49. परमात्मा री नई वाचा

एक स्वर्गदूता ने मरियम नावां री एक कुँवारी लड़की खे बोल्या कि तैं परमात्मा रे पुता खे जन्म देणा। से एबु कुँवारी थी, पर पवित्रआत्मा तेसा पादें उतरी ओर से गर्बवती हुई। तेसाने एक पुता खे जन्म दिता जेसरा नाओं तेसाने यीशु राख्या। इजिखातर, यीशु परमात्मा ओर आदमी दोनो ए।

यीशु ने बहुत सारे चमत्कार वाले काम किते जेथे पता लगोआ कि से परमात्मा ए। से पाणी पादें चलया, ओर तिने तूफान शान्त किता। तिने बहुत सारे बमार लोक चंगे किते, ओर बहुत सारे लोका बिचे ते दुष्टात्मा काडिया। तिने मरेदे लोक जिउंदे करते, तिने पाँज रोटिया ओर दो मछलिया ते 5.000 लोकाखे पेटभर खाणा खिलाया।

यीशु एक महान शिक्षक बी था। जो कुछ बी तिने सिखाया, से बिल्कुल ठीक सिखाया। जो से लोकाखे करने खातर बोलोआ से तिनाखे करना चइयो क्योंकि से परमात्मा रा पुत ए। तिने सिखाया कि तुसाखे दूजे लोका साथे तेड़ाई प्यार करना चइयो, जेड़ा प्यार तुसे आपी साथे करो।

तिने ये बी सिखाया कि तुसाखे सब चीजा ते जादा ओर आपणी जायदाता ते बी जादा परमात्मा साथे प्यार करना चइयो।

यीशु ने बोल्या कि संसारा बिचे केस बी चीज़ा खे हांसिल करने ते जादा अच्छा ए परमात्मा रे राज्य बिचे हुणा। तेसरे राज्य बिचे परवेश करने खातर जरूरी ए कि परमात्मा तुसाखे तुसारे पापा ते बचाओ।

यीशु ने बोल्या कि कुछ लोका ने परमात्मा स्वीकार करना। ओर परमात्मा ने स्यो लोक बचाणे। पर दूजे लोका ने से स्वीकार नी करना। तिने ये बी बोल्या कि कुछ लोक अच्छी जमीना री तरह ए, क्योंकि स्यो यीशु रे बारे चे शुभ समाचार स्वीकार करो, ओर परमात्मा तिनाखे बचाओआ। पर कुछ लोक बाटा री कठोर जमीना री तरह ए। परमात्मा रा वचन बीजा री तरह बाटा बिचे गिरोआ पर तेती कुछ बी नी उगदा। ये लोक यीशु रे बारे चे शुभ समाचार स्वीकार नी करदे। स्यो तेसरे राज्य बिचे परवेश करने ते इन्कार करदोए।

यीशु ने सिखाया कि परमात्मा पापी लोका साथे बहुत जादा प्यार करोआ। से तिनाखे माफ करना चाओआ, ओर तिनाखे आपणी औलाद बणाणा चाओआ।

यीशु ने ये बी बताया कि परमात्मा पाप वाले कामा ते नफरत करोआ। क्योंकि आदम ओर हव्वा ने पाप किता, इजिखातर तिनारे सारे वंशजा ने बी पाप किता। एस संसारा बिचे रौणे वाला हर एक आदमी पाप करोआ, ओर परमात्मा ते दूर ए। हर एक आदमी परमात्मा रा दुश्मण ए।

पर परमात्मा ने एस संसारा बिचे रौणे वाले हर एक आदमी साथे इतना जादा प्यार किता कि तिने आपणा एकलौता पुत देइता ताकि जो कोई तेस पादें परोसा करो तेसके तेसरे पापा री सजा ना मिलो, बल्कि से हमेशा खातर परमात्मा साथे रओ।

तुसे मरने रे लायक ए, क्योंकि तुसे पाप करी राख्या। परमात्मा खातर ये जायज ए कि से तुसाखे सजा देयो, पर आसारे पापा री सजा यीशु ने आपी पादें लेइली। परमात्मा ने यीशु खे क्रुस वाली मौत देइके सजा दिती।

यीशु ने कदी बी पाप नी किता था, पर फेर बी तिने पाप वाली सजा ओर सबी ते खतरनाक मौत वाली सजा स्वीकार किती। एस तरह, तुसारे पाप ओर एस संसारा बिचे रौणे वाले हर एक आदमी रे पाप उठा ले जाणे खातर से एक सिद्ध बलिदान था। यीशु ने परमात्मा खातर आपणा बलिदान करता, इजिखातर परमात्मा तिनारा कोई बी पाप, बल्कि बड़े ते बड़ा पाप बी माफ करोआ, जो यीशु पादें परोसा करो।

बेशक तुसे बहुत सारे अच्छे काम करोए, पर इना कामा रे जरिए परमात्मा ने तुसे नई बचाणे। तेसरा दोस्त बणने खातर एड़ा कुछ बी निए जो तुसे करी सकोए। इजिरी बजाए, तुसाखे परोसा करना चइयो कि यीशु ही परमात्मा रा पुत ए, ओर से तुसारे बदले क्रुसा पादें मरया, ओर ये बी कि परमात्मा से ने दोबारा जिउंदा करता। अगर तुसे यीशु पादें परोसा करो, तो परमात्मा ने तुसारे पाप माफ करी देणे।

परमात्मा ने से हर एक आदमी बचाणा, जो यीशु पादें परोसा करोआ ओर तेसके आपणा प्रभु स्वीकार करोआ। पर तिने स्यो नी बचाणे, जो यीशु पादें परोसा नी करदे। ये गल्ल कोई मायने नी राखदी कि तुसे अमीर ए या गरीब ए, मर्द ए या ज्वाणस ए, बुडे या जवान ए, या तुसे केई रओए। परमात्मा तुसा साथे प्यार करोआ ओर से चाओआ कि तुसे यीशु पादें परोसा करो, ताकि से तुसारा दोस्त बणी सको।

यीशु तुसाखे बुलाणे लगिरा कि परमात्मा पादें परोसा करो ओर बपतिस्मा लेयो। क्या तुसे परोसा करोए कि परमात्मा रा एकलौता पुत यीशु ही मसीह ए? क्या तुसे परोसा करोए कि तुसे पापी ए, ओर परमात्मा रे जरिए सजा पाणे रे लायक ए? क्या तुसे परोसा करोए कि यीशु तुसारे पाप मिटाणे खातर क्रूसा पादें मरया?

अगर तुसे यीशु पादें परोसा करोए ओर जो कुछ तिने तुसा खातर करी राख्या तिजिरा अंगीकार करोए, तो तुसे एक मसीही ए! एबे शैतान आपणे अंधकार वाले राज्य बिचे तुसा पादें शासन नी करदा। एबे परमात्मा आपणे रोशनी वाले राज्य बिचे तुसा पादें शासन करोआ। तिने तुसे पाप ना करने खातर तैयार करी राखे, जो तुसे पैले करया करो थे। तिने तुसाखे एक नया जीवन देई राख्या।

अगर तुसे मसीही ए, तो जो यीशु ने किता, तिजिरे कारण परमात्मा ने तुसारे पाप माफ करते दे। एबे परमात्मा दुश्मणा री बजाय तुसाखे अच्छा दोस्त मानोआ।

अगर तुसे परमात्मा रे दोस्त ए ओर प्रभु यीशु रे सेवादार ए तो तुसे तिना गल्ला खे मानणे री इच्छा राखणी जो यीशु तुसाखे सिखाओआ। बेशक तुसे मसीही ए, शैताना ने एबु बी पाप करने खातर तुसारी परीक्षा करनी। पर परमात्मा से हमेशा करोआ जो से बोलोआ कि हाउं करूंगा। से बोलोआ कि अगर तुसे आपणे पाप मानिलो, तो मैं तुसारे पाप माफ करी देणे। तिने तुसाखे पापा रे खिलाफ लड़ने री सामर्थ्य देणी।

परमात्मा तुसाखे प्रार्थना करने खातर ओर वचन पढ़ने खातर बोलोआ। से तुसाखे दूजे बिसवासी लोका साथे मिलिके अराधना करने खातर बी बोलोआ। तुसे दुजे लोका खे बी बताणा ए, कि तिने तुसा खातर क्या करी राख्या। अगर तुसे इना सब कामा खे करोगे, तो तुसे तेसरे पक्के दोस्त बणी जाणे।