46. पौलुस मसीह रा बिसवासी बणी जाओआ

शाऊल नावां रा एक आदमी था जिने यीशु पादें परोसा नी किता था। जेबे से जवान था, तेबे तिने स्तिफनुसा खे मारने वाले लोका रे टालेया री निगरानी किती थी। बादा ते, तिने बिसवासी लोक सताए थे। तिने यरूशलेम सैरा बिचे करे-करे जाइके मर्द ओर ज्वाणस गिरफ्तार करिके जेला बिचे बंद करते थे। तेबे महापुरोहिता ने शाऊला खे दमिश्क सैरा बिचे जाणे री इजाजत दिती। महापुरोहिता ने तेसके बोल्या कि दमिश्क सैरा बिचे जा ओर तेती रे मसीही लोकाखे गिरफ्तार करिके वापस यरूशलेम सैरा बिचे लेइके आओ।

तेबे शाऊला ने दमिश्क सैरा बिचे जाणे री यात्रा शुरू किती। तेस सैरा बिचे पौंचणे ते थोड़ा जा पैले तेसरे चारो तरफ आसमाणा ते एक चमकदार रोशनी चमकी, ओर से जमीना पादें गिर पड़या। शाऊला ने कोई ये बोलदे हुए सुणया, “ए शाऊल! ए शाऊल! तूं माखे कउं सताणे लगिरा?” शाऊला ने पुछया, “ए प्रभु, तूं कुणे?” यीशु ने तेसके जवाब दिता, “हाउं यीशु ए। तूं माखे सताणे लगिरा!”

जेबे शाऊल उठया, तो से देखी नी सको था। तेसरे दोस्त तेसके दमिश्क सैरा बिचे लेइके गए। शाऊला ने तीन दिन तक कुछ बी नी खाया-पिया।

दमिश्क सैरा बिचे हनन्याह नावां रा एक यीशु रा चेला था। परमात्मा ने तेसके बोल्या, “तेस करा बिचे जा जेती शाऊल ठैरिरा। ओर आपणा आथ तेस पादें राख ताकि से दोबारा देखणे लगी जाओ।” पर हनन्याह ने बोल्या, “ए प्रभु, मैं सुणया कि एस आदमी ने बिसवासी लोक सताए।” परमात्मा ने तेसके जवाब दिता, “जा! मैं से यहूदी लोका बिचे ओर दुजी बरादरी रे लोका बिचे मेरे नावां री घोषणा करने खातर चुणिलादाए। तिने मेरे नावां खातर बहुत कष्ट सैणा।”

तेबे हनन्याह शाऊला गे गया, ओर आपणा आथ तेस पादें राखिके बोल्या, “यीशु, जो एती आउदें हुए ताखे बाटा बिचे दिख्या था, तिनेई हाउं तागें पेजी राख्या ताकि तूं दोबारा देखणे लगी जाओ, ओर पवित्रआत्मा साथे परिपूर्ण हुई जाओ।” एकदम शाऊला री नजर वापस आइगी ओर से दोबारा देखणे लगया, ओर हनन्याह ने तेसके बपतिस्मा दिता। तेबे शाऊला ने खाणा खाया, ओर तेस बिचे फेर ताकत आइगी।

तेसी समय ते, शाऊला ने दमिशक सैरा बिचे रौणे वाले यहूदी लोका बिचे प्रचार करना शुरू करता। तिने बोल्या, “यीशु ही परमात्मा रा पुत ए!” यहूदी लोक चौंकिगे थे, क्योंकि शाऊला ने बिसवासी लोकाखे मारने री कोशिश किती थी, पर ऐबे से यीशु रा बिसवासी बणिगा था। शाऊला ने यहूदी लोका साथे वाद-विवाद किता। तिने दिखाया कि यीशु ही मसीह ए।

बहुत दिना बाद, यहूदी लोक ने शाऊला खे खत्म करने री योजना बणाई। तिनाने तेसके मारने खातर नगरा रे मुख्य दरवाजे पादें लोक पेजे। कि तेसरी निगरानी करो पर शाऊला ने तेस योजना रे बारे चे सुणिला, ओर तेसरे दोस्ता ने बचिके निकलने बिचे तेसरी मदत किती। एक राती तिनाने से टोकरिया बिचे बिठाइके नगरा री दीवारा ते थाले उतारता। दमिश्क सैरा बिचे ते बचिके निकलने ते बाद, शाऊला ने यीशु रे बारे चे प्रचार करना जारी राख्या।

शाऊल खास चेल्या साथे मिलणे खातर यरूशलेम सैरा खे गया, पर स्यो तेसते डरो थे। तेबे बरनबास नावां रा एक बिसवासी शाऊला खे खास चेल्या गे लेइके गया। तिने तिनाखे बताया कि शाऊला ने कियां हिम्मत करिके दमिश्क सैरा बिचे प्रचार किता था। तेथे बाद, खास ने शाऊल स्वीकार करिला।

कुछ बिसवासी जो यरूशलेम सैरा बिचे सताए जाणे रे कारण नठिगे थे, स्यो दूर अंताकिया नगरा बिचे चलिगे थे ओर यीशु रे बारे चे प्रचार करो थे। अंताकिया नगरा बिचे रौणेवाले लोक जादातर यहूदी नी थे, पर पैली बार, स्यो लोक जो यहूदी नी थे बिसवासी बणिगे। बरनबास ओर शाऊल इना नए बिसवासी लोकाखे यीशु रे बारे चे ओर जादा सिखाणे खातर तेती गए, ओर कलीसिया मजबूत किती। यीशु पादें परोसा करने वालेया खे पैली बार अंताकिया नगरा बिचेई मसीही बोल्या गया।

एक दिन, अंताकिया नगरा रे मसीही लोक व्रत राखिके प्रार्थना करने लगिरे थे। पवित्रआत्मा ने तिनाखे बोल्या, “मेरे खातर बरनबास ओर शाऊला खे तेस काम करने खातर अलग करदो, जेस काम करने खातर मैं स्यो बुलाई राखे।” इजिखातर अंताकिया नगरा री कलीसिया ने बरनबास ओर शाऊला खातर प्रार्थना किती, ओर तिना पादें आपणे आथ राखे। तेबे तिनाने स्यो यीशु रे बारे चे शुभ समाचार प्रचार करने खातर दूजी जैगा बिचे पेजिते। बरनबास ओर शाऊला ने अलग-अलग बरादरिया रे लोकाखे शिक्षा दिती, ओर बहुत सारे लोका ने यीशु पादें परोसा किता।