47. फिलिप्पी नगरा बिचे पौलुस ओर सीलास

जेबे शाऊला ने पूरे रोमी सम्राज्य बिचे यात्रा किती, तो तिने आपणा रोमी नाओं “पौलुस” उपयोग करना शुरू करता। एक दिन, पौलुस ओर तेसरा दोस्त सीलास फिलिप्पी नगरा बिचे यीशु रे बारे चे शुभ समाचार सुणाणे खातर गए। स्यो नगरा ते बारे नदी रे कनारे एक जैगा बिचे गए जेती लोक प्रार्थना करने खातर कट्ठे हुइरे थे। तेती स्यो लुदिया नावां री एक ज्वाणसा साथे मिले जो एक व्यापारी थी। से परमात्मा साथे प्यार राखो थी, ओर तेसरी अराधना करो थी।

परमात्मा ने लुदिया रा मन यीशु रे शुभ समाचारा पादें परोसा करने खातर तैयार किता। पौलुसा ने ओर सिलासा ने तेसाखे ओर तेसारे परिवारा खे बपतिस्मा दिता। तेसाने पौलुस ओर सीलासा खे आपणे करे ठैरने खातर बोल्या, इजिखातर स्यो तेती ठैरिगे।

पौलुस ओर सीलास लोका साथे जादातर तेस जैगा पादें मिलो थे, जेती यहूदी लोक प्रार्थना करया करो थे। हर दिन जेबे स्यो तेती जाओ थे, तो एक सेवादारनी लड़की जो दुष्टआत्मा ने जकड़ी राखी थी, तिनारा पीछा करया करो थी। एस दुष्टआत्मा रे जरिए से लोका रा भविष्य बताया करो थी, इजिखातर से भविष्य बताणे वाली रे रूपा बिचे आपणे स्वामिया खातर बहुत सारा धन कमाया करो थी।

तिनारे जादें समय ये सेवादारनी लड़की चिल्लाया करो थी, “ये आदमी परम परधाना परमात्मा रा सेवादार ए। ये तुसाखे उद्धार पाणे री बाट बताणे लगिरा!” से रोज एड़ाई करया करो थी, जेथे कि पौलुस तंग हुइगा।

आखरी बिचे, एक दिन जेबे से सेवादारनी लड़की चिल्लाणे लगी, तो पौलुसा ने तेसारी तरफ मुड़िके तेसारे अंदर वाली दुष्टआत्मा खे बोल्या, “यीशु रे नावां ते एस लड़की बिचे ते निकली जा।” तेसी समय से दुष्टआत्मा तेस लड़की बिचे ते निकलिगी।

तेस लड़की रे स्वामी बहुत गुस्सा हुइगे। तिनाखे पता लगिगा कि तेस दुष्टआत्मा ते बिना ये लड़की भविष्य नी बताई सकदी, इजिरा मतलब ए कि लोका ने एबे तेसारे स्वामिया खे पैसे नी देणे कि से तिनाखे भविष्य बताओ कि तिना साथे क्या हुणा।

इजिखातर तेस लड़की रे स्वामी पौलुस ओर सीलासा खे रोमी अधिकारिया गे लइगे। तिनाने पौलुस ओर सीलासा री मार-पीट किती, ओर फेर स्यो जेला बिचे बंद करते।

तिनाने पौलुस ओर सीलास जेला रे एड़े हिस्से बिचे राखे जेती सबी ते जादा सैनिक थे। ओर तिनाने तिनारे पैर लकड़ी रे बड़े छेदा बिचे जकड़ते। पर पौलुस ओर सीलास आदी राती रे समय बी, परमात्मा री स्तुति रे गीत गाणे लगिरे थे।

तेबे अचाणक, एक खतरनाक भूकम्प हुआ! जेलखाने रे सारे दरवाजे खुलिगे, ओर कैदिया रिया जंजीरा खुलिगिया।

तेबे दरोगा जागिगा। तिने जेलखाने रे दरवाजे खुलेदे देखे। तिने सोच्या कि सारे कैदी बचिके नठिगे हुणे। से डरिगा कि तिनारे नठणे रे कारण रोमी अधिकारिया ने हाउं मारी देणा, इजिखातर से आपणे-आपिखे मारने खातर तैयार हुइगा! पर पौलुस तेसके देखिके चिल्लाया, “रुकी जा! आपिखे नुकसाण नी पौंचाया। आसे सब एती ए।”

तेस दरोगा ने कांबदे हुए पौलुस ओर सीलासा गे आइके पुछया, “उद्धार पाणे खातर हाउं क्या करूँ?” पौलुसा ने जवाब दिता, “प्रभु यीशु पादें परोसा कर, तेबे तैं ओर तेरे घराने ने उद्धार पाणा।” तेबे से दरोगा पौलुस ओर सीलासा खे आपणे करे लइगा, ओर तिनारे जख्म तोए। पौलुसा ने तेसरे परिवारा रे सब लोकाखे यीशु रे बारे चे शुभ समाचार सुणाया।

दरोगा ने ओर तेसरे पूरे परिवारा ने यीशु पादें परोसा किता, इजिखातर पौलुस ओर सीलासा ने तिनाखे बपतिस्मा दिता। तेबे दरोगा ने पौलुस ओर सिलासा खे खाणा खिलाया, ओर स्यो एक साथ कट्ठे हुइके खुश हुए।

दूजे दिना नगरा रे गुरुआ ने पौलुस ओर सीलास जेला बिचे ते आजाद करते, ओर तिनाखे बोल्या कि फिलिप्पी नगरा बिचे ते चली जाओ। पौलुस ओर सीलास लुदिया ओर कुछ दूजे दोस्ता साथे मिले ओर तेथे बाद तेस नगरा बिचे ते चलिगे। यीशु रे बारे चे शुभ समाचार फैलदा गया, ओर कलीसिया बढ़दी गई।

पौलुस ओर दूजे मसीही गुरुआ ने बहुत सारे नगरा री यात्रा किती। तिनाने लोकाखे यीशु रे बारे चे शुभ समाचार सुणाया। तिनाने कलीसिया रे बिसवासी लोकाखे उत्साहित करने ओर शिक्षा देणे खातर कई चिट्ठिया बी लिखिया। इना बिचे ते कुछ चिट्ठिया बाईबला रिया कताबा बणिगिया।