44. पतरस ओर यूहन्ना रे जरिए लंगड़े भिखारी खे चंगा करना

एक दिन, पतरस ओर यूहन्ना प्रार्थना करने खातर मन्दरा बिचे गए। एक लंगड़ा आदमी भीख माँगणे खातर दरवाजे पादें बैठिरा था।

पतरसा ने तेस लंगड़े आदमी री तरफ देख्या ओर बोल्या, “ताखे देणे खातर मागें पैसे तो निए। पर जो मागें हाए, से हाउं ताखे देउंए। यीशु रे नावां ते, उठ ओर चलने-फिरने लग!”

एकदम परमात्मा ने से लंगड़ा आदमी चंगा करता। से ओर-पोरे चलने-फिरने, कूदणे, ओर परमात्मा री स्तुति करने लगया। मन्दरा रे आँगणा बिचे खड़ेदे लोक तेसखे देखिके चौंकिगे।

लोका री एक भीड़ तेस आदमी खे देखणे आई जो ठीक हुइगा था। पतरसा ने तिनाखे बोल्या कि, “तुसे एसके ठीक देखिके चौंको मत? आसे ये आपणी शक्तिया साथे नी किता चंगा। बल्कि, से यीशु ए जिने ये आदमी आपणी शक्तिया साथे चंगा किता, क्योंकि आसे यीशु पादें परोसा करुँ।”

“से तुसेई ए जिनाने राज्यपाल पिलातुसा खे बोल्या था कि यीशु खे मारदे। तुसे से मारता जो सबी खे जीवन देयोआ। पर परमात्मा ने से मरेयादे बिचे ते जिउंदा किता। तुसे नी समझया, कि तुसे क्या करने लगिरे थे, पर जेबे तुसे तिना कामा खे करने लगिरे थे, तो जो भविष्यद्वकताओ ने बोल्या था से पूरा हुआ। तिनाने बोल्या था कि मसीह ने दुख उठाणा, ओर से मरी जाणा। परमात्मा ने ये एस तरीके ते हुणे दिता। इजिखातर ऐबे पछतावा करो ओर परमात्मा री तरफ मुड़ो, ताकि से तुसारे पाप तोइके साफ करदो।”

जेबे मन्दरा रे यहूदी गुरुआ ने पतरस ओर यूहन्ना रिया गल्ला सुणिया, तो स्यो बहुत जादा कबराइगे। इजिखातर तिनाने स्यो गिरफ्तार करिके जेला बिचे बंद करते। पर पतरसा रिया गल्ला ते बहुत सारे लोका ने यीशु पादें परोसा किता। ओर यीशु पादें परोसा करने वाले लोका री गिणती बढ़िके लगभग 5000 हुइगी।

दूजे दिना एड़ा हुआ कि स्यो यहूदी गुरु पतरस ओर यूहन्ना खे महापुरोहित ओर दूजे तार्मिक गुरुआ रे सामणे लेइके आए। स्यो तेस आदमी खे बी लेइके आए जो लंगड़ा था। तिनाने पतरस ओर यूहन्ना ते पुछया, “एस लंगड़े आदमी खे ठीक करने री सामर्थ्य ओर अधिकार तुसाखे किने दिता?”

पतरसा ने जवाब दिता, “ये आदमी जो तुसारे सामणे खड़िरा ये यीशु मसीह री सामर्थ्य ते चंगा हुआ। तुसे यीशु क्रूसा पादें चढ़ाइता था, पर परमात्मा ने से दोबारा जिउंदा करता! तुसे तेसके स्वीकार करने ते इनकार किता, पर यीशु री सामर्थ्य ते अलावा उद्धार पाणे रा ओर कोई जरिया निए!

स्यो तार्मिक गुरु पतरस ओर यूहन्ना रिया गल्ला सुणिके चौंकिगे थे। तिनाने देख्या कि ये आम आदमी थे जो कि अनपढ़ थे। पर फेर तिनाखे याद आया कि ये आदमी यीशु रे साथे रओ थे। इजिखातर तिनाने पतरस ओर यूहन्ना खे बोल्या, “अगर तुसे यीशु रे बारे चे लोकाखे कोई ओर समाचार सुणाया, तो आसे तुसाखे खतरनाक सजा देणी।” एड़िया बहुत सारिया गल्ला बोलणे ते बाद, तिनाने पतरस ओर यूहन्ना डराई-धमकाइके छाडिते।