25. सयतान यीशु के परखतोर

यीशु चो बपतिस्मा होलो तुरते पाचे, पबितर आत्मा हुनके राने निलो। यीशु हुन थाने चालीस दिन आउर चालिस राती तक रलो। हुन बेरा हुन उपास करलो, आउर सयतान यीशु लगे जाउन पाप करतो काजे हुनके परख लो।

आगे तो सयतान यीशु के बललो, “तुई महा परबू चो बेटा आस आले, ए पकना मनके आटा रोटी बनान देस, ताकि तुई ए मनके खासे।”

मान्तर यीशु सयतान के बललो, ''महा परबू चो वचन ने ए लिखली से, जीवित रतो काजे माने मनके तुचाय भात नी लागे, मान्तर हुनके सपाय हुन गोठ मन लागुआय जोन महा परबू हुन मनके सांगूआय।”

तेबे सयतान यीशु के मंदीर चो सबले टोक ने निलो। हुन उन के बललो, ''तुई महा परबू चो बेटा आस आले एथान ले खाले कुदून दखाव, काय काजे कि लिखलोर आसे महा परबू तुके उठातो काजे आपलो सरगदूत मनके आज्ञा देयेदे, कि तुचो पाय ने पकना नी पावो।

मान्तर यीशु असन नी करलो, जोन सयतान हुनके करतो काजे बलुन रलो। एचो पलटा यीशु हुनके बललो, “महा परबू सपाय ले बलुआय, तुई परबू आपलो महा परबू के नी परखसे।”

फेर सयतान यीशु के गोटोक डेंग डोगरी ने निलो। आउर सनसार चो जमाय राज आउर हुनचो धन दुगानी के दखालो। हुनके बललो, “तुई मोचो पुरे पाटा पडून मोके पाय पड़लीस जाले मय जमाय के तुके देऊन देयंदे।”

तेबे यीशु हुनके बललो, ''ऐ सयतान तुई मोचो लग ले जा! महा परबू चो वचन ने असन आदेस देऊआय, "तुचाय आपलो परबू महा परबू चो आरधना करा। महा परबू चो रूप ने तुमी हुनची मान करा।

यीशु के सयतान परखलो, मान्तर यीशु हार नी मानलो, तेबे सयतान हुनचो लगे ले जाते गेली। तेबे सरगदूत मन एउन यीशु चो सेवा सतकार करुक मुरियाला।