23. यीशु मसीह चो जनम

युसूफ नाव चो एक धर्मी बिता संगे मरियम चो मांगनी होउन रली। जिदलदायं हुन सुनलो कि मरियम पेटेहारिन आसे तेबे हु जानते रलो कि हुन हुनचो पिला नुआय। मान्तर हुन मरियम के बदनाम करुक लाय नी चाहते रलो, हुनी काजे हुन हुनचो उपरे किरपा करतो आउर खुसनाय छाडतो काजे बिचार करलो।मान्तर एचो आगे कि हुन असन करतो, गोटोक सरगदूत हुनचो सपना ने एउन बाती गोठयालो।

हुन स्वर्गदूत बललो, "हे युसूफ, मरियम के आपलो आयले के रूप ने घरे आनतो काजे नी डर। जोन हुनचो भीतरे जोन पिला आसे, हुन पवितर आत्मा चो बाट ले आय। हुन गोटोक बीता के जनम देयेदे, जेचो नाव यीशु संगासे (माने कि यहोवा बचाऊ आय) काय काजे बलले ने कि हुन लोग मन के पाप ले बचाऊ आय।"

हुनी काजे युसूफ मरियम ले बिया करलो आउर हुनके आपलो बायले बनाउन बातिन घरे आनलो मान्तर हुनचो पिला जनम होतो बेरा ले हुन हुनचो संगे नी सोअलो।

जिदल दायं मरियम चो जनम देतो बेरा अमरली, तेबे हुन आउर युसूफ बेतलेहम जातो काजे गोटोक लम्बा जात्रा करला। हुनमन के हुन थाने जातोर ही रली काय काजे बलले ने कि रोमी अधिकारी इजराइल ने रतोर जमाय लोग मन चो गिनती करते रहोत। हुनमन चाहते रला कि जमाय लोग हुन थाने जाओत जोन थाने हुन मन चो पुरखा रते रला। राजा दाऊद चो जनम बेतलेहम ने होउन रली, आउर हुन मरियम आउर युसूफ दुनो चो पुरखा रलो।

मरियम आउर युसुफ बेतलेहम ने गेला, मान्तर हुन थानो जीव मनके संगातो जगा ने ठेबतो काजे आउर काई जगा नी रये।ए हुनी जगा रये जोन थाने मरियम आपलो पिला के जन्म दिली। हुन हुनके कोटासार ने सुआउन रये, काय काजे कि हुन थाने हुनचो काजे काई ठान नी मिरली। हुन मन हुनचो नाव यीशु संगाला।

हुन राती, हुन लगे बेडा ने धोराई मन आपलो मेंढा गोह्ड़ी चो राखा करते रओत। तुरते ले गोटोक चमकदार परबू चो सरगदूत हुनमन चो लगे दखा दिलो। आउर हुनमन खुबे डरला, तेबे सरगदूत हुन मनके बललो, नी डरा कसन बलले मय तुमोके खुबे हरिक चो नंगत खबर सुनाउक इलेसे। दाउद चो सहर बेतलेहम ने तुमचो काजे गोटोक मुक्ति देतो बिता जनम लोसे, आउर हुनी मसीह परबू आया।

आउर तुमी जाउन हुनके असन चितासे की तुमी गोटोक लेका पिला के फटही ने गुडियालोर आउर कोटासार ने सुआलोर भेटासे तेबे उधापड़े हुन सरगदूत चो संगे सरगदूत चो गोह्डा बादरी ने दखा दिला। हुन मन महा परबु चो जय -जय करून बलला सरग ने महा परबु चो मयमा आउर मजपुर ने जोन मनुक मन ले हुन हरिक आसे हुन मनके अस्तीर मिरे।

तेबे सरगदूत मन गेला। हुन धोराई मन बले आपलो मेंढा मन के छाडून लेका पिला के द्कुक लाय गेला। तुरते हुन मन हुन जगा ने अमरला जोन थाने यीशु रलो आउर हुनमन हुनके कोटासार ने सोओलो पावला, जसन कि हुन सरगदुत बालू रलो। हुनमन खुबे हरिक ने रला। तेबे हुन धोरई मन हुन लगे इला जोन लगे हुनमन चो मंदा गोहड़ी रली। हुन मन जोन बले कांई सुनुरला आउर दखुन रला हुन जमे काजे महा परबू चो गुणगान करला।

पूरब ने गोटोक राज ने बिता मन रते रहोत। हुनमन तारा मन चो पाठ पढून रहोत आउर हुन खुबे होशियार रला। हुनमन गोटोक जमाय ले अलगे तारा के बादरी ने दखला। हुनमन हुनके दखुन बाती बलला कि यहूदी मन चो गोटोक नुआ राजा जनम धरलोसे।हुनी काजे हुनमन हुन लेका पिला के दखतो काजे आपलो देश ले यात्रा करतो चो निरनय धरला। खुबे लाम्ब जात्रा करलो पाचे, हुनमन बेतलेहम इला आउर इला आउर हुन घर के दखला जोन थाने यीशु चो आया-बाबा ठेबुन रला।

जिदलदाय हुन मनुक मन यीशु के आपलो आया संगे दखला तेबे हुनमन आपलो मांढी टेकून बाटी हुनचो आराधना करला। हुन्मं यीशु के माहांगा भेंट चेगाला आउर आपलो घरे बोहड़ला।