43. कलीसिया री शुरुवात हुणा

यीशु रे स्वर्गा खे वापस जाणे ते बाद, चेले यरूशलेम सैरा बिचेई ठैरे जेड़ा कि यीशु ने तिनाखे करने रा आदेश दिता था। ओर तेती बिसवासी लोक लगातार प्रार्थना करने खातर एक साथ कट्ठे होया करो थे।

हर साल, फसह त्योआरा रे 50 दिन बाद, यहूदी लोक पिन्तेकुस्त नावां रा एक खास दिन मनाया करो थे। पिन्तेकुस्त वाले दिन यहूदी लोक कणका री बडाई री खुशी मनाया करो थे। सारे संसारा ते यहूदी लोक पिन्तेकुस्त वाला दिन एक साथे मनाणे खातर यरूशलेम सैरा बिचे आए थे। एस साल, पिन्तेकुस्त मनाणे रा समय यीशु रे स्वर्गा खे चले जाणे ते लगभग एक हप्ता बाद आया था।

पिंतेकुस्त वाले दिन सारे बिसवासी लोक एक साथ कट्ठे थे, जेस करा बिचे स्यो थे तेती अचानक तेज हव्वा री अवाज हुई जेथे सारा कर गुन्जिगा। तेबे तिनारे सामणे आगी रिया एड़िया लपटा परगट हुइया जो अलग हुइके हर आदमी रे सिरा पादें आइगिया। स्यो सब पवित्रआत्मा साथे परिपूर्ण हुइगे ओर दुजी भाषा बिचे परमात्मा री स्तुति करने लगे। स्यो इना भाषा खे नी जाणो थे। ये से भाषा थी जिजिखे बोलणे खातर स्यो पवित्रआत्मा ने लायक किते थे।

जेबे यरूशलेम सैरा बिचे रौणे वाले लोका ने से आवाज सुणी, तो ये देखणे खातर सारे लोक एक साथ आए कि ये क्या हुणे लगिरा। तिनाने बिश्वासी लोक परमात्मा रे जरिए किते गए बड़े-बड़े कामा री घोषणा करदे हुए सुणे। स्यो चौंकिगे थे क्योंकि बेशक स्यो अलग-अलग देशा ते आइरे थे ओर अलग-अलग भाषा बोलो थे पर फेर बी स्यो तिना कामा खे आपणी भाषा बिचे सुणने लगिरे थे। चेले इस्राएल देशा ते थे ओर अरामी, इब्रानी, ओर यूनानी भाषा बोलो थे, पर लोक आपणी-आपणी भाषा बिचे सुणने लगिरे थे कि परमात्मा ने क्या-क्या किता।

इना बिचे ते कुछ लोका ने बोल्या, कि स्यो चेले नशे बिचे थे। पर पतरस खड़ा हुआ ओर तिनाखे बोल्या, “मेरी गल्ल सुणो! ये लोक नशे बिचे निए! इजिरे बजाए जो तुसे देखोए ये सेइए जो योएल भविष्यद्वक्ता ने बोल्या था कि ये हुणा। परमात्मा ने बोल्या, “अंत वाले दिना बिचे मैं सब आदमी आपणी आत्मा साथे परी देणी।”

“ए इस्राएली लोको, यीशु एक एड़ा आदमी था, जिने ये दिखाणे खातर कि हाउं कुणे बहुत सारे अनोखे काम किते थे। तिने परमात्मा री सामर्थ्य ते बहुत सारे अनोखे काम किते थे। तुसाखे ये पता ए, क्योंकि तुसे ये सब काम देखी राखे। पर तुसे से क्रूसा पादें चढ़ाइके मारता!”

“यीशु मरीगा था पर परमात्मा ने से मरेयादे बिचे ते जिउंदा करता। परमात्मा ने से गल्ल पूरी करती जो एक भविष्यद्वक्ता ने लिखी थी: कि ‘तैं आपणा पवित्र जन कब्रा बिचे नी सड़ने देणा।’ आसे गवाह ए कि परमात्मा ने यीशु मरेयादे बिचे ते दोबारा जिउंदा किता।”

“पिता परमात्मा ने एबे यीशु खे आपणे दाएं तरफ बैठाइके तेसके आदर दिता। ओर यीशु ने आसा खातर पवित्रआत्मा पेजी जिजिरा तिने वादा किता था कि हाउं पेजूंगा। ये सब काम पवित्रआत्मा करने लगिरी जो तुसे देखोए ओर सुणोए।”

“तुसे से आदमी यानी यीशु क्रुसा पादें चढ़ाइके मारता, पर तुसे ये जाणिलो कि परमात्मा ने यीशु सब चिजा पादें प्रभु ओर मसीह दोनो ठैरायादा।”

पतरसा री गल्ल सुणने वाले लोक तेसरी गल्ला ते आंदरा तक हिलिगे थे। इजिखातर तिनाने पतरस ओर चेल्या ते पुछया, “ए पाइयो, आसाखे क्या करना चइयो?”

पतरसा ने तिनाखे जवाब दिता, “तुसा बिचे हर एक आपणे पापा रा पछतावा करो, ताकि परमात्मा तुसारे पाप माफ करदो, ओर यीशु मसीह रे नावां ते बपतिस्मा लेयो। तेबे तिने तुसाखे पवित्रआत्मा रा वरदान बी देणा।”

पतरसा री गल्ल सुणिके लगभग 3,000 लोका ने यीशु पादें परोसा किता ओर स्यो यीशु रे चेले बणिगे। तिनाने बपतिस्मा लेया ओर यरूशलेम सैरा री कलीसिया रा हिस्सा बणिगे।

जेबे प्रेरिता ने तिनाखे शिक्षा दिती, तो बिसवासी लोका ने लगातार शिक्षा सुणी। स्यो एक साथ कट्ठे हुइके संगती करया करो थे ओर एक-दूजे खातर प्रार्थना करया करो थे। स्यो मिलिके परमात्मा री स्तुति करो थे ओर जो बी तिनागे था तिजिखे आपी-पिछिए बांडिलो थे। नगरा रा हर एक आदमी तिनारे प्रति अच्छा विचार राखो था। दिन-प्रतिदिन जादा ते जादा लोक बिसवासी बणदे गए।