24. युहन्ना बपतिस्मा देतो बिता आउर यीशु

एलिशिबा आउर जकर्याह चो बेटा युहन्ना, बड़े बाडून बाती गोटोक अगमज्ञानी बनलो। हुन रान ने रते रलो, आउर रान चो मंदरस आउर थापा मन के खाते रये। आउर ऊंट चो रोआं चो फटही पिदते रये।

आउर खुबे लोग मन युहन्ना चो गोट के सुनतो काजे राने निकरून इला। आउर युहन्ना पाप मन चो क्षमा काजे, "मन बोहड़ातो काजे आउर सरग राज, लगे अमरलिसे" बलून महा परबु चो गोट सांगुक मुरियालो।

जिदलदाय लोग मन युहन्ना चो गोट के सुनला, आउर तेबे हुन थान ले खुबे लोग मन आपलो पाप मन चो पछतावा करला, आउर युहन्ना हुन लोग मनके बपतिस्मा दिलो। युहन्ना के दखतो काजे धरम बुता करु लोग मन बले इला, मान्तर हुन मन आपलो पाप मनके नी मानला।

युहन्ना धरम गुरु मनके बललो, "ऐ साप चो पिला मन! पाप मनके माना आउर आपलो चाल-चलन के बदला। महा परबु हुन रुक के गोदुन देयदे जोन नंगत फर नी धरेदे। आउर हुन मनके आईग ने पकाउन देयदे, "जोन अगमज्ञानी मन बलुन रला युहन्ना हुनके सते करलो" दख, झटके मय तुचो पुरे आपलो गोटोक दूत के पठायेंदे जोन तुचो काजे बाट तियार करेदे।

कोनी-कोनी धरम गुरु मन युहन्ना के ये बले पूछला, “कि काय हुन मसीह आय।” युहन्ना हुन मन के बललो, "मय मसीह नुआयं, मान्तर हुन मोचो पाचे एयदे हुन इतलो महान होयदे कि मोय हुनचो पनही चो डोरी हिटातो लायक बले नियाय।

दुसर दिन, यीशु बपतिस्मा धरुक युहन्ना लगे ईलो। जिदलदाय युहन्ना हुनके द्खलो, तेबे हुन बललो, दखा! महा परबु चो मेंढा पिला जोन जगत चो पाप मनके उठाउन नेयेदे।

युहन्ना यीशु के बललो, "मय तुके बपतिस्मा देतो लाइक चो नोआय। एचो पलटा तुई मोके बपतिस्मा देस। मान्तर यीशु बललो, “तुय मोके बपतिस्मा देस, कसन बलले येई सत बुता मन आय। तेबे युहन्ना हुनके बपतिस्मा दिलो, जेबले कि यीशु केबई बले पाप नी करून रलो।

बपतिस्मा दिलो पाचे, जिदलदाय यीशु पानी भीतर ले निकरून बाहरे इलो। महा परबु चो पवित्र परेया चोप रुप ने परगट होलि। आउर खाले एउन हुनचो उपरे थेब ली। उदलिदाय, महा परबू सरग ले गोठीयालो। हुन बललो, "तुई मोचो बेटा आस। मय तुचो ले मया करुआयं, आउर मय तुचो ले खुबे हरिक होले।

महा परबु युहन्ना के बलून रये, कि पबितर आत्मा खाले उतरून जेचो उपरे उतरेदे जोके तुई बपतिस्मा देसे। 'हुनी महा परबू चो बेटा आय। महा परबू गोटोक ही आय। मान्तर जिदलदाय युहन्ना यीशु के बपतिस्मा देऊन रलो, तेबे हुन महा परबू के गोठियातो के सुनलो, जोन कि यीशु आय, आउर हुन पबितर आत्मा के बले दखलो।