45. स्तिफनुस ओर फिलिप्पुस

पैले रे मसीही गुरुआ बिचे स्तिफनुस नावां रा एक आदमी था। सब लोक तेसरा आदर करो थे। पवित्रआत्मा ने तेसके बहुत जादा सामर्थ्य ओर बुद्धि दिती थी। स्तिफनुसा ने बहुत सारे चमत्कार किते थे। जेबे तिने यीशु पादें परोसा करने रे बारे चे लोकाखे शिक्षा दिती, तो तेसरी शिक्षा ते बहुत सारे लोका ने यीशु पादें परोसा किता।

एक दिन, स्तिफनुस यीशु रे बारे चे शिक्षा देणे लगिरा था, ओर कुछ एड़े यहूदी आए जिनाने यीशु पादें परोसा नी किता था, तिनाने तेस साथे बैहसबाजी करनी शुरू करती। स्यो बहुत गुस्सा हुइगे, इजिखातर स्यो तार्मिक गुरुआ गे गए ओर तेसरे बारे चे चुठ बोल्या। तिनाने बोल्या, “आसे स्तिफनुस मूसा ओर परमात्मा रे बारे चे बुरिया गल्ला बोलदे हुए सुणया!” इजिखातर तार्मिक गुरुआ ने स्तिफनुस पकड़िके गिरफ्तार करिला ओर तेसके महापुरोहित ओर यहूदियों रे दूजे गुरुआ रे सामणे लेइके आए। ओर बी चुठे गवाह आए ओर तिनाने स्तिफनुसा रे बारे चे चुठ बोल्या।

महापुरोहिता ने स्तिफनुसा ते पुछया, “क्या ये लोक तेरे बारे चे सच्च बोलणे लगिरे?” स्तिफनुसा ने महापुरोहिता खे जवाब देणे खातर बहुत सारिया गल्ला बोलिया। तिने बोल्या कि अब्राहमा रे समय ते यीशु रे समय तक परमात्मा ने इस्राएली लोका खातर बहुत सारे अनोखे काम करी राखे। पर लोका ने हमेशा परमात्मा रा आदेश नी मान्या था। स्तिफनुसा ने बोल्या, “तुसे परमात्मा रे खिलाप जिद्दी ओर विद्रोह करने वाले लोक ए। तुसे हमेशा पवित्रआत्मा स्वीकार नी किती, जियां कि आसारे बजुर्गा ने हमेशा पवित्रआत्मा स्वीकार नी किती थी ओर हमेशा तेसारे भविष्यद्वक्ता मारते थे। पर जो तिनाने किता था तिजिरी तुलना बिचे तुसे ओर बी बुरा काम करी राख्या! तुसे मसीह मारता।”

जेबे तिना तार्मिक गुरुआ ने ये सुणया, तो स्यो इतने जादा गुस्सा हुइगे कि तिनाने आपणे कान बंद करिले ओर ऊची आवाज़ा बिचे चिल्लाए। स्यो स्तिफनुसा खे घसिटिके नगरा ते बारे लेइगे ओर तिनाने तेसके खत्म करने खातर तेसरे पाथर मारे।

जेबे स्तिफनुस मरने लगिरा था, तिने उठिके पुकारया, “ए यीशु, मेरी आत्मा खे आपी गे लेइले!” तेबे से आपणे घुटणे रे बल गिरया ओर तिने फेर पुकारया, “ए प्रभु, ये पाप इना पादें नी लगाया।” तेबे से मरिगा।

तेस दिना, यरूशलेम सैरा बिचे रौणे वाले बहुत सारे लोका ने मसीही लोकाखे सताणा शुरू करता, इजिखातर बिसवासी लोक दूजी जैगा खे नाठिगे। पर इजिरे बावजूद बी, जेती-केथी बी स्यो गए तिनाने यीशु रे बारे चे प्रचार किता।

फिलिप्पुस नावां रा एक आदमी यीशु रा बिसवासी था। जियां कि दुजे बिसवासी लोक नठे से बी यरूशलेम सैरा ते नठिगा। से सामरिया रे नगरा बिचे चलिगा। तेती तिने लोका बिचे यीशु रे बारे चे प्रचार किता। बहुत सारे लोका ने तेसरी शिक्षा ते यीशु पादें परोसा किता, ओर उद्धार पाया। एक दिन, फिलिप्पुसा गे परमात्मा री तरफा ते एक स्वर्गदूत आया, ओर तेसके सुनसाण जैगा बिचे जाणे खातर, ओर एक सड़का बिचे चलने खातर बोल्या। फिलिप्पुस तेती चलिगा। जेबे से तेस सड़का बिचे चलने लगिरा था, तो तिने एक आदमी आपणे रथा बिचे जांदा हुआ देख्या। ये आदमी कूश देशा रा एक खास अधिकारी था। पवित्रआत्मा ने फिलिप्पुसा खे बोल्या कि जाइके एस आदमी रे साथे-साथे चल ओर एस साथे गल्ला कर।

इजिखातर फिलिप्पुस रथा गे गया। तिने सुणया कि से कुशी अधिकारी परमात्मा रा वचन पढ़ने लगिरा था। जो यशायाह भविष्यद्वक्ता ने लिख्या था। से पढ़ने लगिरा था, “स्यो तेसके बाडी जाणे वाली पेडा री तरह लइगे, ओर जियां एक पेडा रा बच्चा ऊन कतरदे समय चुपचाप रओआ, तियांई तिने बी कुछ नी बोल्या। तिनाने तेस साथे बुरा बर्ताव किता ओर तेसरा आदर नी किता। तिनाने तेसरे प्राण लेइले।”

किलिप्पुसा ने तेस कूशी अधिकारी ते पुछया, “जो तूं पढ़ने लगिरा क्या तूं इजिखे समझो बी ए?” तेस कूशी आधिकारी ने जवाब दिता, “नई। जब तक माखे किने समझाया निए, तब तक हाउं इजिखे नी समझी सकदा। किरपा करिके मागें आइके बैठ ओर माखे समझया। क्या यशायाह ये आपणे बारे चे लिखणे लगिरा था या केस ओरी रे बारे चे?”

फिलिप्पुस रथा पादें चढ़िके बैठिगा। तेबे तिने तेस कुशी अधिकारी खे से वचन समझाया, जो यशायाह ने यीशु रे बारे चे लिख्या था। फिलिप्पुसा ने तेसके परमात्मा रे ओर बी वचन बताए। एस तरह तिने तेस कूशी अधिकारी खे यीशु रे बारे चे शुभ समाचार सुणाया ओर तेस अधिकारी ने यीशु पादें परोसा किता।

फिलिप्पुस ओर से कूशी अधिकारी यात्रा करदे हुए नदी रे कनारे आए। तेस कूशी अधिकारी ने बोल्या, “देख! एती पाणी ए! क्या हाउं बपतिस्मा लेई सकूंआ।” फिलिपुसा ने बोल्या, “अगर तूं आपणे पूरे मना ते यीशु पादें परोसा करोआ, तो तूं लेई सकोआ।” तिने बोल्या हाउं परोसा करूआ कि यीशु ही परमात्मा रा पूत ए। तेबे तिने आपणे सारथी खे रथ रोकणे खातर बोल्या।

तेबे स्यो पाणी बिचे चलिगे, ओर फिलिप्पुसा ने तेस कूशी अधिकारी खे बपतिस्मा दिता। जेबे स्यो पाणी बिचे ते बारे आए, तो पवित्रआत्मा री सामर्थ्य ते फिलिप्पुस अचाणक दूजी जैगा बिचे पौंचिगा। तेती फिलिप्पुसा ने लोकाखे यीशु रे बारे चे बताणा जारी राख्या।

से कूशी अधिकारी खुश हुदां हुआ आपणे सैरा खे वापस चलिगा। क्योंकि से एबे यीशु रे बारे चे जाणिगा था।