूता रे हड्डी ओर माँस नी हुंदा जेड़ा तुसे मेरे बिचे देखोए। यीशु ने ये दखाणे खातर कि हाउं भूत निए तिनाते कुछ खाणे खातर माँगया?” तिनाने पुजिदी मछली रा टुकड़ा दिता, ओर यीशु ने से टुकड़ा लेइके तिनारे सामणे खाया।

यीशु ने बोल्या, मेरे बारे चे पवित्रशास्त्रा बिचे लिख्यादा वचन जो कुछ बी बोलोआ से सब पूरा हुणा। मैं तुसाखे बताया था कि ये सब हुणा जरूरी ए। तेबे यीशु ने तिनाखे परमात्मा रा वचन अच्छे ते समझाया। तिने बोल्या, “बहुत समय पैले भविष्यद्वकताओं ने लिख्या था, “मसीह खे यानी माखे बहुत जादा दुख उठाणा पड़ना, मरना पड़ना ओर फेर तीजे दिना मरेयादे बिचे ते जी उठणा पड़ना।”

“तिना भविष्यद्वकताओं ने ये बी लिख्या था कि मेरे चेल्या ने परमात्मा रे वचना रा प्रचार करना ओर तिनाने हर एक आदमी खे बताणा कि आपणे पापा रा पछतावा करो। अगर स्यो एड़ा करोगे तो परमात्मा ने तिनारे पाप माफ करने। मेरे चेल्या ने एस शुभ समाचारा रा प्रचार यरूशलेम सैरा ते शुरू करना। तेबे स्यो सब जैगा सब बरादरिया बिचे जाणे, तुसे मेरी हर गल्ला रे ओर कामा रे गवाह ए जो मैं बोल्या ओर किता था, ओर जो कुछ मेरे साथे हुआ।”

अगले चाली दिना तक, यीशु आपणे चेल्या सामणे कई बार परगट हुआ। एक बार तो से एकी समय पादें लगभग 500 ते जादा लोका सामणे परगट हुआ। यीशु ने आपणे चेल्या खे कई तरीके ते साबित किता कि हाउं जिउंदाए, ओर यीशु ने तिनाखे परमात्मा रे राज्य रे बारे चे शिक्षा दिती।

यीशु ने आपणे चेल्या खे बोल्या, परमात्मा ने स्वर्ग ओर तरती रा सारा अधिकार माखे देई राख्या। इजिखातर एबे हाउं तुसाखे बोलूंए कि जाओ ओर सब बरादरिया रे लोकाखे चेले बणाओ। ओर तिनाखे पिता परमात्मा, पुत ओर पवित्रआत्मा रे नावां ते बपतिस्मा देयो। जो कुछ बी मैं तुसाखे आदेश दिते, से सब आदेश तुसे मानो ओर लोकाखे मानणा सिखाओ। याद राख्यो हाउं हमेशा तुसारे साथे रौणा।”

यीशु रे मरेयादे बिचे ते जी उठणे ते चाली दिन बाद, तिने आपणे चेल्या खे बोल्या, “जब तक मेरा पिता परमात्मा तुसाखे सामर्थ्य नी देदां तब तक यरूशलेम सैरा बिचेई ठैरेदे रयो। तिने तुसा पादें पवित्रआत्मा पेजणे रे जरिए एड़ा करना।” प्रभु यीशु तिना साथे गल्ला करने ते बाद स्वर्गा बिचे उठा लिया गया ओर एक बादला ने से तिनारी नजरी ते छुपाइला। यीशु स्वर्गा बिचे सब चीज़ा पादें शासन करने खातर परमात्मा रे दाएं तरफ बैठिगा।