48. यीशु ही सच्चा मसीह ए

जेबे परमात्मा ने संसारा बणाया तो सब कुछ अच्छा था। कोई पाप नी था। आदम ओर हव्वा एक दूजे साथे ओर परमात्मा साथे प्यार करो थे। कोई बमारी या मौत नी थी। परमात्मा एड़ाई संसार चाओ था।

शैताना ने साँप बणिके बगिचे बिचे हव्वा साथे गल्ल किती, क्योकि से तेसाखे तोखा देणा चाओ था। तेबे हव्वा ओर आदमा ने परमात्मा रे खिलाफ पाप किता। तिनाने पाप किता था इजिखातर तरती पादें रौणे वाला हर इन्सान मरोआ।

आदम ओर हव्वा ने पाप किता था, इजिखातर कुछ ओर बी बुरा हुआ। स्यो परमात्मा रे दुश्मण बणिगे। तेबे ते लेइके हर एक आदमी ने पाप करी राख्या। हर एक आदमी जन्मा तेई परमात्मा रा दुश्मण ए। परमात्मा ओर लोका रे बिचे शान्ति नी थी। पर परमात्मा तिनाखे शान्ति देणा चाओ था।

परमात्मा ने वादा किता कि हव्वा रे एक वंशजा ने शैताना रा सिर कुचलना। परमात्मा ने ये बी बोल्या कि शैताना ने तेसरी एड़ी डंसणी। मतलब, शैताना ने मसीह मारी देणा, पर परमात्मा ने से दोबारा जिउंदा करी देणा। तेथे बाद, मसीह ने शैताना री शक्ति हमेशा खातर खत्म करी देणी। कई साल बाद, परमात्मा ने परगट किता कि से मसीह यीशु ए।

परमात्मा ने नूहा खे एक बहुत बड़ी किश्ती बणाणे खातर बोल्या ताकि जो बाढ़ परमात्मा तरती पादें लयाओणे वाला था तेस बाढ़ा ते से आपणे परिवारा खे बचाई सको। एस तरह परमात्मा ने स्यो लोक बचाए जो तेस पादें परोसा करो थे। स्यो सब के सब परमात्मा रे जरिए मारे जाणे रे लायक थे, क्योंकि सबी ने पाप किता था। पर परमात्मा ने तिना सबी खे बचाणे खातर यीशु पेज्या जो तेस पादें परोसा करोए।

कई सौ साला तक, पुरोहित परमात्मा खातर बलिदान चढ़ादें रए। इजिखातर कि सब लोका ने पाप करी राख्या ओर इजिखातर कि स्यो सब परमात्मा रे जरिए मारे जाणे रे लायक थे। पर स्यो बलिदान तिनारे पाप माफ नी करी सको थे। यीशु सबी ते बड़ा महापुरोहित ए। तिने से किता जो कोई पुरोहित नी करी सको था। तिने से एकमात्र आपणा बलिदान देइता, जो हर एक आदमी रे पाप मिटाई सको था। तिने स्वीकार किता कि परमात्मा सब लोका रे पापा री सजा माखे देयो। एस कारण, यीशु सिद्ध महापुरोहित था।

परमात्मा ने अब्राहमा खे बोल्या, “मैं तेरे जरिए संसारा री सब बरादरिया खे आशीष देणी।” यीशु एसी अब्राहमा रा वंशज था। परमात्मा ने अब्राहमा रे जरिए सब बरादरिया खे आशीष दिती, क्योंकि जो कोई यीशु पादें परोसा करोआ, परमात्मा तिना सबी खे पापा ते बचाओआ। जिने बी यीशु पादें परोसा किता ओर पापा ते छुटकारा पाया, परमात्मा तिनाखे अब्राहमा रे वंशज मनोआ।

परमात्मा ने अब्राहमा खे बोल्या कि मेरे खातर आपणे पुत इसहाका री बली चड़ाइदे। पर फेर परमात्मा ने इसहाका रे बदले बली चड़ाणे खातर एक मेमने रा इन्तजाम किता। आसे सब आपणे पापा खातर मारे जाणे रे लायक थे! पर परमात्मा ने आसारी जैगा मरने खातर यीशु रा बलिदान देइता। एसी कारण आसे यीशु खे परमात्मा रा मेमना बोलूं।

जेबे परमात्मा ने मिस्र देशा बिचे आखरी माहामारी पेजी तो तिने हर एक इस्राएली परिवारा खे बोल्या, कि एक मेमने री बली चढ़ाओ। तेस मेमने बिचे कोई दोष नी हुणा चइयो। तिनाखे तेस मेमने रा खून आपणे दरवाजे री चौखटा पादें लगाणा था। जेबे परमात्मा ने से खून देख्या, तो से तिनारे करा ते आगे बढ़िगा ओर तिनारे जेठे पुत नी मारे। जेबे ये हुआ तो परमात्मा ने इजिखे फसह त्योआर बोल्या।

यीशु फसह त्योआरा रे एक मेमने री तरह ए। तिने कदी पाप नी किता, इजिखातर तेस बिचे कुछ बी गलत नी था। से फसह त्योआरा रे समय मारया गया। जेबे कोई यीशु पादें परोसा करोआ, तेबे यीशु रा खून तेस आदमी रे पापा री कीमत चुकाओआ। ओर परमात्मा री सजा तेस आदमी पादें ते हाटी जाओई।

परमात्मा ने इस्राएली लोका साथे एक वाचा बानी। क्योंकि स्यो एड़े लोक थे जो तिने आपणे हुणे खातर चुणे थे। पर एबे परमात्मा ने एक एड़ी वाचा बानी राखी जो कि सबी खातर ए। अगर केस बी बरादरी रा कोई बी आदमी एस नई वाचा खे स्वीकार करोआ, तो से परमात्मा रे लोका बिचे शामिल हुई जाओआ। से एड़ा इजिखातर करोआ क्योंकि से यीशु पादें परोसा करोआ।

मूसा एक एड़ा भविष्यद्वक्ता था, जिने परमात्मा रे वचन बड़ी सामर्थ्य साथे प्रचार किते थे। पर यीशु सब भविष्यद्वक्ताओं बिचे ते सबी ते बड़ा ए। से परमात्मा ए, इजिखातर जो कुछ बी तिने किता, ओर बोल्या से परमात्मा रे काम ओर वचन थे। इजिखातर पवित्रशास्त्र यीशु खे परमात्मा रा वचन बोलोआ।

परमात्मा ने दाऊद राजा साथे वादा किता था, कि तेरे एक वंशजा ने राजे री तरह परमात्मा रे लोका पादें हमेशा खातर शासन करना। यीशु परमात्मा रा पुत ओर मसीह ए, इजिखातर से दाऊद राजे रा सेई वंशज ए जो हमेशा खातर राज्य करी सकोआ।

दाऊद तो इस्राएल देशा रा राजा था, पर यीशु सारे संसारा रा राजा ए! से फेर आउणा, ओर तिने हमेशा खातर आपणे राज्य पादें इन्साफ ओर शान्ति साथे शासन करना।