50. यीशु रा दोबारा वापस आउणा

लगभग 2,000 साला ते, संसारा री सब जैगा पादें जादा ते जादा लोक मसीह यीशु रे बारे चे शुभ समाचार सुनणे लगिरे, ओर कलीसिया बढ़ने लागिरी। यीशु ने वादा किता कि मैं संसारा रे अंत समय बिचे वापस आउणा। हाँलाकि से एबु वापस नी आइरा, तेबे बी तिने आपणा वादा पूरा करना।

जबकि आसे यीशु रे वापस आउणे रा इन्तजार करने लगिरे, परमात्मा चाओआ कि आसे एड़ा जीवन जिउं जो पवित्र हो ओर तेसरा आदर करूं। परमात्मा ये बी चाओआ कि आसे दूजे लोकाखे बी तेसरे राज्य रे बारे चे बताऊं। जेबे यीशु तरती पादें रओ था तेबे तिने बोल्या, “मेरे चेल्या ने संसारा बिचे हर जैगा रे लोकाखे परमात्मा रे राज्य रे बारे चे शुभ समाचार प्रचार करना, ओर तेबे संसारा रा अंत आई जाणा।”

बहुत सारी बरादरिया ने यीशु रे बारे चे एबु तक नी सुणी राख्या। स्वर्गा खे वापस जाणे ते पैले, यीशु ने मसीही लोकाखे बोल्या कि तिना लोकाखे शुभ समाचार सुणाओ, जिनाने ये कदी बी नी सुणी राख्या। तिने बोल्या, “जाओ ओर सब बरादरिया रे लोकाखे मेरे चेले बणाओ!” ओर “बडाई करने खातर डोरू बिचे फसल पकी चुकिदिए।”

यीशु ने ये बी बोल्या, “एक सेवादार आपणे मालका ते बड़ा नी हुंदा। एस संसारा रे खास लोका ने मादें नफरत किती, ओर मेरे कारण तिनाने तुसे बी सताणे ओर मारी देणे। एस संसारा बिचे तुसे पीड़ित हुणे, पर मजबूत बणो, क्योंकि मैं शैतान हराइतादाए जो एस संसारा पादें शासन करोआ। अगर तुसे अंत समय तक मेरे प्रति परोसे लायक बणे रओगे, तो परमात्मा ने तुसे बचाणे!”

यीशु ने आपणे चेल्या खे ये समझाणे खातर एक कहाणी सुणाई कि जेबे संसार रा अंत हुणा तो लोका साथे क्या हुणा। यीशु ने बोल्या, “केस आदमी ने आपणे डोरुआ बिचे अच्छा बीज बिज्या। जेबे से सौणे लगिरा था, तो तेसरा दुश्मण आया ओर तिने कणका रे बीजा बिचे जंगली बीज बीजिते, ओर फेर से चलिगा।”

जेबे स्यो बीज लुंगे तो सेवादारा ने आपणे मालका खे बोल्या, “ए मालक, तैं तो आपणे डोरुआ बिचे अच्छा बीज बिज्या था। तो फेर इजी बिचे ये जंगली बीजा रिया लूँगा केइते आइया? मालका ने जवाब दिता, ये मेरा कोई दुश्मण ए जिने एड़ा काम करी राख्या।”

तिना सेवादारा ने आपणे मालका खे जवाब दिता,‘क्या आसे जंगली बीजा रिया लूँगा पटी दूँ?’तेस मालका ने बोल्या,‘नई। अगर तुसे एड़ा करोगे तो तुसे इजी साथे कुछ कणक बी पटी देणी। बडाई रे समय तक इन्तजार करो। ओर तेबे जंगली घास कट्ठा करिके गट्ठे बिचे बानी लेयो ताकि तुसे तिजिखे फुकी सको। ओर कणक मेरे पण्डारा बिचे लेइके आयो।”

चेल्या ने एस कहाणी रा मतलब नी समझया, इजिखातर तिनाने यीशु गे विनती किती कि आसाखे एस कहाणी रा मतलब बता। यीशु ने बोल्या, “अच्छा बीज बिजणे वाला आदमी मसीह रे बारे चे बताओआ। डोरू संसारा रे बारे चे बताओआ। अच्छा बीज परमात्मा रे लोका रे बारे चे बताओआ।”

जंगली घास शैताना रे लोका रे बारे चे बताओआ। ओर तेस आदमी रा दुश्मण, जिने कणका रे डोरू बिचे जंगली बीज बिज्या था से शैताना रे बारे चे बताओआ। फसला री बडाई एस संसारा रा अंत हुणे रे बारे चे बताओई, ओर बडाई करने वाले परमात्मा रे स्वर्गदूता रे बारे चे बताओ।”

जेबे संसारा रा अंत हुणा, तेबे स्वर्गदूता ने शैताना रे सब लोक एक साथ कट्ठे करिके नरका री आगी बिचे सेटी देणे। तेती स्यो लोक बहुत खतरनाक सताव हुणे रे कारण रोणे ओर तिनाने आपणे दाँद पिसणे। पर जो लोक तर्मी ए, जिनाने यीशु पादें परोसा किता, स्यो आपणे पिता परमात्मा रे राज्य बिचे सूरजा री तरह चमकणे।”

यीशु ने ये बी बोल्या कि संसार रा अंत हुणे ते पैले मैं तरती पादें वापस आउणा। मैं तेसी तरीके ते वापस आउणा जियां हाउं गया था। इजिरा मतलब ए, तेसगे तेसरा असली शरीर हुणा, ओर से बादला पादें सवार हुइके आउणा। जेबे यीशु वापस आउणा, तो हर एक मसीही लोक जो मरी चुकेदे, स्यो मरेयादे दे बिचे ते जी उठणे ओर तेस साथे आसमाणा बिचे मिलणे।

ओर तेस समय जो मसीही लोक एबु जिउंदे हुणे, स्यो आसमाणा बिचे उठा लिए जाणे ओर तिना दूजे मसीही लोका साथे शामिल हुई जाणे जो मरेयादे बिचे ते जी उठणे। स्यो सब तेती यीशु रे साथे हुणे। तेथे बाद, यीशु आपणे लोका साथे रौणा। जेबे स्यो एक साथ कट्ठे रौणे तो तिनागे हमेशा खातर पूरी शान्ति हुणी।

यीशु पादें परोसा करने वाले हर एक आदमी खे यीशु ने जीवना मुकट देणे रा वादा करी राख्या। तिनाने हमेशा खातर परमात्मा साथे हर एक चिजा पादें शासन करना। ओर तिनागे सिद्ध शान्ति हुणी।

पर परमात्मा ने तिना सबी रा इन्साफ करना, जो यीशु पादें परोसा नी करदे। तिने स्यो नरका बिचे सेटी देणे जेती तिनाने रोणा ओर आपणे दाँद पिसणे, ओर स्यो हमेशा पीड़ित हुंदे रौणे। कदी नी बुजणे वाली आग लगातार तिनाखे जलांदी रौणी, ओर कीड़े तिनाखे खाणे ते कदी नी रुकणे।

जेबे यीशु वापस आउणा, तो तिने शैतान ओर तेसरा राज्य हमेशा खातर नष्ट करी देणा। तिने शैतान नरका बिचे सेटणा। तेती शैतान हमेशा खातर आगी बिचे जलदा रौणा, तिना सबी साथे जिनाने परमात्मा रा आदेश मानणे रे बजाए शैताना रे पीछे चलने रा चुनाव किता था।

क्योंकि आदम ओर हव्वा ने परमात्मा रा आदेश नी मान्या था ओर स्यो पाप एस संसारा बिचे लेइके आए थे, परमात्मा ने संसारा खे श्राप दिता ओर तिजिखे नष्ट करने रा फैंसला किता। पर केस दिना परमात्मा ने एक नए स्वर्गा री ओर एक नई तरती री रचना करनी, जो सिद्ध हुणे।

यीशु ओर तेसरे लोक तेस नई तरती पादें रौणे, ओर तिनाने हमेशा खातर सब चीजा पादें शासन करना। तिने लोका री आखिया ते हर एक आँसू पोछी देणा। ऐबे कोई बी पीड़ित या दुखी नी हुणा। स्यो कदी नी रोणे। ओर ना स्यो बमार हुणे ओर ना कदी मरने। ओर तेती कुछ बी बुराई नी हुणी। यीशु ने आपणे राज्य पादें इन्साफ, ओर शान्ति साथे शासन करना। से हमेशा खातर आपणे लोका साथे रौणा।